ប្រទេសចិនត្រូវបានគេនិយាយថាចាប់ផ្តើមឡើងវិញការងារកសាងលើកោះមួយនៅសមុទ្រចិនខាងត្បូង ។ នេះបើយោងតាមរូបភាពផ្កាយរណបថ្មីដែលបង្ហាញថាក្រុងប៉េកាំងអាចកសាងកំពង់់ផែថ្មីធំមួយលើ
ប្រទេសចិនត្រូវបានគេនិយាយថាចាប់ផ្តើមឡើងវិញការងារកសាងលើកោះមួយនៅសមុទ្រចិនខាងត្បូង ។ នេះបើយោងតាមរូបភាពផ្កាយរណបថ្មីដែលបង្ហាញថាក្រុងប៉េកាំងអាចកសាងកំពង់់ផែថ្មីធំមួយលើកោះប៉ារ៉ាសែលដែលមានភាពចម្រូងចម្រាស់ ។
តើប្រជុំកោះប៉ារ៉ាសែលនៅសមុទ្រចិនខាងត្បូងឆាប់ៗនឹងមានកំពង់ផែយោធាមួយរបស់ចិនឬ ? រូបភាពផ្កាយរណបទាំងនោះបង្ហាញយ៉ាងច្បាស់ពីការកាប់រានព្រៃ ព្រមទាំងបណ្តាដំណាក់កាលដំបូងៗនៃការងារសាងសង់អ្វីដែលនឹងអាចក្លាយទៅជាកំពង់ផែយោធាមួយនៅកោះខាងជើង ។ យោងតាមរ៉យទ័រថា ការងារសាងសង់ទីតាំងថ្មីនោះសង្ស័យផ្អាកដោយសារព្យុះទីហ្វុងមួយកាលពីឆ្នាំទៅមិញ ។
ទោះបីមានភស្តុតាងមកពីបណ្តារូបភាពផ្កាយរណបក្តីក៏ក្រសួងការពារជាតិចិនប្រកាសថាខ្លួនពុំបានដឹងពីការងារសាងសង់លើកោះខាងជើងនោះឡើយ ។ ក្រោយពីកាសែត TAIPEI TIMES ស្នើឱ្យមានអត្ថាធិប្បាយពីរឿងនោះក្រសួងការពារជាតិចិនគូសបញ្ជាក់ថា អ្វីដែលត្រូវគូសបញ្ជាក់គឺថាប្រជុំកោះស៊ីសា(ប៉ារ៉ាសែល) ជាផ្នែកមួយនៃដែនដីចិន ។
កោះខាងជើងជាកោះតូចមួយក្នុងចំណោមកោះតូចៗជាច្រើនក្នុងប្រជុំកោះប៉ារ៉ាសែល ក្នុងសមុទ្រចិនខាងត្បូងដែលចិនកំពុងមានជម្លោះដែនដីជាមួយប្រទេសជិតខាងច្រើនទៀត ។
យោងតាមពួកអ្នកជំនាញការថា ការត្រួតត្រាប្រជុំកោះប៉ារ៉ាសែលជាកត្តាគន្លឹះមួយនៃការក្តោបសមុទ្រចិនខាងត្បូងរបស់ក្រុងប៉េកាំងជាតំបន់សមុទ្រដែលការផ្លាស់ប្តូរពាណិជ្ជកម្មឆ្លងកាត់ទីនោះមានទឹកប្រាក់ជាច្រើនពាន់លានដុល្លារក្នុងមួយឆ្នាំៗ ។
លោក CARL THAYER អ្នកជំនាញការម្នាក់ពីសមុទ្រចិនខាងត្បូងនៃបណ្ឌិតសភាកងទ័ពអូស្ត្រាលីពន្យល់ថា ប្រជុំកោះប៉ារ៉ាសែលនឹងជាបញ្ហាសំខាន់ប្រឈមមុខនឹងការប៉ុនប៉ងនាពេលអនាគតរបស់ចិនក្តោមយកសមុទ្រចិនខាងត្បូង។ យើងអាចមើលឃើញថាចិនបន្តនយោបាយយោធូបនីយកម្ម ទោះបីមានវោហោសាស្ត្រផ្លូវការថាចិនកំពុងឈានធ្វើបែបនោះមួយដុំម្តងៗក្តី ។
កាលពីដំណាច់ខែកុម្ភៈ បណ្តារូបភាពផ្កាយរណបទទួលបានដោយរ៉យទ័រនិងដោយមជ្ឈមណ្ឌលសិក្សាយុទ្ធសាស្ត្រនិងអន្តរជាតិ CSIS បង្ហាញថាក្រុងប៉េកាំងអាចដាក់ពង្រាយលើប្រជុំក្រោះស្យា៉តលី SPRATLEYS តំបន់សមុទ្រចិនខាងត្បូងដែរ បណ្តាប្រព័ន្ធមីស៊ីលការពារអាកាស HG-9 ។ រូបភាពផ្កាយរណបថ្មីៗត្រូវបានចេញផ្សាយមុនទស្សនកិច្ចនៅអាស៊ីរបស់លោក TILLERSON រដ្ឋមន្ត្រីការបរទេសអាមេរិកមកកាន់ចិន ជប៉ុន និងកូរ៉េខាងត្បូង ។
សហរដ្ឋអាមេរិកបានប្រឆាំងចំពោះផលប្រយោជន៍របស់ចិននៅតំបន់នោះ ហើយរដ្ឋការលោកដូណាល់ ត្រាំ ពុំផ្លាស់ប្តូរជំហរនោះរបស់ខ្លួនឡើយ ។ រួចប្រមុខការទូតអាមេរិកលោក TILLERSON ប្រកាសកាលពីខែមករាថា ការចូលរបស់ចិនទៅកាន់បណ្តាកោះមានជម្លោះនៅសមុទ្រចិនខាងត្បូងពុំអនុញ្ញាតឡើយ ។
ចំណែករដ្ឋាភិបាលចិនវិញនោះអះអាងថា ប្រជុំកោះប៉ារ៉ាសែល ឬស៊ីសា ជាភាសាចិន ជាផ្នែកមួយនៃដែនដីចិន ។ ក្រុងប៉េកាំងត្រួតត្រាប្រជុំកោះនោះកាលពីឆ្នាំ១៩៧៤ ក្រោយការប៉ះទង្គិចគ្នារយៈពេលខ្លីមួយជាមួយកងម៉ារីនវៀតណាមខាងត្បូង ។ ប្រទេសវៀតណាមទាមទារប្រជុំកោះនេះក៏ដូចជាអាជ្ញាធរតៃវ៉ាន់ដែរ ៕
ចែករំលែកព័តមាននេះ