ក្រោយល្បីកក្រើកពិភពលោក កម្ពុជាលេងបាល់ទះជាប់ដៃ ពេលនេះសហព័ន្ធបាល់ទះសិក្សាធ្វើច្បាប់ហាមលេងបែបនេះ
- ភ្នំពេញ
រាជធានីភ្នំពេញ ៖ កាលពីពេលថ្មីៗនេះ លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡា
រាជធានីភ្នំពេញ ៖ កាលពីពេលថ្មីៗនេះ លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជាបានលើកឡើងក្នុងថ្ងៃប្រកាសបើកសម្ពោធកម្មវិធីSlamball(៤ទល់នឹង៤)បាល់ទះពាក់កណ្ដាលអាជីពថា លោកកំពុងសិក្សារកវិធីណាដើម្បីដាក់ពិន័យដល់ការលេងបាល់ទះជាប់ដៃលក្ខណៈក្រៅផ្លូវការ ដែលជាទម្លាប់អាក្រក់មើលនិងគួរចៀសវាង ។ ទន្ទឹមគ្នានោះក៏មានសំណួរជាច្រើនបានលើកមកសួរថា តើទៅរួចទេ ប្រសិនបើច្បាប់នេះត្រូវបានរៀបចំឡើង ?
លោកអគ្គលេខាធិការខាងលើបាននិយាយថា ឥឡូវនេះលោកកំពុងតែសិក្សាមើលថា ធ្វើម៉េចទើបអាចរៀបចំច្បាប់ដើម្បីដាក់ពិន័យកីឡាករដែលលេងជាប់ដៃបាន ព្រោះថា កន្លងមកលោកដឹកនាំកីឡាករចេញទៅប្រកួតស្រុកគេ លោកខ្មាសគេណាស់ ពេលគេសួរថា អាលេងជាប់ដៃហ្នឹងនៅប្រទេសណា ? និយាយទៅលោកខ្មាសគេហ្មង។ លោកគិតថា យើងលេងជាប់ដៃលេងទៅតែសុំចិត្តកុំ Live នៅលើបណ្ដាញសង្គម ឬថតបង្ហោះអី ព្រោះអីប្រទេសគេនោះគេមិនដឹងថា យើងលេងសើចទេ ជួនកាលគេអាចគិតថា វាជាទម្លាប់របស់យើងផងមិនដឹង។
ចំពោះចំណុចនេះមិនត្រឹមតែមានមហាជនធ្លាប់បានសំណូមពរទេ សូម្បីថ្នាក់ដឹកនាំកីឡាបាល់ទះ មានទាំងគ្រូបង្វឹក និងកីឡាករជម្រើសជាតិបាល់ទះក៏ធ្លាប់បានលើកឡើង ដោយសំណូមពរហើយ សំណូមពរទៀត ព្រោះអីការលេងជាប់ដៃបែបនេះ វាបានជះឥទ្ធិពលដល់ក្មេងៗជំនាន់ក្រោយ យកជាគំរូតាម ។ ជាក់ស្ដែងវិស័យបាល់ទះកំពុងតែមានការចាប់អារម្មណ៍ ពិសេសមិនថាបណ្ដាទីជនបទ ឬទីក្រុងឡើយ តែងតែមានការផុសផុលពេញនិយមចូលរួមទស្សនាពេញៗតារាង ហើយនៅពេលផុស ឬថតផ្សាយចេញទៅ ក៏មានអ្នកមើលរាប់ពាន់ ឬចូលខ្ទង់ម៉ឺននាក់ក៏មានដែរ ហើយក្នុងចំណោមនោះក៏អាចមានក្មេងៗ ឬជនបរទេសមើលដែរ។
គួររំលឹកថា ការប្រកួតបាល់ទះ Slamball (៤ទល់នឹង៤) នឹងចាប់ផ្ដើមដំណើរការប្រកួតនៅ
ថ្ងៃទី៥ ខែវិច្ឆិកា ឆ្នាំ២០២២ ខាងមុខនេះតទៅហើយ ដោយមានក្រុមខ្លាំងៗ ចំនួន ៨ ចូលរួម។
ការប្រកួតក្នុងព្រឹត្តិការណ៍នេះ ក៏មិនមានឲ្យលេងជាប់ដៃដែរ ពោលគឺលេងដូចការប្រកួតស្តង់ដារយ៉ាងដូច្នេះដែរ គ្រាន់តែប្រកួតលក្ខណៈ ៤ ទល់ ៤ ឬ គេហៅថា ៤ ស្មើ ដែលក្នុងនោះមានសុទ្ធតែកីឡាករល្បីៗចូលរួមមាន ឌូក , យុន , រាជ, ម៉ាប់ឆ្វេង ជាដើម ៕
ចែករំលែកព័តមាននេះ