រាជធានីភ្នំពេញ ៖ នៅទីបំផុតព្រឹត្តិការណ៍TV5 Knock Out Series រដូវកាលទី៣ដល់វគ្គផ្ដាច់ព្រ័ត្រហើយនៅថ្ងៃសៅរ៍ ទី១៨ មីនា ស្អែកនេះ ។ កីឡាករ ឡុង សំណាង និង ឃីម បូរ៉ា បានក្លាយជាបេក្ខភាពចុងក្រោយនៅក្នុងវគ្គដណ្ដើមពាន និងប្រាក់លាន ខណៈដែលអ្នកស្នេហាវិស័យកីឡាប្រដាល់ភាគច្រើនបានប៉ាន់ស្មានថា ឃីម បូរ៉ា នឹងកាន់ពាន តែមួយក្រុមផ្សេងទៀត បែរជាយល់ថា ឡុង សំណាង សមនឹងកាន់ពានដូចគ្នា បើទោះជាគេទើបនឹងឈានឡើងក្ដី ។
ការប្រកួតដែលត្រូវធ្វើឡើងនៅសង្វៀនTiffy Arena ជ្រោយចង្វារបស់ទូរទស្សន៍ប៉ុស្ដិ៍លេខ៥ នាល្ងាចថ្ងៃសៅរ៍នេះ គឺជាការប្រកួតលើកទី៣ហើយ បន្ទាប់ពីរដូវកាលមុនៗដែលបានបញ្ចប់ទទួលបានជោគជ័យ ។ នេះជាព្រឹត្តិការណ៍ដែលមានការប្រមូលផ្ដុំដោយកីឡាករខ្លាំងក្នុងប្រភេទទម្ងន់៦០គីឡូក្រាម ដោយសមាសភាពរបស់ពួកគេទាំង៣២រូប គឺមានខ្លះជាសមាសភាពថ្មី និងខ្លះជាសមាសភាពដែលមានកេរ្តិ៍ឈ្មោះបោះសំឡេងក្នុងពិភពប្រដាល់ ។
អ្វីដែលគេចាប់អារម្មណ៍ គឺព្រឹត្តិការណ៍នោះក៏មានវត្តមានកីឡាករល្អៗដែលធ្លាប់ជាប់ជាជើងឯករងនៅសង្វៀនទូរទស្សន៍អាស៊ីអាគ្នេយ៍ ចូលរួមប្រកួតផងដែរ នោះគឺឃីម បូរ៉ា ដែលជាជើងឯករងក្នុងការប្រកួតនាពេលកន្លងមក ។
លោក សេង កដិកា បានអះអាងថា កីឡាករដែលបានចូលប្រកួតនៅក្នុងព្រឹត្តិការណ៍នេះ គឺលោកកាន់តែពេញចិត្តខ្លាំងឡើងសម្រាប់ការប្រកួតក្នុងវគ្គផ្ដាច់ព្រ័ត្រនេះ ។ ធៀបនឹងការប្រកួតកាលពី២រដូវកាលមុន លោកថាការប្រកួតលើកនេះ ចម្រុះដោយកីឡាករល្អៗ ហើយមានឈ្មោះបោះសំឡេងច្រើនជាង ដោយមិនមែនសុទ្ធតែកីឡាករថ្មីៗដូចការប្រកួតកាលពី២រដូវកាលមុនឡើយ ។ ព្រឹត្តិការណ៍លើកនេះ លោកបានរំលឹកថា សមាសភាពទាំង៣២រូបដែលជ្រើសឱ្យប្រកួតតាំងពីដំណាក់កាលដើមទី សុទ្ធតែមានបទពិសោធន៍ ទើបធ្វើឱ្យមហាជនកាន់តែជក់ចិត្តថែមទៀត នៅពេលការប្រកួតវគ្គផ្ដាច់ព្រ័ត្រឈានចូលមកដល់ ។ យុទ្ធសាស្ត្របូកបញ្ចូលរវាងកីឡាករល្បីៗជើងចាស់ និងកីឡាករជើងថ្មី