ម្ចាស់ខ្សែក្រវាត់ ឡុង ជិន ប្រាប់មូលហេតុដាច់ចិត្តដើរចេញពីគុនខ្មែរទៅលក់ដូងតាមរទេះ
- ភ្នំពេញ
រាជធានីភ្នំពេញ ៖ ម្ចាស់ខ្សែក្រវាត់ ខារ៉ាបាវឡុង ជិន ត្រូវបានគេឃើញដើរលក់ដូងតាមរទេះ បន្ទាប់ពី
រាជធានីភ្នំពេញ ៖ ម្ចាស់ខ្សែក្រវាត់ ខារ៉ាបាវឡុង ជិន ត្រូវបានគេឃើញដើរលក់ដូងតាមរទេះ បន្ទាប់ពីមួយរយៈនេះមានរឿងអាស្រូវថា មិនគោរពវិន័យ និងបានដើរចេញពីក្លិប ដោយមិនប្រាប់ម្ចាស់ក្លិប និងគ្រូបង្វឹកឡើយ ។ សម្រាប់កីឡាករ ឡុង ជិន ក៏បានចេញមុខប្រាប់ពីមូលហេតុដែលរូបគេសុខចិត្តដើរចេញពីគុនខ្មែរទៅលក់ដូងចិញ្ចឹមកូន។
ជុំវិញបញ្ហាកីឡាករ ឡុង ជិន ខាងលើនេះត្រូវលោក Ricky ដែលជាគ្រូបង្វឹក ធ្លាប់បានបង្ហើបថា អាចបណ្តាលមកពីការកាត់ភាគរយនៃប្រាក់ចំណូលពីការប្រកួតម្តងរួចមកហើយ ។ ទើបតែនៅពេលនេះកីឡាករជើងខ្លាំង ឡុង ជិន បានប្រាប់អ្នកសារព័ត៌មានបន្ថែមថា មូលហេតុរូបគេដើរចេញពីក្លិបមិនមែនបណ្តាលមកពីបញ្ហាអន់ចិត្តនឹងរឿងកាត់ភាគរយនេះទេ ព្រោះការកាត់ភាគរយពី ១៥ ទៅ ២០ % នោះ គឺជារឿងយូរមកហើយ។ កីឡាករទើបងាកទៅប្រកបរបរលក់ដូងតាមរទេះរូបនេះបានបន្តថា ចំណែករឿងមិនសូវទៅហាត់កាលពីពេលកន្លងមក វាមានទាក់ទងនឹងរឿងផ្សេងទៀតដែលខ្លួនមិនអាចនិយាយបាន។
ស្រាប់តែថ្មីៗនេះ មានការផុសរបស់លោក Ricky ថា បើកីឡាករ ឡុង ជិន ចង់ចូលហាត់នៅក្លិប ខ្លារខិន វិញ ត្រូវពិន័យទឹកប្រាក់៥០០ដុល្លារ ពីបទមិនគោរពវិន័យ និងការមិនគោរពគ្រូបង្វឹក ព្រមទាំងមិនគោរពម្ចាស់ក្លិបជាដើម ។ ជាការឆ្លើយតបទៅវិញ ម្ចាស់ខ្សែក្រវាត់ ខារ៉ាបាវ ឡុង ជិន ក៏បានឲ្យដឹងដែរថា « ដំបូងខ្ញុំថា ទៅហាត់វិញដែរ តែពេលខ្ញុំឃើញគាត់ផុសអ៊ីចឹងទៅខ្ញុំអន់ចិត្ត ព្រោះអីខ្ញុំខ្មាសគេណាស់ ទៅណាមកណាឮគេនិយាយពីខ្ញុំថាបែបនេះបែបនោះរហូត ។ ទើបខ្ញុំសម្រេចថា ដើរចេញពីប្រដាល់តែម្ដងទៅបង ហើយតាមពិតទៅអារឿងវ៉ៃ ខ្ញុំនៅតែចង់វ៉ៃហ្នឹង ព្រោះអីខ្ញុំនៅស្រលាញ់ ហើយណាមួយដើរលក់ដូងហូបមិនគ្រប់ទេបង មួយថ្ងៃបាន២-៣ ម៉ឺនហ្នឹង»។
កីឡាករដដែលបន្ថែមថា ពេលនេះខ្លួនត្រូវសម្រាកពីប្រដាល់មួយរយៈសិន ដើម្បីឲ្យរឿងវាស្ងប់ស្ងាត់បន្តិចសិន ហើយនឹងត្រឡប់ចូលសង្វៀនវិញនាថ្ងៃណាមួយ។ ជាមួយគ្នានោះពេលអ្នកយកព័ត៌មានសួរថាទៅសុំទោសគ្រូ និងម្ចាស់ក្លិប ដើម្បីចូលក្លិប ខ្លារខិន វិញ ឬយ៉ាងណា? ឡុង ជិន បានឆ្លើយយ៉ាងខ្លីថា មិនទាន់ដឹងទេចំណុចនេះ។
គួររំលឹកថា សម្រាប់ការមិនសូវហ្វឹកហាត់ពេញលេញរបស់ ឡុង ជិន ត្រូវលោក Ricky ធ្លាប់បានទម្លាយច្រើនដងរួចមកហើយថា សិស្សរបស់ខ្លួនរូបនេះមិនសូវគោរពច្បាប់ហ្វឹកហាត់ឡើយ ពេលខ្លះហាត់បាន២ ឬ៣ថ្ងៃប៉ុណ្ណោះមុនពេលឡើងប្រកួត ប៉ុន្តែចំណុចនេះសម្រាប់សាមីខ្លួនផ្ទាល់បានលើកហេតុ ផលថា ចំណុចនេះខ្លួនពិតជាទទួលស្គាល់ តែគេបានបកស្រាយថា រវល់ទៅជួសជុលផ្ទះដែលខ្យល់បក់រលំ និងមើលថែប្រពន្ធមានទម្ងន់ ៕
ចែករំលែកព័តមាននេះ