ក្រុមហ៊ុនរុស្ស៊ី ជាក្រុមហ៊ុនផលិតបណ្តាកាំភ្លើងបាញ់ត្រង់ចម្ងាយឆ្ងាយ ។ តាមវេបសាយផ្លូវការរបស់ខ្លួនសហគ្រាស LOBAEV ARMS អះអាងថាខ្លួនផលិតបណ្តាអាវុធដែលល្អប្រសើរបំផុតនៃពិភពលោក ។ អាវុធទាំងនេះរួមបញ្ចូលបច្ចេកវិទ្យាល្អរបស់លោកខាងលិចដែលអាចបាញ់បានត្រង់បំផុតហើយបានឆ្ងាយទៀតផង ។
លោកវ្ល៉ាឌីមៀរ ឡូបាអេវ ប្រមុខក្រុមហ៊ុននោះរៀបរាប់ថាវាពុំមែនជាការងាយស្រួលទេក្នុងការបើកសហគ្រាសរបស់លោកនៅរុស្ស៊ី ។ ក្រុមហ៊ុនរបស់លោកជាអ្នកដែលផលិតអាវុធឯកជនដំបូងគេចាប់តាំងពីសម័យកាលសូវៀតមក ។ ទោះបីយ៉ាងណាលោកទទួលបានអាជ្ញាប័ណ្ណហើយបច្ចុប្បន្នក្រុមហ៊ុនទទួលបានការបញ្ជាទិញច្រើនបំផុតពិសេសដោយសារការដាក់ទណ្ឌកម្មរបស់ពួកអឺរ៉ុប ។ លោករៀបរាប់ថាក្រោយការដាក់ទណ្ឌកម្មរបស់សហភាពអឺរ៉ុបទីផ្សារនាំចូលអាវុធរបស់រុស្ស៊ីត្រូវលុបបំបាត់ចោលហើយក្រុមហ៊ុនយើងក៏ដូចជាក្រុមហ៊ុនផលិតអាវុធជាតិដទៃទៀតដែរយើងទទួលបានទីផ្សារយ៉ាងល្អ ។ តាំងពិចាប់ផ្តើមផលិតកម្មមក បណ្តាកាំភ្លើងរបស់ក្រុមហ៊ុន LOBAEV ដូចជាកាំភ្លើងធុន TSR-30 និង៤០ កាំភ្លើង CR-50 EN 50 BMG ជាកាំភ្លើងដែលគ្រាប់បាញ់ចេញមានអានុភាពខ្លាំងបំផុត ដោយកាំភ្លើងទាំងនេះដណ្តើមបានពានរង្វាន់ជាច្រើនក្នុងបណ្តាការប្រកួតបាញ់ប្រភេទអន្តរជាតិនិងជាតិ ។ ក្រុមហ៊ុននោះកំណត់់លក់កាំភ្លើងរបស់ខ្លួនដល់អេមីរ៉ាត់អារ៉ាប់រួមផងដែរ ។
បណ្តាកាំភ្លើងរបស់ក្រុមហ៊ុន LOBAEV ARMS ត្រូវបានប្រើប្រាស់ក្នុងវិស័យជាច្រើនអាស្រ័យហេតុនេះហើយបានជាអ្នកបរបាញ់ជាច្រើនចូលចិត្តប្រើអាវុធបាញ់ត្រង់ទាំងនោះ ។ ម៉ូយទិញឯទៀតៗគឺកងកម្លាំងសន្តិសុខដូចជាប៉ូលិសនិងកងទ័ព ។ បណ្តាកាំភ្លើងបាញ់ត្រង់ធុនធ្ងន់ត្រូវទិញជាពិសេសសម្រាប់បណ្តាកងឯកភាពខ្មាន់កាំភ្លើងពិសេស ។ បច្ចុប្បន្នក្រុមហ៊ុនទទួលសំណើទិញអន្តរជាតិជាច្រើនព្រមទាំងសំណើទិញរបស់ប្រទេសផ្សេងៗលើពិភពលោក។ គូប្រជែងសំខាន់គឺសហគ្រាសអាមេរិក BARRETT និង CHEYTAC ជាក្រុមហ៊ុននាំមុខលើទីផ្សារអាវុធបាញ់ត្រង់ធុនធ្ងន់ ។ ទីផ្សារអាមេរិកត្រូវបិទសម្រាប់យើងទោះបីបណ្តាអតិថិជនអាមេរិកចង់បានកាំភ្លើងរបស់យើងច្រើនក្តី ។
ទន្ទឹមនឹងនេះលោកឡូបាអេវ គូសបញ្ជាក់ថា បណ្តាទណ្ឌកម្មពុំមែនជាឧបសគ្គមួយសម្រាប់លោកឡើយ ព្រោះបណ្តាអ្នកឯកទេសរបស់ក្រុមហ៊ុនយើងអាចផលិតបណ្តាឧបករណ៍ពិសេសដោយខ្លួនឯង ចំណែកម៉ាស៊ីនចាំបាច់មួយចំនួនមានផលិតរួចហើយនៅរុស្ស៊ី ។
សម្រាប់គម្រោងថ្មីៗតាមលោកឡូបាអេវ ថា យើងបានបង្កើតក្រុមហ៊ុនដាច់ដោយឡែកមួយទៀត គឺក្រុមហ៊ុន LOBAEV ROBOTICB មានឯកទេសខាងផលិតរ៉ូបូ ព្រមទាំងបណ្តាគម្រោងគ្រឿងសព្វាវុធទាក់ទិននឹងអេឡិចត្រូនិក ដូចជាកែវយិតមានបញ្ញាសម្រាប់បណ្តាកាំភ្លើង ព្រមទាំងបណ្តាប្រព័ន្ធទំនើបៗ ។
ប្រមុខក្រុមហ៊ុននេះបញ្ជាក់ថា ប្រសិនបើក្រុមហ៊ុនយើងសម្រេចបានគ្រប់គម្រោងនោះអាវុធទាំងនេះនឹងអាចផ្លាស់ប្តូរទាំងស្រុងរូបភាពនៃការប្រយុទ្ធបែបទំនើប ៕
ចែករំលែកព័តមាននេះ