ជិត20ឆ្នាំហើយ លោកស្រីឧកញ៉ា ស៊ុយ សុផាន គួរតែខ្ជាក់ដីនេះឱ្យម្ចាស់ដើមវិញ
ខេត្តសៀមរាប ៖ រឿងទំនាស់ដីធ្លីដ៏រ៉ាំរ៉ៃមួយមានរយៈពេលជិត២០ឆ្នាំមកហើយ រវាងលោកស្រីឧកញ៉ា ស៊ុយ សុផាន និងអ្នកស្រី ចាន់ លន់
ខេត្តសៀមរាប ៖ រឿងទំនាស់ដីធ្លីដ៏រ៉ាំរ៉ៃមួយមានរយៈពេលជិត២០ឆ្នាំមកហើយ រវាងលោកស្រីឧកញ៉ា ស៊ុយ សុផាន និងអ្នកស្រី ចាន់ លន់
ខេត្តសៀមរាប ៖ រឿងទំនាស់ដីធ្លីដ៏រ៉ាំរ៉ៃមួយមានរយៈពេលជិត២០ឆ្នាំមកហើយ រវាងលោកស្រីឧកញ៉ា ស៊ុយ សុផាន និងអ្នកស្រី ចាន់ លន់ មានទីតាំងស្ថិតនៅភូមិតាវៀន សង្កាត់សាលាកំរើក ក្រុងសៀមរាប ជាដីឡូត៍តូចៗ មានសំណង់ផ្ទះតៀមដ៏រខេករខាកស្នាក់នៅតាំងពីដើមមក ។
តាមដំណើររឿងលក់ដីទិញដីនេះក្រោយពីត្រូវថ្លៃគ្នាហើយ ក្នុងឆ្នាំ២០០០ លោកស្រីឧកញ៉ា ស៊ុយ សុផាន បានកក់ប្រាក់២០០០ដុល្លារ ឱ្យម្ចាស់ដីយកទៅរត់ការផ្ទេរកម្មសិទ្ធិ ។ ម្ចាស់ដីដែលធ្លាប់ស្គាល់គ្នាជាមួយលោកស្រីឧកញ៉ា ស៊ុយ សុផាន ដែលជាឈ្មួញដី ក៏ប្រឹងរត់ការផ្ទេរកម្មសិទ្ធិដីទាំង២ល្វែងដ៏រខេករខាកនេះបានរួចស្ថាពរ ក៏យកប្លង់ផ្ទេរកម្មសិទ្ធិនោះមកប្រគល់ជូនលោកស្រីឧកញ៉ា ស៊ុយ សុុផាន ដល់ផ្ទះ ព្រោះសង្ឃឹមថានឹងបានប្រាក់គ្រប់ចំនួន ព្រោះការលក់នោះមានតម្លៃត្រឹមតែ១៥.០០០ដុល្លារតែប៉ុណ្ណោះ ។
លុះធ្វើប្លង់ផ្ទេរកម្មសិទ្ធិរួចរាល់ អ្នកស្រី ចាន់ លន់ ក៏ប្រញាប់ភ្លាមយកប្លង់ដែលផ្ទេរឈ្មោះរួច មកប្រគល់ជូនលោកស្រីឧកញ៉ា ស៊ុយ សុផាន ដល់ផ្ទះនៅភ្នំពេញ ព្រោះសង្ឃឹមថានឹងទទួលបានប្រាក់គ្រប់ចំនួន ។
ប៉ុន្តែអនិច្ចា រ៉ុយៗ…ពេលយកប្លង់ផ្ទេរកម្មសិទ្ធិមកប្រគល់ឱ្យត្រូវលោកស្រីឧកញ៉ាឈ្មួញដីបានប្រាប់ថាចាំមួយអាទិត្យទៀត ចាំជួបគ្នា…ចាំប្រគល់ប្រាក់ជូន ។
មួយអាទិត្យក្រោយមក ម្ចាស់ដើមបានមកទាមទារយកប្រាក់តាមការកំណត់ ត្រូវបានលោកស្រីឧកញ៉ា ស៊ុយ សុផាន ឆ្លើយថា ច្រឡំដៃបាត់ហើយ មិនដឹងដាក់នៅកន្លែងណាទេ ចាំរកឃើញសិន ។
