បុរសម្នាក់បានផ្លោះរបងចូលលួចម៉ូតូ និងទូរស័ព្ទដៃ ហើយក៏ត្រូវបានកម្លាំងនគរបាលផ្នែកព្រហ្មទណ្ឌក្រុងសៀមរាប ដឹកនាំដោយលោកវរសេនីយ៍ទោ ដា ចំរើន អធិការនគរបាលក្រុងសៀមរាប ឃាត់ខ្លួនជនសង្ស័យម្នាក់ ពាក់ព័ន្ធនឹង
ខេត្តសៀមរាប ៖ បុរសម្នាក់បានផ្លោះរបងចូលលួចម៉ូតូ និងទូរស័ព្ទដៃ ហើយក៏ត្រូវបានកម្លាំងនគរបាលផ្នែកព្រហ្មទណ្ឌក្រុងសៀមរាប ដឹកនាំដោយលោកវរសេនីយ៍ទោ ដា ចំរើន អធិការនគរបាលក្រុងសៀមរាប ឃាត់ខ្លួនជនសង្ស័យម្នាក់ ពាក់ព័ន្ធនឹងករណីអំពើលួច (លួចម៉ូតូ និងទូរស័ព្ទ) ដែលមានស្ថានទម្ងន់ទោស និងប្រើប្រាស់ដោយខុសច្បាប់នូវសារធាតុញៀ.ន។
ហេតុការណ៍ចោរលួចម៉ូតូ និងទូរស័ព្ទខាងលើនេះ បានកើតឡើងនៅថ្ងៃទី១០ ខែតុលា ឆ្នាំ២០២២ វេលាម៉ោង២និង៣០នាទីសៀល ស្ថិតនៅភូមិសាលាកន្សែង សង្កាត់ស្វាយដង្គំ ក្រុង-ខេត្តសៀមរាប។
បើតាមប្រភពពីសមត្ថកិច្ចមូលដ្ឋានបានប្រាប់នៅថ្ងៃទី១២ ខែតុលា ឆ្នាំ២០២២នេះថា ជនសង្ស័យខាងលើមានឈ្មោះ ស៊ឹម សិលា ភេទប្រុស អាយុ២៣ឆ្នាំ មុខរបរមិនពិតប្រាកដ មានស្រុកកំណើត និងទីលំនៅបច្ចុប្បន្ននៅភូមិប្រាសាទ ឃុំសំរោងយា ស្រុកពួក ខេត្តសៀមរាប បានធ្វើសកម្មភាពផ្លោះរបងផ្ទះរបស់បុរសរងគ្រោះម្នាក់អាយុ៥៣ឆ្នាំ រស់នៅភូមិកើតហេតុ ហើយក៏ជនសង្ស័យរូបនោះក៏បានដេកនៅលើដំបូលផ្ទះតែម្តង លុះព្រឹកឡើងទើបជនសង្ស័យចុះមកដីវិញ ហើយក៏ត្រូវប្រជាពលរដ្ឋនៅក្បែរនោះឃើញទាន់ ក៏រាយកាណ៍ដល់សមត្ថកិច្ចឱ្យចុះទៅនាំខ្លួនជនសង្ស័យខាងលើយកមកសួរនាំ។
ក្រោយពីសួរនាំជនសង្ស័យបានឆ្លើយសារភាពថា នៅយប់កើតហេតុ ខ្លួនមានបំណងលួចទ្រព្យសម្បត្តិប្រជាពលរដ្ឋតាមបន្ទប់ជួល តែដោយសារងងុយពេក ក៏បានដេកលើដំបូលផ្ទះនោះតែម្តង លុះព្រឹកឡើងខ្លួនក៏បានចុះមកដីវិញ ក៏ត្រូវសមត្ថកិច្ចឃាត់ខ្លួនបាន។
ប្រភពដដែលបានបញ្ជាក់ថា ជនសង្ស័យរូបនេះ ក៏បានឆ្លើយសារភាពទៀតថា នៅថ្ងៃទី០៦ ខែតុលា ឆ្នាំ២០២២ វេលាម៉ោង៣និង៣០នាទីរសៀល ខ្លួនបានផ្លោះរបងបើកទ្វារបន្ទប់ជួល ហើយធ្វើសកម្មភាពលួចទូរស័ព្ទដៃចំនួន០១គ្រឿង ម៉ាក HUAWEI ពណ៌ខ្មៅ ដែលដាក់លើតុ រួចធ្វើសកម្មភាពចូលបន្ទប់ជួលមួយទៀតលួចយកសោរម៉ូតូ ហើយចុះមកក្រោមលួចយកម៉ូតូម៉ាក ZOOMER X ស៊េរីឆ្នាំ២០១៨ ពណ៌ក្រហមលាយស ពាក់ផ្លាកលេខ សៀមរាប១AE-៣៧៨៦ ចំនួន០១គ្រឿង រួចរត់គេចខ្លួន។ លុះដល់ថ្ងៃទី០៩ ខែតុលា ឆ្នាំ២០២២ វេលាម៉ោង១ និង០០នាទីយប់ ជនសង្ស័យបានផ្លោះរបងចូលផ្ទះខាងលើម្តងទៀត ហើយក៏បានធ្វើសកម្មភាពលួចទូរស័ព្ទម៉ាក iPad ចំនួន០១គ្រឿង រួចក៏បានលក់ទៅឲ្យបក្សពួក (គេចខ្លួន) បានប្រាក់ ចំនួន៧ម៉ឺនរៀល។
បន្ទាប់ពីបានធ្វើការឃាត់ខ្លួន ជនសង្ស័យត្រូវបានកម្លាំងនគរបាលជំនាញ ដកហូតវត្ថុតាងបានរួមមាន ៖ ម៉ូតូចំនួន០១គ្រឿង និងទូរស័ព្ទដៃចំនួន០១គ្រឿង។ បន្ទាប់ពីសាកសួរ សមត្ថកិច្ចបានធ្វើតេស្តស្វែងរកសារធាតុញៀ.នលើជនសង្ស័យ ជាលទ្ធផល គឺវិជ្ជមាន ដែលជាតម្រុយប្រើប្រាស់មេតំហ្វេតាមីន ។
បច្ចុប្បន្ន ជនសង្ស័យត្រូវបានកម្លាំងការិយាល័យនគរបាលជំនាញ រៀបចំកសាងសំណុំរឿងបញ្ជូនទៅតុលាការខេត្ត ដើម្បីចាត់ការបន្តតាមនីតិវិធីច្បាប់។ ចំណែកម៉ូតូ ត្រូវបានប្រគល់ឱ្យជនរងគ្រោះយកទៅប្រើប្រាស់វិញហើយ៕
ចែករំលែកព័តមាននេះ