- ភ្នំពេញ
ការសម្រេចចិត្តលើការបញ្ចប់តំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីចុងសប្តាហ៍កន្លងទៅ ហើយស្នើសភា ដើម្បីគាំទ្របេក្ខភាពលោក ឌិត…
ការសម្រេចចិត្តលើការបញ្ចប់តំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីចុងសប្តាហ៍កន្លងទៅ ហើយស្នើសភា ដើម្បីគាំទ្របេក្ខភាពលោក ឌិត…
ការសម្រេចចិត្តលើការបញ្ចប់តំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីចុងសប្តាហ៍កន្លងទៅ ហើយស្នើសភា ដើម្បីគាំទ្របេក្ខភាពលោក ឌិត ទីណា ដែលបច្ចុប្បន្នជារដ្ឋលេខាធិការក្រសួងរ៉ែ និងថាមពលទៅកាន់តំណែងរដ្ឋមន្ត្រីជំនួសលោកវេង សាខុន គឺជាដំណើរការចាប់ផ្តើមបញ្ជ្រាបឈាមថ្មីរបស់គណបក្សប្រជាជនកម្ពុជាដែលជាគណបក្សកាន់អំណាច។ពេលនេះនៅក្នុងជួររដ្ឋាភិបាលមានតែលោក សាយ សំអាល់ រដ្ឋមន្ត្រីបរិស្ថានម្នាក់ និងលោក កើត រិទ្ធ រដ្ឋមន្ត្រីក្រសួងយុត្តិធម៌ម្នាក់ប៉ុណ្ណោះ ដែលជាឈាមថ្មី ។
លោក ឌិត ទីណា ត្រូវបានគេដឹងថា លោក គឺជាកូនប្រុសលោក ឌិត មុន្ទី ប្រធានតុលាការកំពូល ហើយលោកក៏ជាសាច់ថ្លៃនឹងលោកសាយ សំអាល់ផងដែរ។អនាគតរដ្ឋមន្ត្រីថ្មី និងរដ្ឋមន្ត្រីបរិស្ថានដោយរួមទាំងរដ្ឋមន្ត្រីក្រសួងយុត្តិធម៌គឺសុទ្ធតែជាឈាមថ្មីរបស់គណបក្សប្រជាជនកម្ពុជាដែលលោកទាំង៣មានអាយុ ក្រោម៤៥ ឆ្នាំ ដែលជាវ័យពោរពេញដោយសក្តានុពលការងារ ហើយម្យ៉ាងវិញទៀត លោកទាំងបី គឺសុទ្ធតែជាបញ្ញាវ័ន្តវ័យក្មេងដែលទទួលការអប់រំមកពីក្រៅប្រទេស។
ពាក់ព័ន្ធនឹងមូលហេតុនៃការបញ្ចប់ដំណែងលោក វេង សាខុន សម្តេចតេជោ ហ៊ុន សែន នៅព្រឹកថ្ងៃទី១១ ខែតុលា ឆ្នាំ២០២២ នាពិធីចែកសញ្ញាប័ត្រជូននិស្សិតនៃសាកលវិទ្យាល័យភ្នំពេញអន្តរជាតិបានមានប្រសាសន៍ថា លោក វេង សាខុន មិនមានកំហុសធ្ងន់ធ្ងរណានោះទេ ហើយលោកក៏បានទទួលការតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី។រីឯការផ្លាស់ប្តូរនេះ គឺដើម្បីបង្កើនប្រសិទ្ធភាព និងជំរុញការអភិវឌ្ឈន៍វិស័យកសិកម្មកម្ពុជាតែប៉ុណ្ណោះ។
