ស្រវឹងស្រាបើកឡានលឿនទៅបុកគល់ត្នោតក្រឡាប់ស្លា.ប់
ខេត្តពោធិ៍សាត់ ៖ រថយន្ដកូរ៉ូឡាមួយគ្រឿងធ្វើដំណើរក្នុងល្បឿនលឿនរហូតធ្លាក់ចេញពីផ្លូវទៅបុកគល់ត្នោត
ខេត្តពោធិ៍សាត់ ៖ រថយន្ដកូរ៉ូឡាមួយគ្រឿងធ្វើដំណើរក្នុងល្បឿនលឿនរហូតធ្លាក់ចេញពីផ្លូវទៅបុកគល់ត្នោត បណ្ដាលឲ្យក្រឡាប់ពីរបីត្រឡប់ស្លាប់ម្នាក់ និងរបួសធ្ងន់ស្រាលពីរនាក់ ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង16ល្ងាចថ្ងៃទី25 ខែមីនា ឆ្នាំ2017 នៅលើកំណាត់ផ្លូវគ្រួសក្រហមមួយខ្សែស្ថិតក្នុង ភូមិព្រៃកន្លង់ ឃុំផ្ទះរុង ស្រុកភ្នំក្រវាញ ។
សមត្ថកិច្ចឲ្យដឹងថា ជនរងគ្រោះទី1-ឈ្មោះ កាន រ៉ា ភេទប្រុស អាយុ24ឆ្នាំ ជាអ្នកបើកបរ(ស្លាប់) ទី2-ឈ្មោះ កាន កេន ភេទប្រុស អាយុ32ឆ្នាំ អ្នករួមដំណើរ(របួសធ្ងន់) និងទី3-ឈ្មោះ គយ អៀងភេទប្រុស អាយុ22ឆ្នាំ អ្នករួមដំណើរ(របួសស្រាល) ទាំង3នាក់រស់នៅភូមិព្រៃកន្លង់ ឃុំផ្ទះរុង ស្រុកភ្នំក្រវាញ ។
ប្រភពព័ត៌មានពីកន្លែងកើតហេតុឲ្យដឹងថា នៅល្ងាចនោះជនរងគ្រោះទាំង3នាក់ស្រវឹងស្រាបើករថយន្ដម៉ាកកូរ៉ូឡា ពណ៌ទឹកប៊ិច ពាក់ស្លាកលេខ ភ្នំពេញ 2D-7871 ក្នុងល្បឿនលឿនលើផ្លូវគ្រួសក្រហមទៅដល់ចំណុចកើតហេតុមិនដឹងជាយ៉ាងម៉េចស្រាប់តែរេចង្កូតធ្លាក់ផ្លូវទៅបុកគល់ត្នោតយ៉ាងពេញទំហឹងក្រឡាប់ពីរបីត្រឡប់ធ្លាក់ចូលស្រែបណ្ដាលឲ្យស្លាប់ និងរបួសទាំងបីនាក់បែបនេះតែម្ដង ។ រថយន្ដត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋបាលផ្ទះរុង ចំណែកជនរងគ្រោះបញ្ជូនទៅសង្គ្រោះនៅមន្ទីរពេទ្យបង្អែកខេត្ត ៕
ចែករំលែកព័តមាននេះ