រាជធានីភ្នំពេញ ៖ ទោះបីសេចក្តីស្នើច្បាប់វិសោធនកម្មច្បាប់ស្តីពីគណបក្សនយោបាយត្រូវបានប្រមុខរដ្ឋស្តីទីចុះហត្ថលេខារួចយ៉ាងណាក្តី ក៏អតីតប្រធានគណបក្សសង្គ្រោះជាតិ លោក សម រង្ស៊ី បានអះអាងថា ព្រះមហាក្សត្រមិនព្រមឡាយព្រះហស្តលេខានោះទេ។ ប៉ុន្តែមន្ត្រីជាន់ខ្ពស់គណបក្សប្រជាជនកម្ពុជាថ្លែងថា ការលើកឡើងបែបនេះដើម្បីកេងចំណេញនយោបាយតែប៉ុណ្ណោះ។
លោក សម រង្ស៊ី បានសរសេរលើបណ្តាញសង្គមរបស់លោក នៅថ្ងៃទី១៦ ខែមីនាថា «សូមអរព្រះគុណព្រះមហាក្សត្រ សម្តេចព្រះបរមនាថ នរោត្តម សីហមុនី ដែលព្រះអង្គមិនយល់ព្រមឡាយព្រះហស្តលេខាលើវិសោធនកម្មច្បាប់ស្តីពីគណបក្សនយោបាយ ដែលបើកផ្លូវឲ្យគណបក្សប្រជាជនកម្ពុជា រំលាយគណបក្សសង្គ្រោះជាតិតាមតែអំពើចិត្ត» ។
លោកថ្លែងថា ការធ្វើវិសោធនកម្មនេះ រំលោភរដ្ឋម្មនុញ្ញយ៉ាងធ្ងន់ធ្ងរ ជាពិសេសត្រង់ចំណុចដែលតម្រូវឲ្យព្រះរាជាណាចក្រកម្ពុជា អនុវត្តលទ្ធិប្រជាធិបតេយ្យសេរីពហុបក្ស ។ សព្វថ្ងៃនេះ មានគណបក្សតែ២នៅរដ្ឋសភា ហើយបើគណបក្សប្រជាជនកម្ពុជារំលាយគណបក្សសង្គ្រោះជាតិ នោះជាការវិលត្រឡប់ទៅរករបបបក្សតែមួយដូចកាលសម័យកុម្មុយនីស្ត គឺមិនអាចហៅថាពហុបក្សបានទេ ។
ទោះជាយ៉ាងណាក្តី អ្នកនាំពាក្យគណបក្សប្រជាជនកម្ពុជាបានអះអាងថា ច្បាប់នេះត្រូវបានឡាយចុះហត្ថលេខារួចហើយ ដោយសម្តេចវិបុលសេនាភក្តី សាយ ឈុំ ប្រមុខរដ្ឋស្តីទី ស្របតាមមាត្រា២៨ថ្មី ជំពូកទី២ នៃរដ្ឋធម្មនុញព្រះរាជាណាចក្រកម្ពុជា ។
លោក សម រង្ស៊ី គូសបញ្ជាក់ថា «ដោយសារតែព្រះអង្គមិនយល់ព្រមឡាយព្រះហស្តលេខាលើវិសោធនកម្មដ៏ព្រៃផ្សៃនេះ ទើបព្រះអង្គបានយាងទៅស្រុកចិន ដើម្បីកុំឲ្យមានព្រះនាមអាក្រក់ក្នុងប្រវត្តិសាស្ត្រ» ។
អតីតប្រធានគណបក្សសង្គ្រោះជាតិរូបនេះក៏បានលើកពីរឿងអតីតកាលរបស់ព្រះវររាជបិតា គឺសម្តេចព្រះនរោត្តម សីហនុ ដែលកាលពីឆ្នាំ២០០៤ ក៏ព្រះអង្គមិនបានយល់ព្រម