សម្តេចតេជោ មិនបាននិយាយខ្លាំងៗទាក់ទងនឹងរឿងនៅពីក្រោយការបញ្ចប់តំណែងលោក វេង សាខុន និងការតែងតាំងរដ្ឋមន្ត្រីថ្មីជំនួសនោះទេ ប៉ុន្តែវាទំនងជាមានរឿងរបស់វានៅពីក្រោយការសម្រេចចិត្តបែបនេះខណៈដែលលោក វេង សាខុន ក៏ធ្លាប់ទទួលបានការរិះគិតពីសម្តេចផងដែរ កាលពីប៉ុន្មានខែមុន ប៉ុន្តែទោះបីជាយ៉ាងណាក៏ដោយ ក្រុមអ្នកវិភាគបានអះអាងថា ការសម្រេចចិត្តនេះ គឺស្របតាមទស្សនៈវិស័យនៃការផ្លាស់ប្តូររបស់គណបក្សកាន់អំណាចនេះ ខណៈដែលសមាជិកគណរដ្ឋមន្ត្រីភាគច្រើនដែលកំពុងតែកាន់តំណែងខ្លះមានអាយុជាង៧០ឆ្នាំទៅហើយនោះ ហើយខ្លះមាននៅក្នុងជួររដ្ឋាភិបាលតាំងតែពីទស្សវត្ស៍ឆ្នាំ១៩៩០មក។
កន្លងមកនិន្នាការនៃការបញ្ជ្រាបឈាមថ្មីរបស់គណបក្សកាន់អំណាចត្រូវបានថ្នាក់ដឹកនាំគណបក្សនេះបានគិតគូជាយូរមកហើយ។ក្រោយមកនៅក្នុងឆ្នាំ២០១៥ កន្លងទៅគណបក្សប្រជាជនកម្ពុជាដែលសំបូរដោយមន្ត្រីវ័យចំណាស់ក៏ចាប់ផ្តើមបញ្ចូលសមាជិកគណៈកម្មាធិការកណ្តាលថ្មីពោល គឺជាឈាមថ្មីដែលសុទ្ធតែជាអ្នកជំនាញវ័យក្មេង ហើយនៅឆ្នាំ២០១៨ ក៏បានពង្រីកសមាជិកគណកម្មាធិការកណ្តាលឡើងដល់៨៦៥នាក់ ដោយនៅក្នុងចំណោមអ្នកដែលបញ្ចូលថ្មី ទាំង៣៤២នាក់ ភាគច្រើនសុទ្ធតែជាអ្នកមានសមត្ថភាព និងមានវ័យក្មេងមានសក្តានុពលការងារ ហើយសុទ្ធតែជាបញ្ញាវ័ន្តដែលទទួលការអប់រំនៅក្រៅ ប្រទេសសឹងទាំងអស់ដោយពួកគេមានទាំងបទពិសោធន៍ និងជំនាញ។
ក្រៅពីនេះកាលពីខែធ្នូ ឆ្នាំ២០២១កន្លងទៅ នៅពេលដែលគណរដ្ឋមន្ត្រីរបស់សម្តេច បានបន្តដឹកនាំរាជរដ្ឋាភិបាលកម្ពុជាបានជាងពាក់កណ្តាលអណត្តិនៃការបោះឆ្នោតឆ្នាំ២០១៨ មកនោះសម្តេចតេជោ ហ៊ុន សែនក៏បានព្រមានគណរដ្ឋមន្ត្រីរបស់សម្តេចម្តងរួចមកហើយដោយបានលើកឡើងថា សម្រាប់អណត្តិក្រោយប្រសិនបើគណបក្សប្រជាជនកម្ពុជាឈ្នះឆ្នោតនៅក្នុងនាមជាប្រធានគណបក្ស គណរដ្ឋមន្ត្រីថ្មីមួយដែលកើតឡើងដោយឈាមថ្មីរបស់គណបក្សអាចនឹងត្រូវរៀបចំដោយសមាជិកគណរដ្ឋមន្ត្រីថ្មីទាំងអស់មានអាយុក្រោម៦០ឆ្នាំ។
