ខេត្តសៀមរាប៖ កម្លាំងនគរបាលក្រុងសៀមរាប សហការជាមួយកម្លាំងការិយាល័យ​នគរបាលព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលស្រុកបន្ទាយស្រី បាន​​ស្រាវជ្រាវឃាត់ខ្លួនជនសង្ស័យចំនួន ០៣នាក់ ពាក់ព័ន្ធករណីអំពើលួចមានស្ថានទម្ងន់​ទោស (កាច់សោ​.ក.ម៉ូតូ) និងប្រើប្រាស់ដោយខុសច្បាប់នូវសារធាតុញៀន​។

លោកវរសេនីយ៍ទោ ដា ចំរើន អធិការនគរបាលក្រុងសៀមរាប បានឱ្យដឹង នារសៀលថ្ងៃទី០៦ ខែតុលា​នេះថា​ ករណីចោរលួចកាច់សោ​.ក.ម៉ូតូរបស់ប្រជា​ពលរដ្ឋ​នោះ បានធ្វើឡើង កាលពីថ្ងៃទី០៤ ខែកញ្ញា ឆ្នាំ២០២២ វេលាម៉ោង ០៣និង ៤០នាទី ទៀបភ្លឺ មានជនសង្ស័យ ០២នាក់ ជិះម៉ូតូម៉ាក Honda Dream C១២៥ ពណ៌ខ្មៅ ​ស៊េរីឆ្នាំ២០២២ ពុំមានផ្លាកលេខ លេខតួ+ម៉ាស៊ីន៦៣៥០៨៨០ បានធ្វើសកម្មភាពលួចកាច់សោ​.ក.ម៉ូតូរបស់ជនរងគ្រោះ ឈ្មោះ យ.ស ភេទស្រី អាយុ ២៤ឆ្នាំ មុខរបរបុគ្គលិក ផ្ទះសំណាក់យីហោ (ប.ថ) ម៉ាក Honda Dream C១២៥ ពណ៌ខ្មៅ ស៊េរីឆ្នាំ២០២១ ពាក់ផ្លាកលេខ សៀមរាប 1AK-០៤០៨ លេខតួ+ម៉ាស៊ីន៦០០១៩៤១ ដែលចតទុកនៅក្នុងកន្លែងធ្វើការ ស្ថិតក្នុងភូមិធ្លកអណ្តូង សង្កាត់ស្លក្រាមក្រុង- ខេត្តសៀម​រាប រួចក៏ជិះម៉ូតូគេចខ្លួនបាត់។

លោកបន្ថែមថា ក្រោយពីទទួលព័ត៌មាន​ពីជនរងគ្រោះខាងលើ សមត្ថកិច្ចយើង រួមទាំងកម្លាំងការិយាល័យព្រហ្មទណ្ឌកម្រិតស្រាល បានល្បាត ហើយប្រទះឃើញមុខសញ្ញា ហើយបានដេញតាមជន​សង្ស័យ ទៅដល់ភូមិខ្វាវ ឃុំត្បែង ស្រុកបន្ទាយស្រី ខេត្តសៀមរាប និងបានសហការគ្នាជាមួយកម្លាំងនគរបាលស្រុកបន្ទាយស្រី ចុះឃាត់ខ្លួន ជនសង្ស័យទី១.ឈ្មោះ វ៉ាន់ ធី  ហៅវ៉ាន់ ថា ភេទប្រុស អាយុ ២៩ឆ្នាំ មុខរបរមិនពិតប្រាកដ  មានស្រុកកំណើតភូមិសំពៅមាស ឃុំសានគរ ស្រុកកំពង់ស្វាយ ខេត្តកំពង់ធំ ស្នាក់នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប។ ទី២.ឈ្មោះ នួន  ប៊ុនទេពីន ហៅពីន ភេទប្រុស អាយុ២២ឆ្នាំ មុខរបរមិនពិតប្រាកដ​ មានស្រុកកំណើត ឃុំអូរឫស្សី ស្រុកក្រចេះ ខេត្តក្រចេះស្នាក់នៅភូមិចុងកៅស៊ូ សង្កាត់ស្លក្រាម​ ក្រុង-ខេត្តសៀមរាប រួមជាមួយវត្ថុតាង (ម៉ូតូជនរងគ្រោះ) រួចយកមកសួរនាំ​។

ក្រោយពីសួរនាំជនសង្ស័យ ឈ្មោះ វ៉ាន់ ធី  ហៅវ៉ាន់ថា បានឆ្លើយសារភាពថា ខ្លួនទើបតែចេញពីពន្ធធនាគារ កាលពីថ្ងៃទី២៩ ខែសីហា ឆ្នាំ២០២២ ហើយខ្លួនពិតជាបាន​លួចកាច់សោ យកម៉ូតូខាងលើ ជាមួយឈ្មោះ នួន  ប៊ុនទេពីន ពិតមែន​។

