ទៅដាក់បង្កៃចាប់ត្រីនៅវាលស្រែត្រូវក្រពើទម្ងន់ប្រមាណ៣០គីឡូក្នុងទឹកត្របាក់
- សៀមរាប
បុរសម្នាក់ដែលនាំគ្នីគ្នា៤នាក់ ទៅដាក់បង្កៃចាប់ត្រីនៅវាលស្រែ ត្រូវបានក្រពើនៅក្នុងទឹកខាំចំកំភួនជើង បណ្តាលឱ្យហូរឈាមរហា.ម តែ
ខេត្តសៀមរាប ៖ បុរសម្នាក់ដែលនាំគ្នីគ្នា៤នាក់ ទៅដាក់បង្កៃចាប់ត្រីនៅវាលស្រែ ត្រូវបានក្រពើនៅក្នុងទឹកខាំចំកំភួនជើង បណ្តាលឱ្យហូរឈាមរហា.ម តែសំណាងល្អដោយសារមានគ្នាច្រើននាក់ ក៏បាននាំគ្នាវា.យក្រពើងា.ប់ភ្លាមៗ រួចនាំអ្នករបួសមកផ្ទះវិញ ដើម្បីលាងរបួសផងដែរ។
ហេតុការណ៍ក្រពើខាំខាងលើនោះ បានកើតឡើង នៅវេលាប្រមាណម៉ោង១យប់ ថ្ងៃទី១២ ខែតុលា ឆ្នាំ២០២២ ស្ថិតនៅចំណុចវាលស្រែលិចទឹកជំនន់ជម្រៅកន្លះម៉ែត្រ ម្តុំខាងកើតប្រឡាយខ្នាត ខាងត្បូងផ្លូវជាតិលេខ៦ ក្នុងភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប ។
បើតាមប្រសាសន៍របស់លោក ពៅ ប៊ុនធឿន អភិបាល ស្រុកជីក្រែង បានប្រាប់តាមទូរស័ព្ទនៅវេលាម៉ោង៨ព្រឹក ថ្ងៃទី១៣ ខែតុលា ឆ្នាំ២០២២ថា កាលពីវេលាម៉ោង១រំលងអធ្រាត្រថ្ងៃទី១២ ខែតុលា ជនរងគ្រោះឈ្មោះ ជួន សំណាង អាយុ២៨ឆ្នាំ រស់នៅបច្ចុប្បន្ន ភូមិច្រាំងខ្ពស់ ឃុំកំពង់ក្តី ស្រុកជីក្រែង ខេត្តសៀមរាប បាននាំគ្នាចំនួន៤នាក់ ទៅដាក់បង្កៃត្រីនៅវាលស្រែពេលយប់ ស្ថិតនៅចំណុចវាល ស្រែដែលទឹកលិចជម្រៅកន្លះម៉ែត្រ ត្រូវក្រពើរួចមកពីណា ខាំរបួសជើង ។
បន្ទាប់ពីទទួលបានព័ត៌មាន គួរឱ្យភ្ញាក់ផ្អើលនេះភ្លាម លោកបានចាត់ឱ្យលោកវរសេនីយ៍ត្រី អ៊ុច វិសុទ្ធ នាយប៉ុស្តិ៍កំពង់ក្តី បានចុះទៅដល់ផ្ទះជនរងគ្រោះឈ្មោះ ជួន សំណាង ក្នុងករណីសត្វក្រពើខាំដើម្បីសួរនាំឱ្យបានច្បាស់លាស់ ។
លោកបានបញ្ជាក់ថា មុនពេលកើតហេតុ នៅយប់ថ្ងៃទី១២ ខែតុលា ឆ្នាំ២០២២ វេលាម៉ោង១រំលងអធ្រាត្រ ពិតជាបានទៅដាក់បង្កៃរកត្រីនៅចំណុចវាលស្រែលិចទឹកជំនន់ ជម្រៅកន្លះម៉ែត្រ ហើយក៏ត្រូវបានក្រពើត្របាក់ខាំចំជើងខាងស្តាំពិតប្រាកដមែន ។ នៅពេលនោះ ជនរងគ្រោះ និងមនុស្ស៤នាក់ទៀត បានជួយគ្នាយកផ្គាក់កា.ប់ទៅលើក្រពើនោះ បណ្តាលឱ្យងា.ប់ភ្លាមៗនៅកន្លែងកើតហេតុតែម្តង ទើបរំដោះអ្នករងគ្រោះបានវិញ ។ ហើយសត្វក្រពើនេះ មានទម្ងន់ប្រមាណ៣០គីឡូក្រាម ប្រវែងជិត២ម៉ែត្រ ។ បច្ចុប្បន្នជនរងគ្រោះកំពុងសម្រាកព្យាបាលនៅមណ្ឌលសុខភាពជីក្រែង ។
ករណីក្រពើខាំមនុស្សក្នុងទឹកនេះ កំពុងធ្វើឱ្យអ្នកភូមិមានការភ័យខ្លាច ដោយសារតែជាព័ត៌មានជាក់ស្តែងបំផុត ហើយក៏មិនដឹងថា ក្រពើនេះមកពីទីណានោះទេ ។ ហើយនៅក្រុងសៀមរាប ជារឿយៗ មានការចាប់បានកូនក្រពើដែលវាចេញពីលូ ដែលអាចរួចពីអាងចិញ្ចឹមណាមួយ ព្រោះនៅខេត្តសៀមរាប មានអាងចិញ្ចឹមក្រពើជាច្រើនកន្លែង ដែលវាអាចរួចដោយប្រការណាមួយនារដូវទឹកជំនន់នេះ ៕
ចែករំលែកព័តមាននេះ