ត្រឹម២ថ្ងៃ! មន្ត្រីជលផលខេត្តកំពង់ឆ្នាំងសហការគ្នាបង្ក្រាបបទល្មើសនេសាទក្នុងភូមិសាស្ត្រស្រុកជលគីរី
- កំពង់ឆ្នាំង
ខេត្តកំពង់ឆ្នាំង ៖ បើទោះបីរដូវនេះជារដូវបើកនេសាទក៍ពិតមែន តែការនេសាទដោយប្រើឧបករណ៍
ខេត្តកំពង់ឆ្នាំង ៖ បើទោះបីរដូវនេះជារដូវបើកនេសាទក៍ពិតមែន តែការនេសាទដោយប្រើឧបករណ៍ខុសច្បាប់នៅតែកើតមានឡើង ក្នុងភូមិសាស្ត្រនានា ក្នុងខេត្តកំពង់ឆ្នាំង ។ ចំណែកឯការបង្ក្រាប របស់សមត្ថកិច្ចជំនាញ ក៍ត្រូវបានធ្វើឡើងស្ទើររៀងរាល់ថ្ងៃដែរ។ ជាក់ស្តែង នៅព្រឹកថ្ងៃទី១២ ខែតុលា ឆ្នាំ២០២២ នេះ មន្ត្រីខណ្ឌរដ្ឋបាលជលផល នៃមន្ទីរកសិកម្ម រុក្ខប្រម៉ាញ់ និងនេសាទ ខេត្តកំពង់ឆ្នាំង បានសហការជាមួយ សមត្ថកិច្ចចម្រុះ និងសហគមន៍នេសាទ ចុះបង្ក្រាបបទល្មើសនេសាទ ក្នុងភូមិសាស្ត្រមួយចំនួន ក្នុងស្រុកជលគីរី។
លោក លី ឡា នាយខណ្ឌរដ្ឋបាលជល ខេត្តកំពង់ឆ្នាំង បានបញ្ជាក់ថា៖ នៅថ្ងៃទី១២ ខែតុលា ឆ្នាំ២០២២ នេះ មន្ត្រីខណ្ឌរដ្ឋបាលជលផល កំពង់ឆ្នាំង និងផ្នែករដ្ឋបាលជលផលកំពង់ប្រសាទ បានសហការគ្នាជាមួយសមត្ថកិច្ច និង សហគមន៍នេសាទ បានចុះបង្ក្រាប បទល្មើស ក្នុងភូមិសាស្ត្រ ចាប់ពីចំណុចក្រោយភូមិកោះធំ ដល់ទំនាបធំ និងនៅចំណុចឬស្សីដង្គួច ក្នុង ភូមិសាស្ត្រ ស្រុកជលគីរី ។ ដោយឡែក កម្លាំងសមត្ថកិច្ចចម្រុះដដែល កាលពីថ្ងៃទី១១ ខែ តុលា ក៍បានចុះបង្ក្រាប បទល្មើសនេសាទ នៅចំណុចមួយចំនួនទៀត ក្នុងស្រុកជលគីរីនេះដែរ ដែលជាលទ្ឋផល រយៈពេល២ថ្ងៃ បង្ក្រាបរបាំងស្បៃមុងបាន ២២កន្លែង ស្មើនឹងប្រវែង ១២៥០ម៉ែត្រ ,លបលូស្បៃមុង២៣លប, បង្គោល៤០០ដើម, និងចាក់លែងកូនត្រីចម្រុះចូលទន្លេវិញ ចំនួន៩០គីឡូក្រាម។
ជារឿយៗ អាជ្ញាធរខេត្ត ក៍ជាមន្ត្រីជំនាញតែងបានអប់រំផ្សព្វផ្សាយ ប្រជាពលរដ្ឋសូមកុំប្រើឧបករណ៍នេសាទដោយខុសច្បាប់ ទាំងក្នុងរដូវបិតនិងក្នុងរដូវបើក ។ ប៉ុន្តែបទល្មើសនៅតែកើតមានឡើង គ្រាន់តែការបង្ក្រាបបានញឹកញាប់ បទល្មើសបានអន់ថយខ្លះតែប៉ុណ្ណោះ ៕
ចែករំលែកព័តមាននេះ