ប្រធានាធិបតីអាមេរិកលោកដូណាល់ ត្រាំ ប៉ុនប៉ងរិះរកវិធីថ្មីក្រោយបរាជ័យនៃគម្រោងកែទម្រង់ធានារ៉ាប់រងសុខភាពដោយសារពុំមានការគាំទ្រគ្រប់គ្រាន់ពីសំណាក់បណ្តាសមាជិកសភានៃគណបក្សរបស់លោក ។
នាថ្ងៃទី២៥ មីនា ប្រធានាធិបតីអាមេរិកបានងាកជាថ្មីមកសរសេរសារតាម TWITTER ដើម្បីបរិហារច្បាប់ OBAMACARE របស់អ្នកកាន់អំណាចមុនលោក គឺលោកបារ៉ាក់ អូបាម៉ា ។ លោកសរសេរថា OBAMACARE នឹងផ្ទុះបែកហើយយើងនឹងប្រមូលផ្តុំកម្លាំងហើយកសាងរួមគ្នានូវច្បាប់សុខភាពល្អមួយសម្រាប់ប្រជាជន ។ សូមលោកអ្នកកុំបារម្ភអី ។
ចំណែកលោក MIKE PENCE អនុប្រធានាធិបតីអាមេរិកវិញមានប្រតិកម្មថា ការបោះឆ្នោតមិនលុបចោលការកែទម្រង់ខាងសុខភាពកាលពីថ្ងៃទី២៤ មីនា ជាជ័យជម្នះបណ្តោះអាសន្នរបស់ពួកអ្នកជំទាស់ប៉ុណ្ណោះ ក៏ប៉ុន្តែខ្ញុំសូមសន្យាថាជ័យជម្នះនេះនឹងមិនគង់វង្សយូរទេ ។ ពលរដ្ឋអាមេរិកចង់បានការបញ្ចប់ OBAMACARE ។ លោកអ្នកឃើញហើយ១០០% នៃអ្នកប្រជាធិបតេយ្យក្នុងសភានិងអ្នកសាធារណរដ្ឋមួយក្តាប់តូចបានរាំងខ្ទប់ផ្លូវ ។ លោកបន្តថា ខ្ញុំសូមសន្យាថា លោកប្រធានាធិបតីត្រាំ នឹងមិនបញ្ឈប់ដាច់ខាតតស៊ូដើម្បីការប្រកាន់ពាក្យសន្យានានាចំពោះពលរដ្ឋអាមេរិក ហើយយើងនឹងធ្វើឱ្យអាមេរិកទទួលបានអនុភាពរបស់ខ្លួនវិញ ។
ចុះហត្ថលេខាកាលពីឆ្នាំ២០១០ ច្បាប់ហៅ OBAMACARE បានពង្រីកការផ្តល់ធានារ៉ាប់រងសុខភាពដល់ពលរដ្ឋអាមេរិកច្រើនលាននាក់ ក៏ប៉ុន្តែជួបប្រទះបញ្ហាហិរញ្ញវត្ថុ ៕
ចែករំលែកព័តមាននេះ