នៅតាមដងផ្លូវនានានៅជុំវិញផ្សារសាមគ្គី ក្នុងសង្កាត់ផ្សារដើប៉ូទី៣ ខណ្ឌទួលគោក កំពុងក្លាយជាកន្លែងលក់ដូរ និងឈប់ចតម៉ូតូ រថយន្ត យ៉ាងអនាធិបតេយ្យបង្កអោយបាត់បង់
រាជធានីភ្នំពេញ ៖ នៅតាមដងផ្លូវនានានៅជុំវិញផ្សារសាមគ្គី ក្នុងសង្កាត់ផ្សារដើប៉ូទី៣ ខណ្ឌទួលគោក កំពុងក្លាយជាកន្លែងលក់ដូរ និងឈប់ចតម៉ូតូ រថយន្ត យ៉ាងអនាធិបតេយ្យបង្កអោយបាត់បង់សណ្តាប់ធ្នាប់សាធារណៈ និងសោភណ្ឌភាពរាជធានីភ្នំពេញ ហើយពុំត្រូវបានអាជ្ញាធរ ក៏ដូចជាប្រធានគណៈកម្មាការផ្សារយកចិត្តទុកដាក់ចុះរៀបចំសណ្តាប់ធ្នាប់ឡើយ គិតតែពីដើរប្រមូលលុយ។
តាមព័ត៌មានអោយដឹងថា ជារៀងរាលថ្ងៃនៅជុំវិញផ្សារនេះ បានបង្កអោយកកស្ទះចរាចរណ៍ផងដែរ ដោយសារតែយកដងផ្លូវធ្វើជាកន្លែងផ្ញើរម៉ូតូ និងចតរថយន្ត និងឈប់កង់ ម៉ូតូលក់ដូរលើដងផ្លូវ។
តាមប្រជាពលរដ្ឋដែលធ្វើដំណើរឆ្លងកាត់បានអោយដឹងថា នៅតាមផ្លូវលេខ១២២ ខាងត្បូងផ្សារសាមគ្គី បានក្លាយទៅជាកន្លែងផ្ញើរកង់ម៉ូតូដ៏ធំមួយ និងជាលក់ដូរហៀរមកលើទ្រូងផ្លូវបង្កអោយបាត់បង់សណ្តាប់ធ្នាប់ ជាហេតុធ្វើអោយយានយន្តមានការលំបាកក្នុងការធ្វើដំណើរ។ ដោយឡែកចំណែកខាងជើងផ្សារវិញ នៅតាមបណ្តោយផ្លូវលេខ១១៨ បានក្លាយជាកន្លែងលក់ដូរលើទ្រូងផ្លូវតែម្តង បង្កអោយកកស្ទះចរាចរណ៍ដោយរថយន្តពុំអាចធ្វើដំណើរឆ្លងកាត់បាននោះទេ។
ទន្ទឹមនឹងការលក់ដូរលើដងផ្លូវនេះ ត្រូវបានគេចោទប្រកាន់ថា ឃើញតែក្រុមសន្តិសុខផ្សារ (សណ្តាប់ធ្នាប់) បានដើរប្រមូលប្រាក់ពីអាជីវករតែប៉ុណ្ណោះ។ នៅថ្ងៃខ្លះ គេក៏ឃើញសណ្តាប់ធ្នាប់បានចុះទៅរៀបចំដែរ រួចហើយក៏បានបណ្តែតបណ្តោយអោយអាជីវករលក់ដូរវិញ។
គេនិយាយថា បើសិនមិនអោយអាជីវករចល័តតូចតាចលក់ដូរ តើអោយពួកគាត់ទៅលក់នៅទីណា?។ ម្យ៉ាងទៀត ការលក់ដូរលើដងផ្លូវ ក៏ជាឆ្នាំងបាយរបស់ផ្សារ គ្រាន់បានបំណូលខ្លះ គ្រាន់ឧបត្ថម្ភសន្តិសុខដែរ?។
ចំណែកនៅខាងមុខផ្សារវិញ នៅតាមផ្លូវម៉ៅសេទុង គេសង្កេតឃើញថា បានក្លាយជាចំណតរថយន្ត និងម៉ូតូកង់បីទៅហើយ បង្កឱ្យបាត់បង់សណ្តាប់ធ្នាប់ និងសោភណ្ឌភាពរាជធានីភ្នំពេញយ៉ាងខ្លាំង។
គួរបញ្ជាក់ផងដែរថា សណ្តាប់នៅតាមដងផ្លូវ នៅតែជាបញ្ហាប្រឈមនឹងជាកង្វល់របស់អាជ្ញាធរ ដែលតែងតែគិតគូរ និងយកចិត្តទុកដាក់។ ទោះបីជាយ៉ាងណា អាជ្ញាធរ និងសមត្ថកិច្ចមួយចំនួនគិតតែពីដើរប្រមូលលុយពីអាជីវករទាំងនោះ។ នេះបើតាមការអោយដឹងពីអាជីវករលក់ដូរតាមដងផ្លូវនានាទាំងនោះ។
ទាក់ទិននឹងការបណ្តែតបណ្តោយអោយមានការលក់ដូរលើដងផ្លូវជុំវិញផ្សារសាមគ្គីនេះ កោះសន្តិភាព ក៏បានទាក់ទងទៅលោកប្រធានផ្សារសាមគ្គី ដើម្បីបំភ្លឺដែរ តែទូរស័ព្ទចូលមិនមានអ្នកលើក៕
ចែករំលែកព័តមាននេះ