រាជធានីភ្នំពេញ ៖ រថយន្តម៉ាកហ៊ីយ៉ាន់ដាយដឹកក្រដាស់កាតុង១គ្រឿង របស់រោងចក្រ «ហាតា» បានបើកបរបោះពួយក្នុងល្បឿនយ៉ាងលឿង ហើយបានរេចង្កូតទៅខាងឆ្វេងដៃជ្រុលទៅបុករះ
រាជធានីភ្នំពេញ ៖ រថយន្តម៉ាកហ៊ីយ៉ាន់ដាយដឹកក្រដាស់កាតុង១គ្រឿង របស់រោងចក្រ «ហាតា» បានបើកបរបោះពួយក្នុងល្បឿនយ៉ាងលឿង ហើយបានរេចង្កូតទៅខាងឆ្វេងដៃជ្រុលទៅបុករះម៉ូតូសណ្ដោងរ៉ឺម៉ក១គ្រឿង ដែលកំពុងចតនៅស្ងៀមនៅមុខផ្ទះលក់ឥវ៉ាន់ចាប់ហួយមួយកន្លែង បណ្ដាលឲ្យរងការខូចខាតយ៉ាងដំណំ។ ប៉ុន្តែមិនបានបណ្ដាលឲ្យ អ្នកបើកបរម៉ូតូសណ្ដោងរ៉ឺម៉កនោះមានគ្រោះថ្នាក់នោះឡើយ បន្ទាប់មករថយន្តបង្កនេះ នៅតែមិនព្រមឈប់ស្ងៀមទៀត ក៏ជ្រុលបន្តទៅបុកនារីកម្មការិនីរោងចក្រម្នាក់ ដែលកំពុងឈរនៅតាមចិញ្ចើមផ្លូវរុញផ្ទប់ជាមួយបង្គោលភ្លើង១ដើម ដែលស្ថិតនៅក្បែរនោះទៀត។ បណ្ដាលឲ្យនាងរងរបួសដាច់ជើងម្ខាងត្រឹមភ្លៅ និងបាក់ដៃឆ្វេងដេកសន្លប់ស្ដូកស្ដឹងនៅនឹងមុខរថយន្តបង្កនោះតែម្តង។ ភ្លាមៗនោះអ្នកបើកបររថយន្តបង្កប្រុងរត់គេចខ្លួន ប៉ុន្តែត្រូវបានប្រជាពលរដ្ឋឃាត់ខ្លួនបាន និងនាំទៅប្រគល់ឲ្យនគរបាលប៉ុស្ដិ៍កន្ទោក។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១និង២០នាទីព្រឹក ថ្ងៃទី២៦ ខែមីនា ឆ្នាំ២០១៧ នៅលើកំណាត់ផ្លូវបេតុង ស្ថិតនៅក្នុងភូមិគល់ សង្កាត់កន្ទោក ខណ្ឌពោធិ៍សែនជ័យ។
រថយន្តបង្កនោះម៉ាកហ៊ីយាន់ដាយ ពណ៌ស ពាក់ស្លាកលេខ ភ្នំពេញ 3C-5550 ចំណុះ៥តោន ជារថយន្តដឹកក្រដាសកាតុងរបស់ក្រុមហ៊ុនកាត់ដេរ « ហាតា» បើកបរដោយឈ្មោះ ផន សុផល អាយុ៣០ឆ្នាំ មុខរបរបើករថយន្តឲ្យក្រុមហ៊ុនខាងលើ ស្នាក់នៅផ្ទះជួល ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅភូមិត្រពាំងអារក្ស ខណ្ឌពោធិ៍សែនជ័យ។
ដោយឡែកនារីរងគ្រោះឈ្មោះ ធន ណយ អាយុ២១ឆ្នាំ មុខរបរកម្មកររោងចក្រ យីហោ «ស៊ូមិ» នៅក្នុងតំបន់សេដ្ឋកិច្ចពិសេសភ្នំពេញ ស្នាក់នៅផ្ទះជួលភូមិកើតហេតុខាងលើ និងមានស្រុកកំណើតភូមិអណ្តូងត្រាច ឃុំកំពង់ព្រះ ស្រុកសង្កែ ខេត្តបាត់ដំបង។ ចំណែកម៉ូតូសណ្ដោងរ៉ឺម៉កដែលត្រូវរថយន្តបុក បណ្ដាលឲ្យរងការខូចខាតដែរនោះ ម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ 1CY-0276 អ្នកបើបរមិនស្គាល់ឈ្មោះឡើយ។