ឡាយព្រះហស្តលេខាលើច្បាប់ព្រៃផ្សៃមួយទៀត គឺវិសោធនកម្មរដ្ឋធម្មនុញ្ញ ដែលអនុញ្ញាតឲ្យតំណាងរាស្ត្របោះឆ្នោតជាកញ្ចប់ជ្រើសរើសនាយករដ្ឋមន្ត្រី និងប្រធានរដ្ឋសភា តាមរយៈការបោះឆ្នោតតែមួយ តែម្តង ហៅថាបោះឆ្នោតជាកញ្ចប់។ ពេលនោះ ក៏ព្រះមហាក្សត្របានគេចខ្លួន ដោយយាងទៅប្រទេសចិន ទុកឲ្យប្រមុខរដ្ឋស្តីទីចុះហត្ថលេខាជំនួសព្រះអង្គ ។
សូម្បីតែសម្តេច ជា ស៊ីម ក៏បានគេចខ្លួនទៅប្រទេសថៃ ដោយសារតែលោកក៏មិនយល់ព្រមចុះហត្ថលេខាលើវិសោធនកម្មនោះដែរ ហើយទុកឲ្យលោក ញឹក ប៊ុនឆៃ ចុះហត្ថលេខាជំនួសក្នុងឋានៈជាអនុប្រធានព្រឹទ្ធសភា ។
ទោះជាយ៉ាងណាក្តី បើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជា និងជាសមាជិករដ្ឋសភា បានអះអាងថា បណ្តាសេចក្តីព្រាងច្បាប់ ឬសេចក្តីស្នើច្បាប់ដែលត្រូវបានអង្គការនីតិប្បញ្ញត្តិអនុម័តតាមនីតិវិធីពីក្នុងអង្គប្រជុំរដ្ឋសភា បន្ទាប់មកមកដល់អង្គប្រជុំព្រឹទ្ធសភារួចហើយ សេចក្តីព្រាងច្បាប់ ឬសេចក្តីស្នើច្បាប់នេះនឹងត្រូវបញ្ជូនទៅក្រុមប្រឹក្សាធម្មនុញ្ញ ដើម្បីពិនិត្យពិភាក្សាពីធម្មនុញ្ញភាព តើបណ្តាខ្លឹមសារនៅក្នុងច្បាប់នេះ មានអ្វីជាទំនាស់ជាមួយរដ្ឋធម្មនុញ្ញឬទេ ? ក្រោយពីពិនិត្យគ្រប់ជ្រុងជ្រោយរួចហើយ មិនមានបញ្ហាអ្វីប្រាសចាកពីខ្លឹមសាររដ្ឋធម្មនុញ្ញទេ ក្រុមប្រឹក្សាធម្មនុញ្ញ ចេញសេចក្តីសម្រេចមួយបញ្ជាក់ថា សេចក្តីព្រាងច្បាប់ឬសេចក្តីស្នើច្បាប់នេះមានធម្មនុញ្ញភាពត្រឹមត្រូវ ។
លោក សុខ ឥសាន ថ្លែងទៀតថា បន្ទាប់ពីបានសេចក្តីសម្រេចរបស់ក្រុមប្រឹក្សាធម្មនុញ្ញហើយបែបបទនឹងត្រូវបញ្ជូនទៅព្រះបរមរាជវាំង ដើម្បីក្រាបបង្គំទូលថ្វាយព្រះមហាក្សត្រ ទ្រង់ព្រះរាជទានទ្បាយព្រះហស្តលេខាលើព្រះរាជក្រមប្រកាសឲ្យប្រើប្រាស់ច្បាប់ដែលអង្គនីតិប្បញ្ញត្តិបានអនុម័តរួចនោះជាធរមាន ។
លោក សុខ ឥសាន គូសបញ្ជាក់ថា «មាត្រា២៨ថ្មី ជំពូកទី២នៃរដ្ឋធម្មនុញ្ញព្រះរាជាណាចក្រកម្ពុជា ចែងថា ព្រះមហាក្សត្រទ្រង់ទ្បាយព្រះហស្តលេខាលើព្រះរាជក្រមឲ្យប្រើច្បាប់ដែលរដ្ឋសភាបានអនុម័ត និងព្រឹទ្ធសភាបានពិនិត្យសព្វគ្រប់រួចហើយ និងទ្រង់ទ្បាយព្រះហស្តលេខាលើព្រះរាជក្រឹត្យ តាមសេចក្តីស្នើសុំពីគណៈរដ្ឋមន្ត្រី ។
