ប្រជាពលរដ្ឋប្រុសស្រីប្រមាណ៥០០នាក់ មកពីឃុំចំនួន២ ក្នុង៨ភូមិ ធ្វើការតវ៉ានៅមុខសាលាឃុំបាគង ស្រុកប្រាសាទបាគង ខេត្តសៀមរាប ដើម្បីប្រឆាំងនឹងការទាមទារឱ្យពួកគេចាកចេញពីភូមិចាស់ទៅរស់នៅភូមិរុនតាឯក ដែលជា
ខេត្តសៀមរាប ៖ នាថ្ងៃទី៦ ខែតុលា ឆ្នាំ២០២២ ប្រជាពលរដ្ឋប្រុសស្រីប្រមាណ៥០០នាក់ មកពីឃុំចំនួន២ ក្នុង៨ភូមិ ធ្វើការតវ៉ានៅមុខសាលាឃុំបាគង ស្រុកប្រាសាទបាគង ខេត្តសៀមរាប ដើម្បីប្រឆាំងនឹងការទាមទារឱ្យពួកគេចាកចេញពីភូមិចាស់ទៅរស់នៅភូមិរុនតាឯក ដែលជាភូមិអភិវឌ្ឍន៍ថ្មី ប៉ុន្តែពួកគាត់នាំគ្នាស៊ូស្លា.ប់មិនព្រមចាកចេញពីភូមិកំណើតចាស់របស់ពួកគេជាដាច់ខាត។
តំណាងប្រជាពលរដ្ឋមកពីភូមិឪឡោក ឃុំបាគង ស្រុកប្រាសាទបាគង ខេត្តសៀមរាប បានប្រាប់ភ្នាក់កោះសន្តិភាពយើងឱ្យដឹងថា បងប្អូនប្រជាពលរដ្ឋដែលបាននាំគ្នាមកធ្វើការតវ៉ានៅមុខសាលាឃុំបាគង ស្រុកប្រាសាទបាគង ខេត្តសៀមរាបនេះ ក្រោយអាជ្ញាធរ និងមន្ត្រីជំនាញបានចុះមកស្រង់ស្ថិតិ និងសម្របសម្រួល និងសន្យារកដំណោះស្រាយ ដើម្បីឱ្យពួកគាត់រុះរើផ្ទះទៅរស់នៅភូមិរុនតាឯក ប៉ុន្តែពួកគាត់មិនព្រមចាកចេញពីភូមិកំណើតចាស់ជាដាច់ខាត។
តំណាងពលរដ្ឋបន្តថា គាត់នឹងរកដំណោះស្រាយមិនឱ្យបងប្អូនពួកគាត់ចាកចេញពីលំនៅដ្ឋានចាស់របស់គាត់ឡើយ បើទោះបីមន្ត្រីជំនាញ ដែលធ្វើការងារទាក់ទងនឹងការដោះដូរលំនៅដ្ឋាននេះយ៉ាងក៏ដោយ ក៏ពួកគាត់សុខចិត្តស៊ូស្លា.ប់នៅលើដីធ្លីនេះដដែល មិនព្រមចាកចេញឡើយ។
តំណាងបានបញ្ជាក់ទៀតថា ពួកគាត់មិនព្រមចាកចេញពីភូមិកំណើតដែលគាត់បានរស់នៅ ច្រើនជំនាន់មកហើយ ដែលជាកេរ្តិ៍ដំណែលវប្បធម៌ខ្មែរ តាំងពីបរមបុរាណមកម្ល៉េះ។ គាត់ បន្ថែមទៀតថា៖ « ខ្ញុំអត់ទៅទេ ខ្ញុំម៉េចទៅ ខ្ញុំអត់ស្ម័គ្រចិត្តទៅផង ព្រោះអីខ្ញុំរស់នៅទីនេះ កវែក កឆ្នាំងនៅលើទឹកដីពីជីដូនជីតាខ្ញុំនៅហ្នឹង តាំងពីមុនឆ្នាំ១៩៧៩ម្ល៉េះ ខ្ញុំអត់ចង់ទៅ បានសំណងពីរាជរដ្ឋាភិបាលដី ២០ x ៣០ ម៉ែត្រ ហើយអត់ចង់បានគោលនយោបាយប័ណ្ណក្រីក្រមួយសន្លឹកហ្នឹងដែរ ដែលមានរយៈពេល១០ឆ្នាំ និងលុយជាង១លានរៀលនោះទេ»។ ហើយពួកគេមានសិទ្ធិស្របច្បាប់ ព្រមទាំងមានប័ណ្ណចេញដោយអាជ្ញាធរជាតិអប្សរា ដែលបានអនុញ្ញាតឱ្យ ពួកគាត់សាងសង់ផ្ទះសម្បែងសម្រាប់រស់នៅផងដែរ មិនមែនអ្នកចំណាកស្រុកមកពីណាឡើយ គឺអ្នកភូមិនេះឯង។ ពាក្យស្លោកមួយឃ្លាថា «ខ្មែរមួយម៉ាត់ សូមឱ្យខ្ញុំមានលទ្ធភាពរស់នៅលើទឹកដីដ៏បវរនេះផង សូមមេត្តាកុំធ្វើការបណ្ដេញពួកខ្ញុំអី»។
ក្នុងនោះផងដែរ លោក យន់ វន់ មេឃុំបាគង បានមកសម្របសម្រួលថា ក្រុមការងារតម្រង់ទិសដោយសារបញ្ហាសំណង់ខុសច្បាប់ជាច្រើនកន្លែង ក្នុងរមណីយដ្ឋានអង្គរ បានចាប់ផ្តើមចុះវាស់វែងក្បាលដីនៅឃុំបាគង កាលពីពេលថ្មីៗនេះ ក្រុមការងារអាជ្ញាធរជាតិអប្សរា បានសហការជាមួយមន្ត្រីក្រសួងរៀបចំដែនដី នគររូបនីយកម្ម និងសំណង់ខេត្តសៀមរាប ចុះសួរនាំព័ត៌មានពីរឿងបងប្អូនប្រជាពលរដ្ឋចេញទៅរស់នៅភូមិរុនតាឯកថ្មី។
លោកមេឃុំថា «គាត់មកសួរយោបល់បងប្អូនប្រជាពលរដ្ឋ តើពួកគាត់ព្រមផ្លាស់ប្តូរទីលំនៅទៅរស់នៅរុនតាឯកអត់? បើទៅ គាត់នឹងរៀបចំឯកសារជូនទៅថ្នាក់លើ ដើម្បីបានចាប់ឆ្នោតយកក្បាលដីនៅរុនតាឯក។ ហើយព្រឹកនេះ ក្រុមការងារចុះមកទៀត ក៏មានបញ្ហាដល់បងប្អូនតែម្តង ទើបពួកគាត់នាំគ្នាប្រមូលផ្ដុំតវ៉ា ដោយសារពលរដ្ឋថា គាត់ជាពលរដ្ឋរស់នៅចាស់យូរយា រណាស់មកហើយ សំណូមពរសុំមិនចាកចេញជាដាច់ខាត»។
លោកមេឃុំ បានប្រាប់ទៀតថា លោកនិងសហការជាមួយភាគីពាក់ព័ន្ធទាំងអស់ ដើម្បីរកដំណោះស្រាយជូនពួកគាត់ និងផ្តល់យោបល់តាមក្រោយទៀត តែមិនបញ្ជាក់ថា មានលទ្ធភាពបែបណានោះទេ។
ក្នុងឱកាសនោះដែរ លោក សូ ប្លាតុង អភិបាលស្រុកប្រាសាទបាគង បានមានប្រសាសន៍ប្រាប់ថា គោលបំណងដែលប្រជាពលរដ្ឋមកធ្វើការតវ៉ានៅមុខសាលាឃុំបាគង ដើម្បីសុំឱ្យអាជ្ញាធរទុកដីធ្លី និងផ្ទះសម្បែងរបស់ពួកគាត់ ដែលជាលំនៅដ្ឋានចាស់នោះឱ្យនៅដដែល ដូច្នេះលោកនឹងយកសំដីរបស់បងប្អូនប្រជាពលរដ្ឋរាយការណ៍ជូនទៅថ្នាក់លើជាមុនសិន និង សូមឱ្យបងប្អូនរក្សាភាពស្ងៀមស្ងាត់ និងចូលរួមទាំងអស់គ្នា ដើម្បីឱ្យអាជ្ញាធរធ្វើការពិភាក្សាជាមួយអាជ្ញាធរអប្សរា។
