តុលាការកំពូលលើកពេល ប្រកាសសាលដីកាសំណុំរឿង លោក នី ចរិយា សុំនៅក្រៅឃុំ
រាជធានីភ្នំពេញ ៖ ចៅក្រមតុលាការកំពូលនាព្រឹកថ្ងៃទី២៤ ខែមីនា បានបើកសវនាការលើបណ្តឹងសុំនៅក្រៅឃុំរបស់លោក នី ចរិយា
រាជធានីភ្នំពេញ ៖ ចៅក្រមតុលាការកំពូលនាព្រឹកថ្ងៃទី២៤ ខែមីនា បានបើកសវនាការលើបណ្តឹងសុំនៅក្រៅឃុំរបស់លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត(គ.ជ.ប) បន្ទាប់ពីលោកត្រូវបានឃាត់ខ្លួននៅថ្ងៃទី២៨ ខែមេសា ឆ្នាំ២០១៦ ក្រោមបទចោទប្រកាន់ថា សមគំនិតសូកប៉ាន់សាក្សី កាលពីខែមេសា ឆ្នាំ២០១៦ ។ ប៉ុន្តែសវនាការនេះ ត្រូវបានលើកពេលប្រកាសសាលដីកាទៅធ្វើនៅថ្ងៃទី៣១ ខែមីនាខាងមុខ ។
នៅព្រឹកថ្ងៃទី២៤ ខែមីនា មន្ត្រីពន្ធនាគារប៉េហ្ស៊ី បាននាំខ្លួនលោក នី ចរិយា មកកាន់បន្ទប់សវនាការនៃតុលាការកំពូល ខណៈកម្លាំងសមត្ថកិច្ចត្រូវបានដាក់ពង្រាយរារាំងមិនឲ្យថតរូបជនជាប់ចោទនៅក្នុងបរិវេណតុលាការ ដែលខុសពីលើកមុខៗ ។ នេះជាបទបញ្ជាថ្មីមួយ ដែលសិទ្ធិអ្នកកាសែតត្រូវបានខិតរួមកាន់តែចង្អៀត ។
លោក សំ សុគង់ មេធាវីការពារក្ដីឲ្យលោក នី ចរិយា បានថ្លែងប្រាប់អ្នកសារព័ត៌មានកាលពីព្រឹកថ្ងៃទី២១ ខែមីនាថា តុលាការកំពូលជំនុំជម្រះបណ្ដឹងសុំនៅក្រៅឃុំរបស់លោក នី ចរិយា នៅព្រឹកថ្ងៃទី២៤ មីនា ។ ក្រោយការបដិសេធជាបន្តបន្ទាប់ លោក នី ចរិយា នៅតែបន្តសុំឲ្យតុលាការកំពូលដោះលែងរូបលោកឲ្យបាននៅក្រៅឃុំ ។
តុលាការកំពូលបានបង្ហាញថា លោក នី ចរិយា ជាប់ចោទពីបទសមគំនិតក្នុងអំពើសូកប៉ាន់សាក្សី ប្រព្រឹត្តនៅរាជធានីភ្នំពេញ កាលពីអំឡុងខែមេសា ឆ្នាំ២០១៦ យោងតាមមាត្រា២៩និងមាត្រា៥៤៨ នៃក្រមព្រហ្មទណ្ឌ ។
ក្រៅពីពាក់ព័ន្ធនឹងសំណុំរឿងនាងស្រីមុំនេះលោក នី ចរិយា ត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ១ឆ្នាំ៦ខែ ដោយបទចោទថាបានធ្វើអត្ថាធិប្បាយប៉ះពាល់ដល់យុត្តាធិការតុលាការ។ ដើមបណ្តឹងជាក្រុមចៅក្រមនិងព្រះរាជអាជ្ញាអមសាលាដំបូងខេត្តសៀមរាប។
គួរបញ្ជាក់ថា ក្នុងសំណុំរឿងសូកប៉ាន់សាក្សីនិងសមគំនិតសូកប៉ាន់សាក្សី មានជនត្រូវចោទ៥នាក់ ត្រូវបានតុលាការប្រកាសថាបានបញ្ចុះបញ្ចូល ឬលួងលោមនាង ខុម ចាន់តារាទី ហៅស្រីមុំ មិនឲ្យនិយាយការពិតដល់សមត្ថកិច្ចចំពោះរឿងអាស្រូវផ្លូវភេទរបស់លោក កឹម សុខា បច្ចុប្បន្នប្រធានគណបក្សសង្គ្រោះជាតិ ។ ចំណែកលោក នី ចរិយា ត្រូវបានសាលាឧទ្ធរណ៍បដិសេធការសុំនៅក្រៅឃុំរបស់លោកម្តងរួចមកហើយ ក្នុងបទសមគំនិតសួកប៉ាន់សាក្សី ។
លោក នី ចរិយា ត្រូវបានអង្គភាពប្រឆាំងអំពើពុករលួយ ឃាត់ខ្លួនកាលពីថ្ងៃទី២៨ ខែមេសា ឆ្នាំ២០១៦ ជាមួយនឹងបុគ្គលិកអាដហុកចំនួន៤នាក់ទៀតគឺ លោក ណៃ វ៉ង់ដា លោក នី សុខា លោក យី សុខសាន្ត និង លោកស្រី លឹម មុន្នី។ នៅថ្ងៃទី២ ខែឧសភា ឆ្នាំ២០១៦ តុលាការបានចោទប្រកាន់លោកពីបទសមគំនិតសូកប៉ាន់សាក្សី តែលោកបានបដិសេធការចោទប្រកាន់នេះ ៕
ចែករំលែកព័តមាននេះ