កម្ពុជាបច្ចុប្បន្នមានសេដ្ឋីច្រើននាក់។ ពួកគេត្រូវបានចាត់ទុកជាក្រុមមនុស្សដែលបានទទួលផលប្រយោជន៍ច្រើនជាងគេពីការរីកចម្រើនសេដ្ឋកិច្ចនៅកម្ពុជា។
នៅទីក្រុងភ្នំពេញ មានមនុស្សជាច្រើនដែលមានលុយដល់លានដុល្លារ។ ពួកគេបានក្លាយទៅជាអ្នកមានតាមរយៈមុខរបររៀងៗខ្លួន។ ប៉ុន្តែអ្វីដែលគួរឱ្យកត់សម្គាល់នោះ សេដ្ឋីស្រុកខ្មែរភាគច្រើនបានបរិចាគលុយតិចតួច ឬក៏គ្មានសោះ ដើម្បីជួយដល់សង្គម។ នេះជាអ្វីដែលពួកគេត្រូវពិចារណា។
ការធ្វើជំនួញប្រកបដោយការទទួលខុសត្រូវ គឺមិនអាចកាត់ផ្តាច់ពីការចូលរួមក្នុងសង្គមបានទេ។ ការចូលរួមនៅក្នុងការជួយសង្គមនឹងអាចធ្វើឱ្យកេរ្តិ៍ឈ្មោះរបស់ពួកគេ និងមុខរបររបស់ពួកគេកាន់តែមានការទុកចិត្ត និងជឿជាក់ពីសាធារណជនថែមទៀត ដោយធ្វើឱ្យពួកគេកាន់តែមានការរីកចម្រើន។
បើសិនជាពួកគេមិនមានការចូលរួមចំណែក ដើម្បីជួយសង្គមឱ្យបានច្រើនទេនោះ វានឹងបង្កើតឱ្យមានគម្លាតកាន់តែខ្លាំងរវាងអ្នកមាន និងអ្នកក្រ។ ដូច្នេះវាអាចនឹងនាំដល់ភាពអយុត្តិធម៌មួយនៅក្នុងសង្គមដែលផ្លែផ្កានៃការរីកចម្រើនសេដ្ឋកិច្ចត្រូវបានមនុស្សមួយក្រុមតូចគឺពួកអ្នកមានក្រសោបយកអស់។ ចំណែកអ្នកក្របានទទួលផលតិចតួចប៉ុណ្ណោះពីការរីកចម្រើននោះ។
នៅក្នុងប្រទេសជឿនលឿន គេតែងតែឃើញមហាសេដ្ឋីស្តុកស្តម្ភធ្វើការបរិចាគលុយកាក់ជាច្រើនសម្រាប់ជួយដល់សង្គមដូចជាការកសាងសាលារៀន ការជួយដល់អ្នកក្រីក្រ ការសាងសង់មន្ទីរពេទ្យ។ល។និងល។ ជាក់ស្តែងបំផុត លោក ម៉ាក ហ្សាក់កឺបឺក ( Mark Zuckerberg) មហាសេដ្ឋីវ័យក្មេងនៃក្រុមហ៊ុនហ្វេសប៊ុកបានសម្រេចចិត្តចំណាយលុយរហូតដល់៩៩ភាគរយរបស់លោកនៅក្នុងក្រុមហ៊ុនហ្វេសប៊ុក ដើម្បីកិច្ចការមនុស្សធម៌។ នេះគឺជាការបរិច្ចាគដ៏ធំមិនធ្លាប់មានពីមុនមក។
ដូច្នេះសេដ្ឋីស្រុកខ្មែរត្រូវចាប់ផ្តើមគិតឡើងវិញអំពីតួនាទីរបស់ពួកគេនៅក្នុងសង្គម៕270
ចែករំលែកព័តមាននេះ