ព្រះចៅអធិការវត្តអារញ្ញសាគរ សហការជាមួយអាជ្ញាធរសង្កាត់សៀមរាប សង្កាត់សាលាកំរើក សង្កាត់ជ្រាវ នៃក្រុងសៀមរាប និងសហភាពសហព័ន្ធយុវជនកម្ពុជាក្រុង ខេត្តសៀមរាប មូលមតិគ្នាជាឯកច្ឆ័ន្ទបានផ្តួចផ្តើមរៀបចំពិធីប្រណាំងទូក
ខេត្តសៀមរាប ៖ ព្រះចៅអធិការវត្តអារញ្ញសាគរ សហការជាមួយអាជ្ញាធរសង្កាត់សៀមរាប សង្កាត់សាលាកំរើក សង្កាត់ជ្រាវ នៃក្រុងសៀមរាប និងសហភាពសហព័ន្ធយុវជនកម្ពុជាក្រុង ខេត្តសៀមរាប មូលមតិគ្នាជាឯកច្ឆ័ន្ទបានផ្តួចផ្តើមរៀបចំពិធីប្រណាំងទូក និងបណ្តែតប្រទីប ដើម្បីអបអរសាទរថ្ងៃចេញព្រះវស្សា និងដើម្បីរក្សាប្រពៃណីទំនៀមទម្លាប់របស់អ្នកស្រុកភូមិដែលមានតាំងពីយូរលង់ណាស់មកហើយ ក្រោមការចូលរួមឧបត្ថម្ភគាំទ្រពីព្រះសង្ឃ ថ្នាក់ដឹកនាំអាជ្ញាធរមូលដ្ឋាន ក្រុមការងារយុវជន សសយកខេត្តក្រុង អាជីវករ និងសប្បុរសជននានាបានបរិច្ចាគ ធនធានផ្ទាល់ខ្លួនទៅតាមសទ្ធាជ្រះថ្លានូវថវិកា និងភេសជ្ជៈសម្រាប់ជួយទ្រទ្រង់ឱ្យកម្មវិធីដំណើរការទៅយ៉ាងរលូន។
ពិធីប្រណាំងទូកលក្ខណៈប្រពៃណីនេះ មានរយៈពេល២ថ្ងៃ គឺនៅវេលារសៀលថ្ងៃទី១១ និងរសៀលថ្ងៃទី១២ ខែតុលា ឆ្នាំ២០២២នេះ នៅចំណុចផ្លូវតាអាំ ស្ថិតក្នុងភូមិចុងស្រុក សង្កាត់សៀមរាប ជាភូមិសាស្ត្រជាប់បឹងទន្លេសាប ដែលកីឡាករសុទ្ធតែជាបងប្អូនក្នុងមូលដ្ឋាននៃបណ្តាសង្កាត់នីមួយៗ មានទូកសរុបចំនួន៣០ទូក ក្នុងនោះទូក.ង ចំណុះ២២នាក់ ចំនួន៤ទូក ជាទូកកិត្តិយស និងទូកប្រណាំងដណ្តើមជ័យលាភី មានចំនួន២៦ទូក ដែលទូកនីមួយៗមានចំណុះ៦នាក់ ហើយចំណាត់ថ្នាក់ជ័យលាភី នឹងជ្រើសយកពីលេខ១ ដល់លេខ៤ នឹងទទួលបានប្រាក់ឧបត្ថម្ភពីគណៈកម្មការរៀបចំពិធី ក្នុងពេលប្រកាសលទ្ធផល។
មានប្រសាសន៍ក្នុងឱកាសបើកការប្រណាំងទូកនេះ លោក ម៉ៃ សាមេត ចៅសង្កាត់សៀមរាប បានបង្ហាញនូវក្តីសោមនស្សដែលបានសហការរៀបចំកម្មវិធីនេះឡើង ព្រោះអស់រយៈពេលជាង២ឆ្នាំមកហើយ ដែលបងប្អូនប្រជាពលរដ្ឋមិនបានជួបជុំប្រារព្ធពិធីជួបជុំ ឬពិធីបុណ្យនានានោះទេ ព្រោះដោយសារការឆ្លងរាលដាលជាសកលនៃជំងឺកូវីដ-១៩ និងការអនុវត្តតាមការណែនាំនិងវិធានការនានាទប់ស្កាត់នៃការឆ្លងជំងឺកូវីដ-១៩ ។
លោកបន្តថា ដោយសារការយកចិត្តទុកដាក់ និងការលះបង់ខ្ពស់របស់ប្រមុខថ្នាក់ ដឹកនាំរាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្វះស្វែងរកវ៉ាក់សាំងចាក់ជូនបងប្អូនគ្រប់ទីកន្លែងដោយឥតគិតថ្លៃ តាំងពីដូសជំរុញរហូតដូសមូលដ្ឋាន ទើបការឆ្លងនៃជំងឺដ៏កា.ចសាហាវនេះបានថយចុះជាបន្តបន្ទាប់ និងសម្រេចបើកប្រទេសពេញលេញឡើងវិញ តាមរយៈការរៀនរស់តាមបែបគន្លងថ្មីជាមួយនឹងកូវីដ-១៩ ដូចនេះ ទើបយើងទាំងអស់គ្នាមានឱកាសជួបជុំ និងប្រាព្ធពិធីផ្សេងៗ ឡើងវិញក្រោមម្លប់សុខសន្តិភាពតែមួយ។
លោក ម៉ៃ សាមេត បន្តទៀតថា ព្រះរាជពិធីអុំទូកនេះធ្វើឡើង គឺដើម្បីដាស់តឿនឱ្យយើងទាំងអស់គ្នាដឹងគុណដល់ព្រះគង្គា និងព្រះធរណី និងរំលឹកមនុស្សឱ្យចេះថែរក្សាការពារទឹកដីឱ្យបានគង់វង្ស និងចេះស្រឡាញ់គោរពព្រះធរណី គង្គា ដោយចូលរួមសម្អាតបរិស្ថានឱ្យបានស្អាត ៕
ចែករំលែកព័តមាននេះ