រាជធានីភ្នំពេញ ៖ មានមតិជាច្រើនលើកឡើងថា នៅពេលគម្រោងលំនៅឋានសាធារណៈជាគោលនយោបាយរបស់រាជរដ្ឋាភិបាលសម្រាប់ដោះស្រាយបញ្ហាលំនៅឋានជូនប្រជាពលរដ្ឋចេញជារូបរាងនោះ តម្លៃលំនៅឋាន
រាជធានីភ្នំពេញ ៖ មានមតិជាច្រើនលើកឡើងថា នៅពេលគម្រោងលំនៅឋានសាធារណៈជាគោលនយោបាយរបស់រាជរដ្ឋាភិបាលសម្រាប់ដោះស្រាយបញ្ហាលំនៅឋានជូនប្រជាពលរដ្ឋចេញជារូបរាងនោះ តម្លៃលំនៅឋាននៅតាមបុរីនានាក្នុងរាជធានីភ្នំពេញ នឹងធ្លាក់ចុះ ព្រោះដោយសារលំនៅឋានសាធារណៈមានតម្លៃទាប ប៉ុន្តែអ្វីដែលរំពឹងនោះ វាមិនដូចនេះទេ មានន័យថា លំនៅឋានតាមបុរីនៅតែមានតម្លៃថេរចំពោះបុរីធំៗដែលមានកេរ្តិ៍ឈ្មោះនៅកម្ពុជា។ ចំណែកលំនៅឋានដែលអភិវឌ្ឍន៍ដោយក្រុមហ៊ុនឯកជនមួយចំនួនជាលក្ខណៈតូចតាចអាចនឹងប្រែប្រួលតិចតួចប៉ុណ្ណោះ ។
បើតាមម្ចាស់គម្រោងលំនៅឋានសាធារណៈ ធ្លាប់បានឱ្យដឹងថា គម្រោងរបស់ខ្លួនអភិវឌ្ឍន៍ឡើង មិនមែនជាដៃគូប្រកួតជាមួយអ្នកអភិវឌ្ឍន៍តាមបុរីទេ ព្រោះគម្រោងលំនៅឋានសាធារណៈ ផ្តោតទៅលើអ្នកមានចំណូលទាប និងមធ្យម ហើយសម្រាប់លំនៅឋាននៅក្នុងបុរីវិញ គឺផ្តោតលើអតិថិជនមានចំណូលលើមធ្យម ។ ដូចនេះ អតិថិជនគោលដៅនៃគម្រោងទាំងពីរមិនដូចគ្នាទេ ។
សូមបញ្ជាក់ថា ក្រុមហ៊ុនអភិវឌ្ឍន៍លំនៅឋានសាធារណៈសម្រាប់អ្នកចំណូលទាប និងមធ្យមបានកើនមួយហើយ បន្ទាប់ពីក្រុមហ៊ុន Worldbridge Land ប្រកាសចាប់ផ្ដើមសាងសង់លំនៅឋានសាធារណៈជាផ្លូវការនៅក្នុងស្រុកស្អាង ខេត្តកណ្ដាល ។
លោកឧកញ៉ា នួន រឹទ្ធី អគ្គនាយក KFA ជាក្រុមហ៊ុនទទួលបានការលក់គម្រោងលំនៅឋានសាធារណៈពីក្រុមហ៊ុន Worldbridge Land ធ្លាប់និយាយថា គម្រោងលំនៅឋានសាធារណៈថ្មី មិនមែនជាដៃគូប្រកួតប្រជែងជាមួយគម្រោងរបស់ក្រុមហ៊ុន Worldbridge Land ទេ ព្រោះទីតាំងនៅឆ្ងាយខុសពីគ្នា ហើយការកើតឡើងនៃគម្រោងលំនៅឋានសាធារណៈជាបន្តបន្ទាប់ ក៏មិនមែនជាការប្រកួតប្រជែងជាមួយគម្រោងលំនៅឋាននៅក្នុងបុរីដែរ ព្រោះថា អតិថិជនដែលទិញគម្រោងលំនៅឋានសាធារណៈ និងលំនៅឋាននៅក្នុងបុរី មានប្រាក់ចំណូលផ្សេងៗគ្នា ដូចនេះ មិនប៉ះពាល់គ្នាទេ ។
