សហរដ្ឋអាមេរិក ៖ យោងតាមការស្ទង់មតិរបស់វិនិយោគិនបង្ហាញកាលពីថ្ងៃអង្គារថា វិនិយោគិនលើអចលនទ្រព្យពាណិជ្ជកម្មភាគច្រើនមានគម្រោងទិញបន្ថែមក្នុងឆ្នាំនេះ ព្រោះតែមានគំនិតថា សេដ្ឋកិច្ចនឹងលូតលាស់ និងមានការបន្ធូរបន្ថយច្បាប់នៅសហរដ្ឋអាមេរិក ។
យោងតាមការស្ទង់មតិដោយ CBRE Group Inc ឲ្យដឹងថា ភាគរយនៃវិនិយោគិនដែលចង់ទិញអចលនទ្រព្យក្នុងឆ្នាំ២០១៧ បានកើនឡើងពី៦៥%ក្នុងឆ្នាំមុន មកត្រឹម៦៧%ក្នុងឆ្នាំនេះ ។
ការស្ទង់មតិនេះមានការចូលរួមពីស្ថាប័នវិនិយោគ ក្រុមហ៊ុនឯកជន និងវិនិយោគិនដទៃទៀត ហើយវាបង្ហាញថា អ្នកឆ្លើយ៨៣%មានគម្រោងរក្សា ឬបង្កើនការទិញក្នុងឆ្នាំនេះ។
ប៉ុន្តែវិនិយោគិនគ្រោងថា នឹងកាត់បន្ថយហានិភ័យតាមរយៈគោលការណ៍អភិរក្សនិយម។ ការស្ទង់មតិបង្ហាញថា វិស័យឧស្សាហកម្មរួមមានឃ្លាំងទំនិញ គឺជាទ្រព្យសម្បតិ្តដែលទទួលបានប្រជាប្រិយភាពជាងគេក្នុងឆ្នាំ២០១៧ ។
CBRE ឲ្យដឹងដែរថា ៥៤%នៃស្ថាប័នវិនិយោគមានគម្រោងវិនិយោគប្រាក់ច្រើនជាង១ប៊ីលានដុល្លារទៅទៀតលើអចលនទ្រព្យពាណិជ្ជកម្ម ។
ទស្សនៈដ៏វិជ្ជមានសម្រាប់អនាគតនៃទីផ្សារអចលនទ្រព្យក្នុងសហរដ្ឋអាមេរិក ខណៈមានទិន្នន័យពីក្រុមហ៊ុន Preqin ថា មានប្រាក់ចំនួន១៤៤ប៊ីលានដុល្លារឯណោះហូរចូលមកកាន់ទីផ្សារអចលនទ្រព្យនៅអាមេរិកខាងជើង ។
CBRE បន្ថែមថា នៅពេលប្រៀបធៀបជាមួយប្រទេសអភិវឌ្ឍន៍ដែលការលូតលាស់ទាបនៅឡើយ ឬគ្មានការលូតលាស់ទាំងស្រុង ការព្យាករពីការលូតលាស់វិជ្ជមាននេះមានន័យថា នឹងបន្តមានលំហូរធនធានចូលមកកាន់សហរដ្ឋអាមេរិកក្នុងឆ្នាំនេះ ។
គួរបញ្ជាក់ថា ការស្ទង់មតិខាងលើមានការចូលរួមពីអ្នកឆ្លើយតបចំនួន៩៦៣នាក់ និងត្រូវបានធ្វើឡើងរវាងថ្ងៃទី៦ មករា ដល់ថ្ងៃទី៦ កុម្ភៈ ៕
ចែករំលែកព័តមាននេះ