រឿងចាំបាត់…ចាំបាត់នេះ ដល់ពេលអស់ជំនឿ ព្រោះមិនអាចរង់ចាំការកុហក មិនឈប់ឈរនេះ អ្នកស្រី ចាន់ លន់ ជាម្ចាស់ដីក៏បានដាក់ពាក្យបណ្តឹងទៅសាលាដំបូងខេត្តសៀមរាបភ្លាម ចោទលោកស្រីឧកញ៉ា ស៊ុយ សុផាន ពីបទ «បោកប្រាស់» បានឈ្នះរហូតមកដល់តុលាការកំពូលក៏ឈ្នះទៀត ទីបំផុតជាប់គាំងដូចឡានបែកកង់ មកដល់ពេលនេះឆ្នាំ២០១៧ទៅហើយ អត់ទាន់ចេញរួចឡើយ នៅជាប់តុលាការកំពូលមិនទាន់ចេញដីកាជាផ្លូវការ ទោះបីឈ្នះក្តី ដើម្បីឱ្យម្ចាស់ដើមវិញនៅឡើយទេ ។
ខាងក្រោមនេះជាដំណើររឿងរៀបរាប់ដោយម្ចាស់ដើមឈ្មោះអ្នកស្រី ចាន់ លន់ ដ៏គួរឱ្យអាណិតបំផុត មិនគួរណាដីឡូត៍សង់ផ្ទះតៀមដ៏រខេករខាក នៅគាំងស្មេញបែបនេះឡើយ ដែលកោះសន្តិភាពចុះផ្សាយដូចខាងក្រោមនេះ គួរតែខ្ជាក់វិញទៅ គួរប្រគល់ឱ្យម្ចាស់ដើមវិញផង ព្រោះគាត់រស់នៅតែលើកន្ទេលទេ ។
ម្ចាស់ដីរៀបរាប់ថា ដីរបស់នាងខ្ញុំ ដែលរស់នៅលើរាល់ថ្ងៃ តាំងពីឆ្នាំ១៩៩០មកដល់បច្ចុប្បន្ន ហើយមុនដំបូងនាងខ្ញុំឈ្មោះ ចាន់ លន់ ត្រូវជាម្តាយរបស់ ច័ន្ទ រស្មី បានស្គាល់អ្នកស្រី ស៊ុយ សុផាន តាំងពីឆ្នាំ១៩៩៩ ដែលគាត់ជាអ្នករកស៊ីដីធ្លី ហើយទិញដីរបស់នាងខ្ញុំទាំង២ឡូត៍ មានដូចខាងក្រោម ៖ ដីឡូតិ៍ទី១-មានទំហំ៥៦០ម៉ែត្រក្រឡា មានបង្កាន់ដៃលេខ១០៣៧ ចុះថ្ងៃទី១២ ខែធ្នូ ឆ្នាំ២០០០ និងឡូត៍ ។ ទី២-មានទំហំ៣២ម៉ែត្រគុណនឹង៣៦ម៉ែត្រ ដែលមានបង្កាន់ដៃលេខ ១០៣៨ ចុះថ្ងៃទី១២ ខែធ្នូ ឆ្នាំ២០០០ នូវទឹកប្រាក់ចំនួន ១៥.០០០ដុល្លារ ដែលមានទីតាំងស្ថិតនៅភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ។
បន្ទាប់មកគាត់បានកក់មុនចំនួន២០០០ដុល្លារ នៅផ្ទះរបស់អ្នកស្រី ស៊ុយ សុផាន កាលពីថ្ងៃទី២៨ ខែសីហា ឆ្នាំ២០០០ ដើម្បីឱ្យនាងខ្ញុំរត់ការប្លង់ឱ្យគាត់ បានកាលណាយកទៅឱ្យគាត់នៅផ្ទះ ទើបគាត់ឱ្យលុយគ្រប់ចំនួន ។ ដល់ពេលនាងខ្ញុំរត់ការកាត់ឈ្មោះប្លង់ដីជូនទៅគាត់បានរួចរាល់ ក៏យកទៅឱ្យគាត់ដល់ផ្ទះព្រោះសង្ឃឹមថានឹងបានប្រាក់គ្រប់ចំនួន ។ ប៉ុន្តែគួរឱ្យសោកស្តាយនាស់ អត់បានប្រាក់ភ្លាមទេ ។ គាត់ថាចាំអាទិត្យក្រោយចាំជួបគ្នា ។ បានប្រហែលជិតមួយអាទិត្យ ស្រាប់តែនាងខ្ញុំសួរទៅអ្នកស្រី បែរជាគាត់ឆ្លើយថា ច្រឡំដៃ ភ្លេចមិនដឹងទុកនៅទីណាទេ ។