លោក ហ៊ុយ វណ្ណា អគ្គលេខាធិការសមាគមអភិវឌ្ឍន៍លំនៅឋានកម្ពុជា បានឱ្យដឹងដែរថា ការអភិវឌ្ឍគម្រោងលំនៅឋានសាធារណៈតម្លៃទាបសម្រាប់អ្នកចំណូលទាប និងមធ្យម ជាពិសេស មន្ត្រីរាជការ គឺមិនប៉ះពាល់ដល់ក្រុមហ៊ុនអភិវឌ្ឍន៍លំនៅឋានតាមបុរីទេ ។ ជាក់ស្ដែង ក្រុមហ៊ុនអភិវឌ្ឍន៍លំនៅឋានតាមបុរី នៅតែបន្តអភិវឌ្ឍន៍គម្រោងរបស់ខ្លួនជាបន្តបន្ទាប់ គ្មានការផ្អាកដំណើរការទេ បើទោះជាមានគម្រោងអភិវឌ្ឍន៍លំនៅឋានតម្លៃទាបក៏ដោយ ។ លោកនិយាយថា ៖ « មិនត្រឹមតែការផ្គត់ផ្គង់លំនៅឋានតាមបុរីនៅតែបន្តទេ តែតម្លៃផ្ទះនៅតាមបុរីក៏បានកើនឡើងជាបន្តបន្ទាប់រៀងរាល់ឆ្នាំផងដែរ គឺអត់មានធ្លាក់ទេ ហើយក៏មិននៅថេរដែរ » ។
លោកបន្តថា វាជាការល្អមួយដែលមានក្រុមហ៊ុនងាកមកអភិវឌ្ឍន៍លំនៅឋានសម្រាប់អ្នកចំណូលទាប និងមធ្យម ព្រោះដូចយើងបានដឹងហើយថា ពីមួយថ្ងៃទៅមួយថ្ងៃ អ្នកចូលមករស់នៅទីក្រុងភ្នំពេញ មានច្រើន ហើយភាគច្រើនធ្វើការមានចំណូលទាប និងមធ្យម ។ ដូចនេះ ការសាងសង់លំនៅឋានមានតម្លៃទាប គឺជារឿងល្អបំផុត ។ លោកមានប្រសាសន៍ថា ៖ « បើតាមខ្ញុំដឹង ក្រុមហ៊ុនអភិវឌ្ឍន៍លំនៅឋានប្រភេទនេះ មិនមែនមានត្រឹមតែពីរហ្នឹងទេ គឺនឹងមានក្រុមហ៊ុនផ្សេងទៀត ក៏គ្រោងសាងសង់លំនៅឋានតម្លៃទាបនៅតាមបណ្ដាខេត្តផងដែរ » ។
លោកបញ្ជាក់ថា ទាំងក្រុមហ៊ុនអភិវឌ្ឍន៍លំនៅឋានសាធារណៈតម្លៃទាប និងក្រុមហ៊ុនអភិវឌ្ឍន៍លំនៅឋានក្នុងបុរី សុទ្ធតែជួយសង្គមទាំងអស់ ។ ជាក់ស្ដែង តំបន់វាលស្រែ និងស្ងាត់ជ្រងំកាលពីមុន បច្ចុប្បន្ននេះ បានប្រែក្លាយជាតំបន់មានពន្លឺចែងចាំង មានផ្ទះ មានសាលា រៀន និងអ៊ូអរ ដែលធ្វើឲ្យទីក្រុងកាន់តែមានភាពស៊ីវិល័យ ៕
ចែករំលែកព័តមាននេះ