ការសម្រេចចិត្តរបស់សម្តេចនៅក្នុងនាមជានាយករដ្ឋមន្ត្រីផង និងនៅក្នុងតួនាទីជាប្រធានគណបក្សកាន់អំណាចផង ការសម្រេចចិត្តថ្មីៗនេះ អាចជាការវាស់ឬស្ទាបស្ទង់ថ្លឹងថ្លែងនិន្នាការសង្គមមួយមុននឹងមានការផ្លាស់ប្តូរបញ្ចេញឈាមចាស់បញ្ចូលឈាមថ្មីមកជំនួស ពោល គឺអនុវត្តដោយសន្សឹមៗមិនបង្ខំ ដើម្បីបន្សាំនឹងចលករសង្គម ដើម្បីបង្ការថា នៅពេលដែលមានការផ្លាស់ប្តូរភ្លាមនឹងអាចកើតមានបញ្ហានៅក្នុងសង្គមបាន។ប៉ុន្តែខណៈ ដែលការសម្រេចនេះដំណើរការទៅមុខបណ្តាសមាជិកគណរដ្ឋមន្ត្រីបច្ចុប្បន្នចាប់ពីពេលនេះតទៅគួរតែបង្កើនសកម្មភាព និងជំរុញការទទួលខុសត្រូវមុខងារ និងភារកិច្ចរបស់ខ្លួនឲ្យបាន ហ្មត់ចត់ ប្រសិនបើមិនដូច្នេះទេឈាមថ្មីអាចនឹងត្រូវដាក់បញ្ចូលជំនួសជាបន្តបន្ទាប់ទៀតនៅពេលអនាគត ទោះបីជាការបោះឆ្នោតនឹងមកដល់នៅខែកក្កដា ឆ្នាំក្រោយក៏ដោយចុះ។
សរុបសេចក្តីទៅឈាមចាស់ដែលបានកំពុងតែដឹកនាំក្រសួង និងស្ថាប័ននានា របស់រាជរដ្ឋាភិបាលក្រោមខ្សែរបន្ទាត់ និងដែននៃអំណាចស្របច្បាប់របស់គណបក្សប្រជាជនកម្ពុជាក្រោយកើតចេញពីការបោះឆ្នោត កាលពីឆ្នាំ២០១៨ គួរតែសកម្មឡើងបន្ថែមទៀតនៅក្នុងការឆ្លើយតប និងតម្រូវការក៏ដូចជា ផលប្រយោជន៍របស់រាស្ត្រដែលជាម្ចាស់សន្លឹកឆ្នោត។បើមិនដូច្នេះទេការផ្លាស់ប្តូរទៅរកឈាមថ្មីទំនងជាអាចនឹងបន្តកើតមានបន្ថែមទៀត មុនការបោះឆ្នោតឆ្នាំ២០២៣ទៅទៀត។
គេរំពឹងថា សមាជិកចាស់ៗគណបក្សប្រជាជនកម្ពុជាទំនងជាយល់ថា ពួកគេដល់ពេលចូលនិវត្តន៍ហើយបើកផ្លូវអោយមនុស្សជំនាន់ថ្មីចូលកាន់តំណែង។ ឧទាហរណ៍ដ៏ច្បាស់លាស់មួយ គឺសម្តេចតេជោ ហ៊ុន សែន និងគណបក្សប្រជាជនកម្ពុជាបានសម្រេចហើយថា នឹងអោយលោក ហ៊ុន ម៉ាណែត អគ្គមេបញ្ជាការកងទ័ពជើងគោកធ្វើជានាយករដ្ឋមន្ត្រីបន្តវេណ។ប៉ុន្តែពេលវេលានៅមិនទាន់ច្បាស់លាស់នៅឡើយ។ខណៈដែលសម្តេចតេជោ ធ្លាប់មានប្រសាសន៍ថា សម្តេចនឹងនឹងបន្តឈរឈ្មោះជាបេក្ខជននាយករដ្ឋមន្ត្រីទៀតនៅឆ្នាំ២០២៣ នោះគេរំពឹងថា វាសនារបស់លោក ហ៊ុន ម៉ាណែត ធ្វើជានាយករដ្ឋមន្ត្រីទំនងជាកើតមានក្រោយឆ្នាំ២០២៣។
ពេលនោះ លោក ហ៊ុន ម៉ាណែត ទំនឹងជានឹងរៀបចំគណរដ្ឋមន្ត្រីមួយដែលសុទ្ធតែឈាមថ្មីឬមនុស្សវ័យក្មេងដែលពេញកម្លាំងកាយ និងពោរពេញដោយចំណេះដឹង។ដំណើរការនេះនឹងត្រូវគេបន្តតាមដានយ៉ាងយកចិត្តទុកដាក់៕ អត្ថបទ ៖ ហេង ចេស្តារ
ចែករំលែកព័តមាននេះ