កាលពីថ្ងៃទី២៣ មីនា វេលាម៉ោង១១និង២៥នាទីម៉ោងក្នុងស្រុក អតីតសមាជិកសភារុស្ស៊ីលោកដឺនីស វ៉ូរ៉ូ ណេនកូវ ត្រូវគេបាញ់សម្លាប់នៅមុខសណ្ឋាគារមួយនាកណ្តាលទីក្រុងគៀវ ពេលលោកចាកចេញពីសណ្ឋាគារនេះ
កាលពីថ្ងៃទី២៣ មីនា វេលាម៉ោង១១និង២៥នាទីម៉ោងក្នុងស្រុក អតីតសមាជិកសភារុស្ស៊ីលោកដឺនីស វ៉ូរ៉ូ ណេនកូវ ត្រូវគេបាញ់សម្លាប់នៅមុខសណ្ឋាគារមួយនាកណ្តាលទីក្រុងគៀវ ពេលលោកចាកចេញពីសណ្ឋាគារនេះជាមួយអង្គរក្សរបស់លោក ។ អង្គរក្សរងរបួសបានបាញ់តតាំងអ្នកវាយប្រហារបណ្តាលឱ្យជននេះរងរបួសធ្ងន់ ។
ខ្មាន់កាំភ្លើងត្រូវបញ្ជូនទៅមន្ទីរពេទ្យ ហើយស្លាប់នាវេលារសៀល ។
ជាសមាជិកសភានៃគណបក្សកុំមុយនីស្តរុស្ស៊ីរវាងឆ្នាំ២០១១ និង២០១៦ លោកដឺនីស វ៉ូរ៉ូ ណេនកូវ អាយុ៤៥ឆ្នាំ បានរត់ភៀសខ្លួនចេញពីក្រុងមូស្គូ ជាមួយភរិយាលោក គឺលោកស្រីម៉ារីយ៉ា ម៉ាក់សាកូវ៉ា ជាសមាជិកាសភានៃគណបក្សរុស្ស៊ីរួបរួម ក្រោយពីចាញ់ឆ្នោតក្នុងការបោះឆ្នោតសភាកាលពីឆ្នាំ២០១៦ ។ រស់នៅក្នុងទីក្រុងគៀវ អ្នកទាំង២ទទួលបានសញ្ជាតិអ៊ុយក្រែន ។ ចាប់តាំងពីរត់ចោលជួរមក លោកវ៉ូរ៉ូ ណេនកូវ បានរួមសហការជាមួយអាជ្ញាធរអ៊ុយក្រែន ។
តាមពិតទៅ លោកវ៉ូរ៉ូណេនកូវ និងភរិយាជាមនុស្សស្និទ្ធវិមានក្រឹមឡាំងបំផុត តែពេលរត់ភៀសខ្លួនមកកាន់អ៊ុយក្រែន លោកវ៉ូរ៉ូណេនកូវ បែរជាបកអាក្រាតក្រុងម៉ូស្គូធ្វើជាសាក្សីនៃរឿងក្បត់របស់អតីតប្រធានាធិបតីអ៊ុយក្រែនលោកអុីយ៉ានូកូវីត ត្រូវបណ្តេញចេញពីអំណាចកាលពីឆ្នាំ២០១៤ថា ជាអាយ៉ងរបស់ក្រុងម៉ូស្គូទៅវិញ ។
តាមពិតទៅឈ្មោះរបស់លោករយៈពេលប៉ុន្មានឆ្នាំចុងក្រោយនេះ មានរឿងចោទប្រកាន់ពីបទពុករលួយ ។ លោកអាចគេចខ្លួនពីការកាត់ទោសរបស់តុលាការពីរឿងពុករលួយ។ មានយោបល់ជាច្រើនថា លោករត់គេចខ្លួនក៏ព្រោះតែចង់គេចចេញពីកាត់ទោសលោកពេលបាត់បង់អភ័យឯកសិទ្ធិសភា ។ កាលពីពាក់កណ្តាលខែកុម្ភៈ គណៈកម្មាធិការស៊ើបអង្កេតរុស្ស៊ីបានចេញដីកាចាប់ខ្លួនលោក ហើយស្នើឱ្យប៉ូលិសអន្តរជាតិ INTERPOL ជួយតាមរក ។
ក្រុងគៀវបានចោទប្រកាន់ក្រុងមូស្គូថា ជាអ្នកនៅពីក្រោយការធ្វើឃាតលោកវ៉ូរ៉ូណេនកូវ ៕
ចែករំលែកព័តមាននេះ