លុះដល់ពាក់កណ្តាលឆ្នាំ២០០០ ទើបនាងខ្ញុំសម្រេចចិត្តដាក់ពាក្យបណ្តឹងទៅតុលាការខេត្តសៀមរាប រឿងរដ្ឋប្បវេណីពីករណីដែលអ្នកស្រីបានបោកប្រាស់យកប្លង់ដីធ្លីចំនួន២ឡូត៍របស់ខ្ញុំតាំងពីឆ្នាំ២០០០ រហូតដល់បច្ចុប្បន្ន មានរយៈជាង២០ឆ្នាំមកដល់ឆ្នាំ២០១៧ ។ នាងខ្ញុំបានប្តឹងប្តល់គ្នាច្រើនលើកច្រើនសា ជាមួយគូទំនាស់គឺអ្នកស្រី ស៊ុយ សុផាន មិនទាន់បានចប់នៅឡើយដោយសារជាប់គាំងនៅតុលាការកំពូល ។
ដូច្នេះសូមឱ្យតុលាការកំពូលជួយរកយុត្តិធម៌ឱ្យនាងខ្ញុំ និងកូនដែលនាងខ្ញុំកំពុងដេកឈឺនៅនឹងកន្ទេលផង ។ ក្រោយមកទៀត តុលាការសៀមរាប ចេញសេចក្តីសម្រេចឱ្យនាងខ្ញុំឈ្នះ ដែលមានសំណុំរឿងរដ្ឋប្បវេណី លេខ២២៥ ចុះថ្ងៃទី២ ខែសីហា ឆ្នាំ២០០២ ចេញដោយចៅក្រម ប្លង់ ឆ្លាម ខណៈពេលនោះអ្នកស្រី ស៊ុយ សុផាន កើតទុកមិនសុខចិត្ត ក៏ប្តឹងទៅឧទ្ធរណ៍ជាប់គាំងនៅទីនោះរយៈ១ឆ្នាំ ។
បន្ទាប់មកខាងឧទ្ធរណ៍ក៏បានហៅនាងខ្ញុំឡើងទៅជួប កាលពីថ្ងៃទី២៣ ខែធ្នូ ឆ្នាំ២០០៣ ដើម្បីដោះស្រាយ បែរជាខាងអ្នកស្រី ស៊ុយ សុផាន មិនឃើញចូលខ្លួន ឃើញតែមេធាវីរបស់គាត់ឈ្មោះ ឃូ ឡុង តែប៉ុណ្ណោះ ហើយខាងសាលាឧទ្ធរណ៍ក៏បានសវនាការជំនុំជម្រះរួចមក បដិសេធសំណុំរឿងរបស់នាងខ្ញុំចោលក៏ឱ្យខាង ស៊ុយ សុផាន ឈ្នះ ទាំងបិទភ្នែក ។ នៅពេលនោះនាងខ្ញុំកើតទុកមិនសុខចិត្ត ក៏ឱ្យខាងសាលាឧទ្ធរណ៍បញ្ជូនសំណុំរឿងទៅតុលាការកំពូលវិញ ជាលើកទី ២ ។ ចំណែកខាងកំពូលក៏បានកាត់ឱ្យមកនាងខ្ញុំឈ្នះ កាលពីថ្ងៃទី៣០ ខែកញ្ញា ឆ្នាំ២០០៤ រុញចោលសំណុំរឿងរបស់អ្នកស្រី ស៊ុយ សុផាន នៅឧទ្ធរណ៍លើសំណុំរឿងរដ្ឋប្បវេណី លេខ ៧៩ ចុះថ្ងៃទី១៧ ខែកុម្ភៈឆ្នាំ២០០៤ សាលដីកាលេខ២១៧ ចុះថ្ងៃទី៣០ខែកញ្ញា ឆ្នាំ២០០៤ ចេញដោយចៅក្រមជំនុំជម្រះ ប្រធាន លោក ឌិត មុន្នី ។
