ខេត្តព្រះសីហនុ ៖ លោកសរ កក្កដា អភិបាលនៃគណៈអភិបាលក្រុងព្រះសីហនុបានឲ្យដឹងថា នៅរសៀលថ្ងៃទី៨ ខែតុលា ឆ្នាំ២០២២នេះ មានភ្ញៀវទេសចរជាតិ និងអន្តរជាតិជាច្រើនកុះករមកលេងកម្សាន្តក្នុងក្រុងព្រះសីហនុ…
ខេត្តព្រះសីហនុ ៖ លោកសរ កក្កដា អភិបាលនៃគណៈអភិបាលក្រុងព្រះសីហនុបានឲ្យដឹងថា នៅរសៀលថ្ងៃទី៨ ខែតុលា ឆ្នាំ២០២២នេះ មានភ្ញៀវទេសចរជាតិ និងអន្តរជាតិជាច្រើនកុះករមកលេងកម្សាន្តក្នុងក្រុងព្រះសីហនុ នាថ្ងៃសៅរិ៍ចុងសប្តាហ៍នេះ។
លោកបានបន្តថា កំណើនភ្ញៀវទេសចរកើនឡើងមកលេងក្រុងព្រះសីហនុច្រើន គឺសង្កេតឃើញថា ក្រោយមានការដាក់ដំណើរការសាកល្បងឲ្យប្រើប្រាស់នូវផ្លូវល្បឿនលឿនភ្នំពេញ-ព្រះសីហនុ កាលពីថ្ងៃទី០១ ខែតុលា កាលពីពេលកន្លងទៅថ្មីៗនេះ។
ជាមួយគ្នាពលរដ្ឋ និងភ្ញៀវទេសចរបានសម្តែងការសាទរក្រោយមកលេងក្រុងព្រះសីហនុ ប្រកបដោយការសប្បាយរីករាយក្រោយពីអាជ្ញាធរបានរៀបចំសណ្តាប់ធ្នាប់ផ្លូវសាធារណៈ និងបរិស្ថានឆ្នេរស្រស់ស្អាត មានរបៀបរៀបរយផ្លូវខ្វាតខ្វែងជិះស្ទើរវង្វេង ដោយសារតែល្បឿននៃការអភិវឌ្ឍមានការហក់ឡើងលឿនពេក។
យ៉ាងណាមិញ អាជ្ញាធរនៅតែបន្តអំពាវនាវដល់ពលរដ្ឋ និងភ្ញៀវទេសចរដែលមកលេងក្រុងព្រះសីហនុ សូមចូលរួមរក្សាអនាម័យសណ្តាប់ធ្នាប់បរិស្ថាន រាល់ពេលបងប្អូនយកអាហារមកហូបចុកក្រាលកន្ទេលតាមឆ្នេរសាធារណៈរួច សូមវេចខ្ចប់សំរាមដាក់ក្នុងធុងឲ្យបានត្រឹមត្រូវ ព្រោះថា អាជ្ញាធរបានរៀបចំធុងសំរាមតាមឆ្នេរទុកសម្រាប់ឲ្យបងប្អូនដាក់សំរាមរួចហើយ ដូច្នេះសូមកុំទុកចោលលើឆ្នេរខ្សាច់ឬបោះចោលពាស់វាលពាស់កាល៕
ចែករំលែកព័តមាននេះ