ម្នាក់ភ្ជង់ប្តី ២នាក់ចាប់ប្រពន្ធឱ្យចូលក្នុងបន្ទប់…
ខេត្តព្រៃវែង ៖ ក្រុមចោរប្លន់ប្រដាប់អាវុធគ្នា៣នាក់បានធ្វើសកម្មចូលភ្ជង់សំឡុតផ្ទះប្ដីប្រពន្ធនៅស្រុកកំពង់ត្របែក ដោយចាប់ប្ដីចងរួចប្រតាយប្រតប់
ខេត្តព្រៃវែង ៖ ក្រុមចោរប្លន់ប្រដាប់អាវុធគ្នា៣នាក់បានធ្វើសកម្មចូលភ្ជង់សំឡុតផ្ទះប្ដីប្រពន្ធនៅស្រុកកំពង់ត្របែក ដោយចាប់ប្ដីចងរួចប្រតាយប្រតប់ ឆក់ខ្សែ.ក ខ្សែដៃ និងក្រវិលពីប្រពន្ធអស់ជិត១តម្លឹងរួចគេចបាត់ ។ ហេតុការណ៍នេះបានកើតឡើងកាលពីថ្ងៃទី១៤ មីនា វេលាម៉ោង១០យប់នៅចំណុចផ្ទះរបស់ជនរងគ្រោះឈ្មោះ នេត មិត្ត ភេទប្រុស អាយុ៤២ឆ្នាំ និងប្រពន្ធឈ្មោះ ឡុង សាវ៉េន ភេទស្រី អាយុ៤០ឆ្នាំ នៅភូមិព្រៃស្នួល ឃុំគោខ្ចក ស្រុកកំពង់ត្របែក ។
ប្រភពពីលោក នេត មិត្ត ដែលជាជនរងគ្រោះបានឲ្យដឹងថា នៅពេលកើតហេតុខាងលើក្រុមចោរគ្នា៣នាក់បានចូលមកដល់ក្នុងបន្ទប់ផ្ទះរបស់គាត់ រួចបានធ្វើសកម្មភាពដោយឲ្យគាត់ជាប្តីដេកផ្កាប់មុខរួចក៏ចងដៃមកក្រោយ ខណៈនោះមានជនល្មើសម្នាក់បានទៅភ្ជង់លោកជាប់ និង២នាក់ទៀតបានចូលទៅចាប់ដៃប្រពន្ធរបស់គាត់ដែលនៅក្រៅបន្ទប់ឲ្យចូលមកក្នុងបន្ទប់ហើយក៏ប្រតាយប្រតប់ឆក់យក ខ្សែ.ក មាសអស់១កំណាត់ទម្ងន់៤ជី ខ្សែដៃមាស១ខ្សែទម្ងន់៥ជី ក្រវិលមាសម្ខាងទម្ងន់២ជី៥ហ៊ុន ដែលសរុបចំនួន៩ជី២ហ៊ុន៥លី ។ ប្រភពបានបន្តថា ក្រុមចោរមិនមានផ្ទុះអាវុធទេហើយនៅពេលនោះក្រុមចោរហាក់មានការផ្អើលៗ ពេលកំពុងធ្វើសកម្មភាពដោយក្រោយពីបានមាសអស់ក្រុមចោរក៏បានរត់គេចបាត់ទៅ ។
លោកឧត្ដមសេនីយ៍ទោ ស្រេង ជា ស្នងការខេត្តបានឲ្យដឹងថា ករណីនេះគឺមិនមានផ្ទុះអាវុធ ឬប្រើហិង្សាអីធ្ងន់ធ្ងរនោះទេដោយក្រុមចោរធ្វើសកម្មភាពប្រហែល៣នាទីប៉ុណ្ណោះរួចក៏រត់បាត់ភ្លាម ចំណែកអាវុធដែលក្រុមជនសង្ស័យយកមកធ្វើសកម្មភាពនោះនៅមិនទាន់ស្គាល់ម៉ាកទេ ។ លោកស្នងការបន្តថា ចំពោះមុខសញ្ញាយើងនៅមិនទាន់កំណត់បាននោះទេហើយសមត្ថកិច្ចយើងកំពុងស្រាវជ្រាវយ៉ាងយកចិត្តទុកដាក់បំផុតដើម្បីវែកមុខជនដៃដល់យកមកផ្ដន្ទាទោសតាមនីតិវិធី ៕
ចែករំលែកព័តមាននេះ