តារាសម្តែង ពេជ្រ អាលីហ្សា ចេញពីក្លិបកម្សាន្តជួបរឿង…
រាជធានីភ្នំពេញ ៖ តារាសម្តែងរូបស្រស់ ពេជ្រ អាលីហ្សា ចេញពីពិធីជប់លៀងមិត្តភក្កិនៅក្លឹបកម្សាន្ត 55 បើករថយន្តបុក
រាជធានីភ្នំពេញ ៖ តារាសម្តែងរូបស្រស់ ពេជ្រ អាលីហ្សា ចេញពីពិធីជប់លៀងមិត្តភក្កិនៅក្លឹបកម្សាន្ត 55 បើករថយន្តបុកម៉ូតូមួយគ្រឿងរងរបួសធ្ងន់២នាក់ ហេតុការណ៍នេះបានកើតឡើងកាលពីវេលាម៉ោង២និង១០នាទីរំលងអធ្រាត្រ ឈានចូលថ្ងៃទី២៤ ខែមីនា ឆ្នាំ២០១៧តាមបណ្តោយផ្លូវសុធារស នៅមុខសាកលវិទ្យាល័យបៀរប្រាយ ស្ថិតនៅក្នុងសង្កាត់ទន្លេបាសាក់ ខណ្ឌចំការមន។ អ្នកបើករថយន្តបង្កម៉ាកឡិចស៊ីស GS300 មានឈ្មោះ ពេជ្រ អាលីហ្សា ភេទស្រី អាយុ២៥ឆ្នាំ ជាតារាសម្តែង ស្នាក់នៅសង្កាត់មិត្តភាព ខណ្ឌ៧មករា ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញបុរស២នាក់ជិះម៉ូតូមួយគ្រឿងម៉ាក Today ពណ៌ទឹកសមុទ្រលាយស ពាក់ស្លាកលេខ ភ្នំពេញ 2FL-3864 ធ្វើដំណើរតាមបណ្តោយផ្លូវសុធារស ក្នុងទិសដៅពីត្បូងទៅជើង ខណៈពេលមកដល់ចំណុចកើតហេតុក៏ស្រាប់តែមានរថយន្តមួយគ្រឿងម៉ាកឡិចស៊ីស GS300 ពណ៌ខ្មៅ ពាក់ស្លាកលេខភ្នំពេញ 2R-2141 ធ្វើដំណើរតាមបណ្តោយផ្លូវសុធារសទិសដៅពីជើងទៅត្បូងក្នុងល្បឿនលឿនបានរេចង្កូតជ្រុលទៅបុកម៉ូតូចំពីមុខពេញទំហឹងបណ្តាលឱ្យរងរបួសធ្ងន់២នាក់ ចំណែកឯម៉ូតូខូចខាតខ្ទេចអស់ទាំងស្រុង រីឯរថយន្តបង្កវិញខ្ទេចមួយជំហៀងខាងឆ្វេង ។
បើតាមសំដីរបស់នារីតារាសម្តែងជាអ្នកបើករថយន្តបង្កបានបកស្រាយថា រូបគាត់ទើបតែចេញមកពីកម្មពីធីជប់លៀងមិត្តភក្តិនៅឯក្លឹបកម្សាន្តមួយកន្លែងក្នុងសង្កាត់ចតុមុខ ខណ្ឌដូនពេញ លុះពេលចេញពីកម្មពិធីហើយបានបើករថយន្តត្រឡប់ទៅផ្ទះវិញមកដល់ចំណុចកើតហេតុស្រាប់តែម៉ូតូTodayជិះដោយប្រុស២នាក់ក្នុងស្ថានភាពស្រវឹងស្រាបើករេពេញតែផ្លូវ ហើយរេចង្កូតចូលទៅបុករថយន្តរបស់គាត់ចំពីមុខពេញទំហឹងបណ្តាលឱ្យរងរបួសធ្ងន់ទាំង២នាក់តែម្តង ។
ក្រោយពេលកើតហេតុរថយន្តសង្គ្រោះបានមកដល់ដឹកយកជនរងគ្រោះទាំង២នាក់យកទៅព្យាបាលនៅគ្លីនិកហុងហាក់ ។ ចំណែកអ្នកបើករថយន្តបង្កបន្ទាប់ពីកើតហេតុមានមិត្តភក្កិបើករថយន្តហាយឡែនឌ័រមកដល់កន្លែងកើតហេតុសុំធានាយកអ្នកបើកបរត្រឡប់ទៅផ្ទះ វិញ ប៉ុន្តែសមត្ថកិច្ចមិនព្រមបានឃាត់យកទៅកាន់ប៉ុស្តិ៍នគរបាលទន្លេបាសាក់ដើម្បីប្រគល់ឲ្យនគរបាលចរាចរណ៍ផ្លូវគោកយកទៅរក្សាទុកនៅការិយាល័យចរាចរណ៍ជើងគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