ម្ចាស់សង្វៀនបញ្ជល់មាន់អួតថា បង់លុយឱ្យប៉ូលិសខ្លាចអីកាសែត
ខេត្តព្រៃវែង ៖ ល្បែងបញ្ជល់មាន់និងល្បែងអាប៉ោង២កន្លែងធំៗ កំពុងបើកដំណើរការលេងយ៉ាងរលូននៅក្នុងទឹកដីស្រុកកំពង់ត្របែក
ខេត្តព្រៃវែង ៖ ល្បែងបញ្ជល់មាន់និងល្បែងអាប៉ោង២កន្លែងធំៗ កំពុងបើកដំណើរការលេងយ៉ាងរលូននៅក្នុងទឹកដីស្រុកកំពង់ត្របែក ដែលមួយកន្លែងនៅភូមិគោក្រោក ឃុំគោខ្ចក និងមួយកន្លែងទៀតនៅភូមិតង្កៀបក្តាម ឃុំពាមមន្ទារ ។ មហាជនមួយចំនួននិយាយថា កន្លែងទាំង២នេះ បានបើកដំណើរការយូរខែណាស់មកហើយ ឯសមត្ថកិច្ចមិនដែលឃើញមានវិធានការបង្ក្រាបឬទប់ស្កាត់ឡើយ ។
បើតាមម្ចាស់សង្វៀនបញ្ជល់មាន់និងអាប៉ោងនៅភូមិគោក្រោក និយាយថា មុននឹងគាត់អាចដំណើរការវង់ល្បែងនេះបាន គឺបានរត់ការទៅសមត្ថកិច្ចប៉ុស្តិ៍ អធិការដ្ឋាន និងស្នងការដ្ឋានរួចរាល់ហើយ បើមិនរត់ការជាមុនទេ មិនអាចលេងស្រួលទេ សមត្ថកិច្ចនឹងបង្ក្រាបមិនខាន ។ ជារៀងរាល់ខែ គាត់ត្រូវចំណាយលុយជាច្រើនសម្រាប់សមត្ថកិច្ចតាំងពីក្រោមរហូតដល់លើ ក្នុងមួយខែមិនក្រោម៨លានរៀលទេ គឺពិបាកណាស់មិនសូវចំណេញទេ ។
ម្ចាស់សង្វៀនល្បែងនេះនិយាយទៀតថា ប្រសិនជាអ្នកសារព័ត៌មានចង់ផ្សាយក៏ផ្សាយទៅ ព្រោះថាមិនមែនអ្នកសារព័ត៌មានជាអ្នកចាប់ទេ គឺសមត្ថកិច្ចជាអ្នកចាប់បង្ក្រាប ។ ជាមួយនេះ បើចង់ផ្សាយគឺផ្សាយ២កន្លែងតែម្តងទៅ ព្រោះក្រៅពីកន្លែងគាត់នេះ នៅភូមិតង្កៀបក្តាម ឃុំពាមមន្ទារ ក៏មានបើកលេងដូចគ្នាដែរហើយសង្វៀនធំជាងកន្លែងគាត់ទៅទៀត ហើយរត់ការតែត្រឹមអធិការដ្ឋានទេ ចំណែកគាត់រត់ការតាំងពីក្រោមរហូតដល់លើ ។
ពាក់ព័ន្ធនឹងករណីនេះ ប្រភពពីមន្ត្រីនគរបាលប៉ុស្តិ៍នឃុំគោខ្ចកសូមមិនបញ្ចេញឈ្មោះបានឲ្យដឹងថា អ្នកញៀនល្បែងបញ្ជល់មាន់ និងអាប៉ោងនៅទីនេះកើតមានច្រើនខែហើយ តែគេរត់ការដល់ថ្នាក់លើមិនហ៊ានទៅមើលទេ ព្រោះអាចត្រូវពួកគេនោះចំអកដាក់ ។
ចំណែកឯសង្វៀនបញ្ជល់មាន់ និងអាប៉ោងដុះស្លែនៅភូមិតង្កៀបក្តាមវិញ ក្រុមអ្នកញៀនល្បែងទាំងនោះនិយាយថា ម្ចាស់សង្វៀនបានសុំថ្នាក់លើដើម្បីបើកសង្វៀននេះរួចរាល់ហើយ។ បើមិនសែនអ្នកតា ហ៊ានតែលេងដឹងតែពីចប់ហើយបញ្ជល់មិនបានមួយគូទេ សមត្តកិច្ចមកដល់ភ្លាម។ សង្វៀនបញ្ជល់មាន់នេះ ក្នុងមួយថ្ងៃមានបញ្ជល់ពី១០ទៅ១២គូ ហើយក្នុងមួយគូភ្នាល់ចាប់ពី១លានរៀលឡើងទៅ ។ នៅចុងសប្តាហ៍ មានបញ្ជល់ចាប់ពី១២គូទៅ២០គូ គឺបញ្ជល់ពីម៉ោង៩ព្រឹករហូតដល់ល្ងាច ។ បើគូណាត់វិញ គេភ្នាល់ពី៤លានរៀលឡើងទៅ ដោយម្ចាស់សង្វៀនដកតុង១០ភាគរយ ហើយបើអាប៉ោងវិញយកប្រចាំថ្ងែតែមិនដឹងប៉ុន្មានទេ តែឮម្ចាស់សង្វៀនថាចាយលុយមន្ត្រីនគរបាលស្រុកច្រើនណាស់ ។