គឺជាចំណុចជួយឱ្យការប្រកួតក្លាយជាព្រឹត្តិការណ៍លេចធ្លោតាំងពីវគ្គជម្រុះ៣២នាក់យក១៦នាក់ និងកាន់តែមានចំណុចក្ដៅគគុកលើសដើមសម្រាប់ការប្រកួតចុងក្រោយនាល្ងាចនេះ ។ លោកថា ឡុង សំណាង ជាកីឡាករល្អ ហើយលោកក៏ជឿ៥០ភាគរយផងដែរថាកីឡាកររូបនេះនឹងប្រកួតអស់ពីសមត្ថភាពជាមួយនឹងឃីម បូរ៉ា ដើម្បីឱ្យអ្នកទស្សនាជក់ចិត្ត ។ ព្រឹត្តិការណ៍នេះ ក៏នឹងរំលេចធនធានកីឡាករកាន់តែល្អៗដូចការរំពឹងទុកសម្រាប់អាជីពអ្នកប្រដាល់នៅក្នុងព្រឹត្តិការណ៍ស៊ីហ្គេមឆ្នាំ២០២៣ខាងមុខ ដោយសារតែរវាងកីឡាករដែលត្រូវប្រកួតចុងក្រោយទាំង២ គឺម្នាក់ណាក៏វ័យក្មេងហើយអាចនៅប្រកួតទាន់ពេលស៊ីហ្គេមឆ្នាំ២០២៣ បើទោះជាចង់ជ្រេបន្តិច ។
លោក សេង កដិកា បានអះអាងថា រូបមន្តចាញ់ធ្លាក់ៗគឺជាអ្វីដែលធ្វើឱ្យកីឡាករគ្រប់រូបប្រឹងប្រកួតអស់ពីសមត្ថភាព ហើយមិនភ័យរឿងកីឡាករណាម្នាក់លក់ដូរសមត្ថភាពដូចការប្រកួតនានានោះទេ ដោយសារតែជ័យជម្នះរបស់ពួកគេសំខាន់រៀងខ្លួន ។ ក្នុងនោះការប្រកួតដណ្ដើមយកពានចុងក្រោយ គឺរឹតតែមិនភ័យរឿងលក់ឧត្តមគតិថែមទៀតដោយសារតែកីឡាករម្នាក់ៗត្រូវការមុខមាត់ និងប្រាក់លាន ។ លោកថា កីឡាករ ឡុង សំណាង គឺជាសមាសភាពទី១ដែលបានឡើងអង្គុយកៅអីក្នុងវគ្គផ្ដាច់ព្រ័ត្រ ខណៈដែលកីឡាករ ឃីម ប៉ូរ៉ា ជាសមាសភាពទី២ ដែលឡើងទៅអង្គុយកៅអីនោះដែរ ។ លោកថា កីឡាករដែលដណ្ដើមបានចំណាត់ថ្នាក់លេខ១ នឹងទទួលបានទឹកប្រាក់៤ពាន់ដុល្លារ អមដោយពានជើងឯកមួយ ខណៈដែលការប្រកួតល្ងាចនេះ ក៏មានការប្រកួតដណ្ដើមចំណាត់ថ្នាក់លេខ៣ផងដែរ សម្រាប់អ្នកចាញ់ក្នុងវគ្គ៤នាក់កាលពី២សប្ដាហ៍មុន។ អ្នកស្នេហាវិស័យប្រដាល់ជាច្រើនកំពុងរង់អ៊ុតមើលថាតើរវាងកីឡាករ ឡុង សំណាង និងឃីម បូរ៉ា អ្នកណាក្លាយជាម្ចាស់ពាន ខណៈឃីម បូរ៉ា គឺជាជើងខ្លាំង ប៉ុន្តែត្រូវគេកត់សម្គាល់ថា លោកដូចជានៅស៊យមិនទាន់មានឱកាសបានកាន់ពាន ដោយសារតែការប្រកួតចុងក្រោយ លោកច្រើនតែជួបរឿងស៊យចាញ់ប្រៀបគូប្រកួត ៕
ចែករំលែកព័តមាននេះ