ប្រជាពលរដ្ឋបានឲ្យដឹងថា នៅមុនពេលកើតហេតុ ពួកគាត់បានឃើញរថយន្តបង្កនោះបើកបរក្នុងល្បឿនយ៉ាងលឿន ធ្វើដំណើរក្នុងទិសដៅពីត្បូងទៅជើង ហើយមានសភាពរេចុះឡើងៗ ដែលមិនដឹងថា មានបញ្ហាអ្វីនោះឡើយ។ លុះពេលទៅដល់ត្រង់ចំណុចកើតហេតុខាងលើ ស្រាប់តែរេចង្កូតទៅខាងឆ្វេងដៃ និងបានបុករះម៉ូតូសណ្ដោងរ៉ឺម៉ក១គ្រឿង ដែលម្ចាស់ចតទុកចោលនៅលើចិញ្ចើមផ្លូវបេតុងខាងលើមុខកន្លែងលក់ចាប់ហួយពេញទំហឹង បណ្ដាលឲ្យម៉ូតូសណ្ដោងរ៉ឺម៉កនោះខូចខាតយ៉ាងដំណំ បន្ទាប់មករថយន្តបង្កនោះបានជ្រុលទៅបុកស្ត្រីរងគ្រោះដែលកំពុងឈរជិតបង្គោលភ្លើង១ដើម រង់ចាំឆ្លងផ្លូវទៅទិញម្ហូបហូបបាយថ្ងៃត្រង់យ៉ាងពេញទំហឹងទៀត និងបានរុញផ្ទប់បង្គោលនោះ បណ្ដាលឲ្យនាងរងគ្រោះដាច់ជើងម្ខាងខាងស្តាំត្រឹមភ្លៅ និងបាក់ដៃឆ្វេងម្ខាងផងដែរ ព្រមទាំងបណ្ដាលឲ្យបាក់បង្គោលនោះដួលសង្កត់ជាប់ក្បាលរថយន្តនោះតែម្តង ។ មិនតែប៉ុណ្ណោះរថយន្តខាងលើក៏បានរងការខូចខាតក្រពឹតរួញមុខ និងបានបង្កឲ្យខូចខាតសំយ៉ាបផ្ទះមួយខ្នងដែលនៅជាប់បង្គោលភ្លើងនោះថែមទៀតផង។
ប្រភពដដែលបានបន្តថា ក្រោយពេលកើតហេតុកម្មការិនីរងគ្រោះត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរ ហើយខណៈនោះចាត់ទុកជាសំណាងផងដែរ ដែលមានប្រអប់ត្រង់ហ្វូ និងកាប៊ីនភ្លើងនៅជាប់នោះជាច្រើន ប៉ុន្តែមិនបណ្ដាលឲ្យទុស្សេចរន្តភ្លើង ដែលជាហេតុបង្កឲ្យមានការឆាបឆេះនោះទេ ប្រសិនបើទុស្សេវិញ ប្រាកដជាត្រូវឆាបឆេះពលរដ្ឋ និងមានមហន្តរាយកើតឡើងធំជាក់ជាមិនខានឡើយ។
បន្ទាប់ពីបើកបុករះច្រើនតង់បែបនេះ ទើបរថយន្តបង្កនោះឈប់ស្ងៀម ហើយអ្នកបើកបរត្រូវបានប្រជាពលរដ្ឋឃាត់ខ្លួនបាន រួចប្រគល់ទៅឲ្យនគរបាលប៉ុស្ដិ៍កន្ទោក សាកសួរមួយជំហាន ក្រោយមកក៏បានបញ្ជូនបន្តទៅកាន់ការិយាល័យនគរបាលចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