អធិការនគរបាលស្រុកកំពង់ត្របែក លោក សួន សំអឿន ថ្លែងថា ការចោទប្រកាន់ថាមានការបង់លុយរបស់ម្ចាស់សង្វៀននោះលោកមិនបានដឹងទេ ។ លោកនឹងឲ្យមន្ត្រីចុះទៅបង្ក្រាបហើយរឿងដែលថាយកលុយជាថ្នូរនឹងការបើកភ្លើងខៀវនោះមិនពិតទេ ។
លោក ពៅ ជីវី ស្នងការរងនគរបាលខេត្តថ្លែងថា សង្វៀនបញ្ជល់មាន់និងអាប៉ោង២កន្លែងនៅស្រុកកំពង់ត្របែកនោះ លោកមិនបានដឹងទេ ហើយព័ត៌មានដែលថាមានអ្នករត់ការបង់លុយទើបមិនបង្ក្រាបនោះជារឿងមិនពិតឡើយ ។ ក្រោយពេលទទួលបានដំណឹងនេះ លោកនឹងឲ្យមន្ត្រីជំនាញចុះទៅបង្ក្រាបភ្លាម ។
សង្វៀនបញ្ជល់មាន់នៅស្រុកម៉ាឡៃ ជាយដែនខ្មែរ-ថៃ
ខេត្តបន្ទាយមានជ័យ ៖ សង្វៀនបញ្ជល់មាន់មួយកន្លែង កំពុងបើកលេងយ៉ាងគគ្រឹកគគ្រេងនៅភូមិថ្មី ឃុំម៉ាឡៃ ស្រុកម៉ាឡៃ ហើយអ្នកញៀនបញ្ជល់មាន់មានទាំងខ្មែរនិងថៃ ឯសមត្ថកិច្ចហាក់មិនខ្វល់ពីគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាលឡើយ ទើបសង្វៀនបញ្ជល់មាន់នេះមានដំណើរការ ។ នៅទីនោះ អ្នកលេងល្បែងបញ្ជល់មាន់មានចាស់មានក្មេង ស្រែកហ៊ោកញ្ច្រៀវនិយាយទាំងភាសាខ្មែរនិងថៃ ។ ពួកគេហាក់មិនខ្លាចកាមេរ៉ារបស់អ្នកកាសែតឡើយ ថែមទាំងនាំគ្នាស្រែកឌឺដងថាខ្លាចអីយេីងលេងលុយយើងតើ ។
នៅទីតាំងសង្វៀនបញ្ជល់មាន់នេះ ត្រូវបានប្រភពព័ត៌មានអះអាងថា គេលួចលេងយូរហើយដោយក្នុង១សប្តាហ៍បើកលេង២ថ្ងៃ គឺថ្ងៃចន្ទនិងថ្ងៃព្រហស្បតិ៍ ។ ម៉ូតូនិងយានយន្តនានា ត្រូវគេយកលាក់ទុកតាមព្រៃ ម៉ូតូខ្លះពាក់ផ្លាកលេខខេមរភូមិន្ទ ឯរថយន្តខ្លះពាក់ផ្លាកលេខធម្មតា តែមានអាវនិងមួកនគរបាលនៅក្នុងរថយន្ត ។
យ៉ាងណាក៏ដោយ ជុំវិញករណីលួចបើកលេងល្បែងស៊ីសងខាងលើនេះ លោក មាស ថាន នាយស្តីទីប៉ុស្តិ៍នគរបាលរដ្ឋបាលឃុំម៉ាឡៃ ប្រាប់កោះសន្តិភាពថា លោកនឹងហៅម្ចាស់ទីតាំងមកធ្វើកិច្ចសន្យាបញ្ឈប់ការលួចបើកល្បែងស៊ីសងតទៅទៀត ។ បើសិនម្ចាស់ទីតាំងមិនបញ្ឈប់តាមកិច្ចសន្យាទេ លោកនឹងចាត់វិធានការតាមផ្លូវច្បាប់ ដោយសុំគោលការណ៍ពីថ្នាក់ដឹកនាំចុះបង្ក្រាបតែម្តង ៕
ចែករំលែកព័តមាននេះ