រាជធានីភ្នំពេញ ៖ ប្រដាល់អន្ដរជាតិនៅលើសង្វៀនស៊ីអិនស៊ី ថ្ងៃអាទិត្យ ទី១៩ មីនា ខានស្អែកនេះ ក្រោមការឧបត្ថម្ភដោយស្រាសាច់ដុំពិសេស ពិតជាកន្ដ្រាក់អារម្មណ៍ទស្សនិកជនដែលស្នេហាកីឡាប្រដាល់ឱ្យចូលទស្សនាកកកុញមិនខាន ដោយសារសមាសភាពដែលចូលខ្លួនមកប្រកួតសុទ្ធតែជាជើងខ្លាំងដូចគ្នាទាំងកីឡាករកម្ពុជា និងកីឡាករបរទេស ។
កីឡាករកម្ពុជា រិន សារ័ត្ន មកពីក្លិបទីបញ្ជាការកងទ័ពជើងទឹក ត្រូវជួបប្រកួតជាមួយកីឡាករថៃឈ្មោះសក្ដិសិទ្ធ ស.អ៊ូឌីយីម ក្នុងប្រភេទទម្ងន់៦៥គីឡូក្រាម ។ រិន សារ័ត្ន ធ្លាប់ប្រកួតបានត្រឹមតែ២៥ដងប៉ុណ្ណោះ ក្នុងនោះឈ្នះ១៥ដង ចាញ់៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៧ដង ក្នុងពេលកីឡាករថៃ ធ្លាប់ប្រកួតបានរហូតដល់ទៅ៦១ដង ឈ្នះ៤៥ដង ចាញ់១៤ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៤ដង ។ ថ្វីដ្បិតតែកីឡាករថៃមានប្រវត្ដិប្រកួតច្រើនជាងមែនក៏មិនទាន់ដឹងថាអាចផ្ដួលរិន សារ័ត្ន បានដែរដោយសារតែកីឡាករថៃរូបនេះមិនធ្លាប់មកប្រកួតនៅលើសង្វៀនស្រុកខ្មែរទើបគេពិបាកប៉ាន់ស្មានពីសមត្ថភាព ។ រីឯរិន សារ័ត្ន គ្រាន់តែជាអ្នកប្រដាល់ជើងថ្មីប៉ុណ្ណោះ តែថ្វីដៃប្រកួតនៅលើសង្វៀនរបស់គេមិនចាញ់អ្នកប្រដាល់ជើងចាស់ប៉ុន្មានឡើយ មិនតែប៉ុណ្ណោះចិត្តរបស់គេក៏សឿងណាស់ដែរ ។ គូនេះបើចង់ដឹងថាអ្នកណាខ្លាំងជាងអ្នកណាមានតែរង់ចាំមើលការប្រកួតជាក់ស្ដែងនៅលើសង្វៀនទាំងអស់គ្នា ។
កីឡាករកម្ពុជា អ៊ុំ វណ្ណេត មកពីក្លិបការិយាល័យទី៥កងទ័ពជើងគោក ត្រូវប្រកួតជាមួយកីឡាករអាមេរិកឈ្មោះចាស្ទីន វ៉ុង ក្នុងប្រភេទទម្ងន់៦៤គីឡូក្រាម ។ អ៊ុំ វណ្ណេត
ធ្លាប់ប្រកួត៦៩ដង ឈ្នះ៤៦ដង ចាញ់២១ដង ស្មើ២ដង និងធ្លាប់ផ្ដួលគូប្រកួតឱ្យសន្លប់២២ដង ក្នុងពេលកីឡាករអាមេរិកធ្លាប់ប្រកួតបានត្រឹមតែ៨ដងប៉ុណ្ណោះ ឈ្នះ៦ដង ចាញ់២ដង និងធ្លាប់ផ្ដួលគូប្រកួតបានម្ដង ។ ចាំមើលអ៊ុំ វណ្ណេត អាចផ្ដួលកីឡាករអាមរិករូបនេះបានឬអត់ ។
ចំណែកគូប្រកួតមិត្តភាពធម្មតាវិញមានកីឡាករ សៀវ ប៉ាវ មកពីក្លិបសាលវ័ន្តកីឡាប្រកួតជាមួយកីឡាករ ជេត មុន្នី មកពីក្លិបសុភានូមានជ័យ ។ កីឡាករ ពុទ្ធ អ៊ុំអ័ន មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករ សំ ខាន់ ប៉ាវចិន មកពីក្លិបរ៉ាហាប់ស្វាយប៉ាក ។ កីឡាករ ម៉ឺន ដា មកពីក្លិបខ្លារខិនមានរិទ្ធ ប្រកួតជាមួយកីឡាករ គឿម សុវណ្ណនឿត មកពីក្លិបមោងឬស្សីមរតកគុនខ្មែរ និងគូចុងក្រោយកីឡាករ សិទ្ធ វណ្ណៈ មកពីក្លិបសាមគ្គីកូនខ្មែរប្រកួតជាមួយកីឡាករ សុន សុផាត មកពីក្លិបពន្លឺវិបុល ៕
ចែករំលែកព័តមាននេះ