ក្នុងពេលដែលព្រះមហាក្សត្រប្រឈួន ហើយត្រូវព្យាបាលព្រះរោគនៅបរទេស ក្នុងពេលនោះព្រះមហាក្សត្រមានសិទ្ធិផ្ទេរអំណាចទ្បាយព្រះហស្តលេខានៅលើព្រះរាជក្រម ឬព្រះរាជក្រឹត្យខាងលើនេះ ទៅប្រមុខរដ្ឋស្តីទីចុះហត្ថលេខាជំនួសដោយព្រះរាជសារប្រគល់សិទ្ធិ» ។
ជាងនេះទៀត មាត្រា៣០ថ្មីនៃរដ្ឋធម្មនុញ្ញចែងថា ក្នុងរយៈពេលព្រះមហាក្សត្រទ្រង់អវត្តមាន ប្រធានព្រឹទ្ធសភាទទួលភារកិច្ចជាប្រមុខរដ្ឋស្តីទី ។ ក្នុងករណីដែលប្រធានព្រឹទ្ធសភា ពុំមានលទ្ធភាពបំពេញភារកិច្ចជាប្រមុខរដ្ឋស្តីទីជំនួសព្រះមហាក្សត្រ ពេលព្រះអង្គទ្រង់អវត្តមាន ការទទួលភារកិច្ចជាប្រមុខរដ្ឋស្តីទី ត្រូវអនុវត្តតាមវាក្យខ័ណ្ឌទី២ និងទី៣ នៃមាត្រា១១ថ្មី ។
មាត្រា១១ថ្មីចែងថា ក្នុងករណីដែលប្រធានព្រឹទ្ធសភា ពុំមានលទ្ធភាពបំពេញភារកិច្ចជាប្រមុខរដ្ឋជំនួសព្រះមហាក្សត្រ ក្នុងឋានៈជាព្រះរាជានុសិទ្ធិ ពេលព្រះអង្គទ្រង់ប្រឈួនជា
ទម្ងន់ ដូចមានចែងក្នុងវាក្យខ័ណ្ឌខាងលើ ប្រធានរដ្ឋសភាជាអ្នកបំពេញភារកិច្ចនេះ ។
ដូច្នេះនៅពេលអវត្តមានព្រះមហាក្សត្រ ដែលព្រះអង្គយាងទៅព្យាបាលព្រះរាជសុខភាព នៅទីក្រុងប៉េកាំង សម្តេចវិបុលសេនាភក្តី សាយ ឈុំ ទទួលភារកិច្ចជាប្រមុខរដ្ឋស្តីទី មានភារកិច្ចស្របច្បាប់ក្នុងការចុះហត្ថលេខាលើព្រះរាជក្រមប្រកាស ឲ្យប្រើប្រាស់ច្បាប់ស្តីពីវិសោធនកម្មច្បាប់ស្តីពីគណបក្សនយោបាយ ។
លោក សុខ ឥសាន សង្កត់ធ្ងន់ថា «ការនិយាយថា ព្រះមហាក្សត្រមិនសព្វព្រះហប្ញទ័យ មិនចង់ទ្បាយព្រះហស្តលេខាលើព្រះរាជក្រមប្រកាសឲ្យប្រើច្បាប់ស្តីពីវិសោធនកម្មច្បាប់ស្តីពីគណបក្សនយោបាយ គឺជាការឃោសនាបំភាន់មតិសាធារណៈ ក្នុងចេតនាកេងចំណេញខាងនយោបាយ ។ ការនិយាយរបស់ពួកទាំងនេះ បានរំលោភរដ្ឋធម្មនុញ និងជាការប្រមាថព្រះចេស្តាព្រះមហាក្សត្រយ៉ាងជាក់ស្តែង មិនអាចប្រកែកបានទ្បើយ» ៕
ចែករំលែកព័តមាននេះ