រាជធានីភ្នំពេញ ៖ កម្លាំងសមត្ថកិច្ចកងរាជអាវុធហត្ថរាជធានីកាលពីថ្ងៃទី១៥ មីនា បានបញ្ជូនខ្លួនជនសង្ស័យម្នាក់ទៅកាន់សាលាដំបូងពាក់ពន្ធករណីចេញមូលប្បទានប័ត្រគ្មានសាច់ប្រាក់
រាជធានីភ្នំពេញ ៖ កម្លាំងសមត្ថកិច្ចកងរាជអាវុធហត្ថរាជធានីកាលពីថ្ងៃទី១៥ មីនា បានបញ្ជូនខ្លួនជនសង្ស័យម្នាក់ទៅកាន់សាលាដំបូងពាក់ពន្ធករណីចេញមូលប្បទានប័ត្រគ្មានសាច់ប្រាក់ (សែកស្អុយ)ចំនួន១២.៧៥០ ដុល្លារអាមេរិក ។ ជនសង្ស័យឈ្មោះ ពៅ សុវណ្ណ ភេទប្រុស អាយុ២៨ឆ្នាំ មុខរបរអ្នកម៉ៅការសំណង់ស្នាក់នៅផ្ទះជួល ភូមិកំបូល សង្កាត់កំបូល ខណ្ឌពោធិសែនជ័យ ។
ករណីឃាត់ខ្លួនជនសង្ស័យខាងលើនេះត្រូវបានសមត្ថកិច្ចកងរាជអាវុធហត្ថឲ្យដឹងថា កាលពីថ្ងៃទី១៣ មិនា ២០១៧ ជនរងគ្រោះ ឈ្មោះ ប៉ោ លី ភេទប្រុស អាយុ៤៦ឆ្នាំ ជនជាតិខ្មែរ មុខរបរជាអាជីវករ ស្នាក់នៅផ្ទះលេខ៨៣A ផ្លូវលេខ១២២ សង្កាត់ផ្សារដេប៉ូ៣ ខណ្ឌទួលគោក បានធ្វើការឃាត់ខ្លួនជនសង្ស័យឈ្មោះ ពៅ សុណ្ណ នៅចំណុចមុខផ្សារTK តាមបណ្តោយផ្លូវ៣១៥ សង្កាត់បឹងកក់ ខណ្ឌទួលគោក ហើយក៏បាននាំមកប្រគល់ឲ្យសមត្ថកិច្ច ដោយចោទប្រកាន់ថា បានរំលោភលើទំនុកចិត្តចេញមូលប្បទានប័ត្រគ្មានសាច់ប្រាក់ពាក់ពន្ធទិញដែកចំនួន២៥តោន ។
មន្ត្រីអាវុធហត្ថបន្តថា មុនកើតហេតុកាលពីព្រឹកថ្ងៃទី២១ ខែមករា ឆ្នាំ២០១៧ ជនសង្ស័យបានណាត់ជួប ជាមួយជនរងគ្រោះនៅភោជនីយ៍ដ្ឋានមួយកន្លែងស្ថិតក្នុងខណ្ឌ៧មករា ដើម្បីនិយាយគ្នាពីរឿងធ្វើអាជីកម្ម ម៉ៅការសំណង់ផ្សេងៗ ដោយជនសង្ស័យបានកម្មង់ទិញដែកសរសៃរ ពីជនរងគ្រោះចំនួន២៥តោន ស្មើទឹកប្រាក់ ១២.៧៥០ ដុល្លារ ហើយជនរងគ្រោះ ក៏ឯកភាពទទួលយកសែក១សន្លឹក ។
ក្រោយពីជនរងគ្រោះបានទទួលសែកនោះហើយក៏បានដឹកដែកតាមការកម្មង់របស់ជនសង្ស័យចំនួន២៥តោន លុះថ្ងៃទី២១ ខែកុម្ភៈ ឆ្នាំ២០១៧ ជនរងគ្រោះបានទៅ បើកសាច់ប្រាក់នៅធានាគារសហពាណិជ្ជ ដោយប្រើសែករបស់ជនសង្ស័យទើបដឹងថា សែកនោះមិនមានសាច់ប្រាក់ទេទើបព្យាយាមទាក់ទងទៅជនសង្ស័យតាម ទូរស័ព្ទដោយបានប្រាប់ជនសង្ស័យថា សែកនោះគ្មានលុយទេហើយជនសង្ស័យ សុំពន្យាពេលដោយសន្យានឹងរកលុយសងជនរងគ្រោះវិញ ក្រោយជនសង្ស័យបានព្យាយាមគេចវេស រហូតមកដល់ថ្ងៃទី១៣ មីនា ទើបជនរងគ្រោះឈ្មោះ ប៉ោ លី ក៏បានជួបជនសង្ស័យនៅផ្សារTK បន្ទាប់មកសមត្ថកិច្ចក៏ធ្វើការឃាត់ខ្លួនដើម្បីចាត់ការតាមនីតិវិធី ៕
ចែករំលែកព័តមាននេះ