បន្ទាប់មកខាងតុលាការកំពូលក៏បានហៅនាងខ្ញុំមកជាលើកទី៣ ដើម្បីជំនុំជម្រះ នៃការលក់ ទិញដីទាំង២ឡូត៍នេះ ដែលមានទីតាំង ស្ថិតនៅភូមិតាវៀន ឃុំសាលាកំរើក ស្រុកសៀមរាប ខេត្តសៀមរាប មានចែងដូចខាងក្រោម យល់ឃើញថា ៖ ការដែលសាលាឧទ្ធរណ៍សម្រេចរំលាយកិច្ចសន្យាលក់ផ្តាច់ដី និងផ្ទះ ចុះថ្ងៃទី២៨ ខែសីហា ឆ្នាំ២០០០ និងប្រគល់ដីទំនាស់ចំនួន២ឡូត៍៖ ឡូត៍ទី១-មានទំហំ៥៦០ម៉ែត្រក្រឡា ដែលមានបង្កាន់ដៃទទួលពាក្យស្នើសុំកាន់កាប់ប្រើប្រាស់ដីធ្លីលេខ ១០៣៧ ចុះថ្ងៃទី១២ ខែធ្នូ ឆ្នាំ២០០០ និងឡូត៍ទី២-មានទំហំ៣២ម៉ែត្រគុណនឹង៣៦ម៉ែត្រ មានបង្កាន់ដៃទទួលពាក្យស្នើសុំកាន់កាប់ប្រើប្រាស់ដីធ្លីលេខ១០៣៨ ចុះថ្ងៃទី១២ ខែធ្នូ ឆ្នាំ២០០០ របស់ការិយាល័យភូមិបាលស្រុកសៀមរាប ស្ថិតនៅភូមិតាវៀន ឃុំសាលាកំរើក ស្រុកសៀមរាប ខេត្តសៀមរាប ឱ្យទៅអ្នកស្រី ស៊ុយ សុផាន កាន់កាប់ជាកម្មសិទ្ធិនោះ ជាការមិនត្រឹមត្រូវទេ ព្រោះថា ភាគីចុងចម្លើយ មិនបានធ្វើពាក្យបណ្តឹងទាមទារសោះ ។
ជុំវិញករណីខាងលើនោះដែរ នាងខ្ញុំ ចាន់ លន់ ពេលនេះចាស់ដើរលែងរួចហើយ ។ ក្នុងនាមជាដើមបណ្តឹងសូមលោកប្រធានតុលាការកំពូលមេត្តាជួយសម្រួលចេញសាលដីកាជាផ្លូវការឱ្យនាងខ្ញុំវិញផង ដោយក្តីអនុគ្រោះ ព្រោះបើបានប្លង់មកវិញ នាងខ្ញុំនិងចែកដីមួយចំនួនឱ្យកូនចៅ និងសល់មួយចំនួនទៀតសម្រាប់លក់ដើម្បីមើលជំងឺ ព្រោះរាល់ថ្ងៃនាងខ្ញុំដើរពុំរួច ហើយកំពុងព្យាបាលរាល់ថ្ងៃផងដែរ ។
សូមរំលឹកថា បច្ចុប្បន្នផ្ទះរបស់នាងខ្ញុំ ត្រូវបានគេធ្វើផ្លូវចូលនៅសល់តែ២០ម៉ែត្រគុណនឹង២៥ម៉ែត្រប៉ុណ្ណោះ សម្រាប់ចែកកូនចៅក្នុងម្នាក់ៗមួយស្វែងដី ហើយរាល់ថ្ងៃកុំថាខែវស្សា សូម្បីខែប្រាំងក៏ទឹកលិចចូលផ្ទះដែរ ។
កំណត់ការិយាល័យនិពន្ធ ៖ កោះសន្តិភាពបានព្យាយាមទូរស័ព្ទទៅសុំការបំភ្លឺពីលោកស្រីឧកញ៉ា ស៊ុយ សុផាន ដែរ ប៉ុន្តែទូរស័ព្ទមិនដំណើរការ ដែលសង្ឃឹមថា នឹងរង់ចាំការបំភ្លឺតបវិញ ពេលណាក៏បានដែរ កោះសន្តិភាពនឹងបំភ្លឺជូនគ្រប់ពេលវេលា ៕
ចែករំលែកព័តមាននេះ