ក្រោយពីក្លិបកញ្ជ្រោង Leicester ទម្លាក់ Sevilla ពីយូហ្វាឆេមពានលីគក្នុងលទ្ធផលសរុបទាំងពីរជើង ៣-២ ត្រឹមវគ្គ១៦ក្រុមរួចមក អ្នកចាំទីដៃទីមួយប្រចាំក្លិប Juventus កីឡាករ Gianluigi Buffon បានលើកឡើងទាំងក្តីបារម្ភថា Leicester គឺជាក្រុមតែមួយគត់ ដែលលោកមិនចង់ប្រកួតប៉ះនៅវគ្គ៨ក្រុមចុងក្រោយ ។ ការលើកឡើងដូចនេះ ធ្វើឡើងបន្ទាប់ពី Buffon បានសង្កេតឃើញទម្រង់លេងដ៏ល្អរបស់Leicester ដែលអាចរកគ្រាប់បាល់បានចំនួន២គ្រាប់ ក្នុងការប្រកួតប៉ះក្លិប Sevilla កាលពីថ្ងៃអង្គារកន្លងទៅ ។
អ្នកចាំទីវ័យ ៣៨ឆ្នាំរូបនេះបាននិយាយថា៖ «Leicester គឺជាក្រុមដ៏គួរឱ្យគ្រោះថ្នាក់មួយ ដែលអាចបង្កផលវិបាកដល់គូប្រកួតបាន» ។ លោកបន្ថែមថា៖«ការប្រកួតតទល់ជាមួយក្លិបកញ្ជ្រោងនេះ អាចធ្វើឱ្យក្តីស្រមៃរបស់យើងត្រូវបាត់បង់» ។
គួរបញ្ជាក់ថា ក្លិបដែលអាចឡើងទៅវគ្គ ៨ក្រុមចុងក្រោយ ត្រូវបានរកឃើញចំនួន៦ក្លិបរួចហើយក្នុងនោះរួមមាន៖ Bayern, Real Madrid, Barcelona, Dortmund, Juventus និងក្លិប Leicester ដោយរង់ចាំស្វាគមន៍ក្លិបចំនួន២ទៀត ។ ចំពោះការចាប់ឆ្នោតប្រកួតក្នុងវគ្គ៨ក្រុមចុងក្រោយ នឹងត្រូវធ្វើឡើងនៅថ្ងៃទី១៧ មីនា នៅប្រទេសស្វ៊ីស ។ ចំណែកការប្រកួតវគ្គនេះក៏តម្រូវឱ្យប្រកួតចំនួនពីរជើង (Home/Away) ផងដែរ ៕
ចែករំលែកព័តមាននេះ