ចំណែក​ឈ្មោះ នួន  ប៊ុនទេពីន ហៅពីន បានឆ្លើយសារភាពថា ពិតជាបានធ្វើសកម្មភាព កាច់សោ​ ក​ លួចយកម៉ូតូ ជាមួយឈ្មោះ វ៉ាន់ ធី ហៅ វ៉ាន់​ថា ពិតប្រាកដមែន ហើយកាលពីមុនខ្លួនធ្លាប់ធ្វើសកម្មភាព លួចយកម៉ូតូរបស់គេចំនួន ០២ដងរួចមកហើយ ជាមួយជនសង្ស័យម្នាក់ទៀត ឈ្មោះ អ៊ុយ ហៅ មូស ដែលលើកទី​១ មិនចាំថ្ងៃ តែ​នៅក្នុងខែកញ្ញា ឆ្នាំ២០២២ វេលាម៉ោង ២៤:០០នាទី ខ្លួន និង​ឈ្មោះអ៊ុយ បានចូលលួចយកម៉ូតូ ០១គ្រឿង ម៉ាកហុងដាឌ្រីម សេ១២៥ ពណ៌ ខ្មៅ ស៊េរីឆ្នាំ ២០១៧ មិនចាំ លេខតួ និង លេខម៉ាស៊ីន ព្រមទាំងស្លាកលេខ ស្ថិតនៅចំនុច សង្កាត់ ស្វាយដង្គំ ក្រុង សៀមរាប ខេត្ត សៀមរាប, លើកទី២ នៅថ្ងៃទី​១៩ ខែ​កញ្ញា ឆ្នាំ២០២២ វេលាម៉ោង ២:៣០នាទី ខ្លួន និងឈ្មោះ អ៊ុយ បានចូលលួចយកម៉ូតូ ០១គ្រឿងទៀតម៉ាក Honda  Dream C១២៥ ពណ៌​ខ្មៅ ស៊េរីឆ្នាំ​២០១២ មិនចាំ​លេខតួ និង​លេខម៉ាស៊ីន ព្រមទាំងស្លាកលេខ ​ស្ថិតនៅចំនុច ភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។

ក្រោយពីលួចបាន ឈ្មោះ អ៊ុយ ជាអ្នកយកទៅលក់នៅភ្នំពេញ ហើយលែងឃើញឈ្មោះ អ៊ុយ មកវិញតែម្ដង។

ជនសង្ស័យឈ្មោះ សុខ វាសនា ហៅ ស្នា បានឆ្លើយសារភាពថា ខ្លួនត្រូវបានបក្ខពួក ឱ្យយកម៉ូតូពីឈ្មោះ វ៉ាន់ ធី ​ហៅ វ៉ាន់ថា ក្នុងពេលមកយកម៉ូតូ ក៏ត្រូវសមត្ថកិច្ចឃាត់បានតែម្តង ហើយវត្ថុតាងដកហូតមានម៉ូតូចំនួន ០២គ្រឿង មាន: ទី១/ម៉ាកHonda dream c125 ពណ៌ ខ្មៅ ស៊េរីឆ្នាំ២០២១ពុំមានផ្លាកលេខ លេខតួ+ម៉ាស៊ីន៦០០១៩១៤។ទី២ /ម៉ាក Honda dream c125 ពណ៌ខ្មៅ ស៊េរីឆ្នាំ២០២២ ពុំមានផ្លាកលេខលេខតួ+ម៉ាស៊ីន ៦៣៥០៨៨០។ ទី៣/សោរកែច្នៃចំនួន ១គ្រាប់។ ទី៤./ទូរស័ព្ទដៃចំនួន ០២ គ្រឿង។

លោក​បាន​បញ្ជាក់ទៀតថា ក្រោយឃាត់ខ្លួនជនសង្ស័យ​ យកមកសួរ​នាំរួច កម្លាំងនគរបាល​ជំនាញយើង បានធ្វើតេស្ត​រកសារធាតុញៀនលើខ្លួនជន​សង្ស័យខាងលើ ទាំង ០៣នាក់ ជាលទ្ធ ផលជនសង្ស័យឈ្មោះ នួន ប៊ុន ទេពីន ភេទប្រុស( វិជ្ជមាន)។ ជនសង្ស័យខាងលើ ត្រូវបានបញ្ជូនទៅ​ការិយាល័យជំនាញ ដើម្បី​បញ្ជូនបន្ត ទៅកាន់តុលាការខេត្ត ចាត់ការតាមនីតិវិធីនៃច្បាប់ព្រហ្មទណ្ឌ៕ ​ច័ន្ទ រស្មី