លោកបានបញ្ជាក់ទៀតថា ចំពោះប្រជាពលរដ្ឋដែលមកធ្វើការតវ៉ាព្រឹកមិញនេះ ដែលមកពីភូមិចំនួន៨ ក្នុងឃុំចំនួន២ នោះ គឺពាក់ព័ន្ធបារាយណ៍ខាងកើតនេះ មានភូមិចំនួន២ ដែលពាក់ ព័ន្ធ គឺភូមិលលៃ និងភូមិស្ទឹង ក្រៅពីនោះភូមិផ្សេងពាក់ព័ន្ធផ្លូវបុរាណ និងផ្លូវជុំវិញប្រាសាទជាដើម មិនពាក់ព័ន្ធបារាយណ៍ទេ ហើយការវាស់វែងធ្វើជំរឿនជូនប្រជាពលរដ្ឋនោះ បានចប់សព្វគ្រប់។
លោកបានបន្ថែមថា ចំពោះភូមិទាំង៨ភូមិ ដែលពលរដ្ឋមកធ្វើការតវ៉ានេះ ដោយសារមានការពាក់ព័ន្ធជាមួយផែនទីរបស់អាជ្ញាធរជាតិអប្សរា ដែលត្រូវរើចេញ ហើយភូមិមួយៗមិនមែនឱ្យរើទាំងអស់នោះទេ គឺរើកន្លែងណាដែលអប្សរា គាត់គូសគំនូសក្រហម យើងមិនទាន់ដឹងមានប៉ុន្មានគ្រួសារនោះទេ នៅក្នុងបន្ទាត់ក្រហមនោះ ដោយសារពាក់ព័ន្ធនឹង៨ភូមិ។ ភូមិខ្លះតិច ភូមិខ្លះច្រើន ព្រោះវាអាស្រ័យទៅលើនៅក្នុងស្សូន ពណ៌ក្រហម ដែលជាមុខសញ្ញា។ មូលហេតុ សំខាន់ដែលពួកគាត់ធ្វើការតវ៉ានោះ ដោយសារពួកគាត់យល់ថា គាត់ជាអ្នកភូមិចាស់បុរាណជាយូរលង់ណាស់មកហើយ នេះជាចំណុចសំខាន់ដែលគោលដៅរបស់ពួកគាត់ មិនចង់ទៅនៅកន្លែងថ្មី។
គួរបញ្ជាក់ថា បន្ទាប់ពីមានក្រុមការងារចុះស្រង់ទិន្នន័យតាមផ្ទះរបស់បងប្អូនប្រជាពលរដ្ឋនៅក្នុងស្រុកប្រាសាទបាគងកន្លង ខណ:ពេលនោះក៏សម្តេចបានមានប្រសាសន៍សំណេះសំណាលជាមួយបងប្អូនប្រជាពលរដ្ឋស្ម័គ្រចិត្តរុះរើចេញពីតំបន់អង្គរ ទៅរស់នៅក្នុងតំបន់ភួមិរុនតាឯក ដែលជាភូមិអភិវឌ្ឍន៍ រុនតាឯកថ្មី ថា សុំអាជ្ញាធរមេត្តាមើលឡើងវិញនូវផ្ទះណា ដែលត្រូវរុះរើ ផ្ទះណាដែលមិនត្រូវរុះរើក្នុងតំបន់អង្គរ ទៅតាមជាក់ស្តែង តាមហ្នឹង»។
សូមបញ្ជាក់ផងដែរថា ពលរដ្ឋមកក្នុងស្រុកប្រាសាទបាគង ខេត្តសៀមរាប បានក្លាយជាគោលដៅមួយសំខាន់ក្នុងការកៀរគរឱ្យចាកចេញទៅរស់នៅភូមិរុនតាឯក ក្រោយរាជរដ្ឋាភិបាលប្រកាសពីបំណងស្ដារបារាយណ៍ខាងកើតឡើងវិញ។ ក្នុងនោះមាន ៖ ភូមិចំនួន៨ គឺមានភូមិរលួស ដែលជាភូមិបុរាណ តែវាស្ថិតនៅក្នុងបារាយណ៍ខាងកើត ដែលរដ្ឋាភិបាលចង់បញ្ចូលទឹកក្នុងអាងបុរាណនេះឡើងវិញ ក្នុងបំណងប្រមូលទឹក ដើម្បីប្រើប្រាស់ និងអភិរក្សប្រាសាទ ឡើងវិញ។
ក្នុងពិធីសំណេះសំណាលជាមួយពលរដ្ឋស្ម័គ្រចិត្តចេញទៅរស់នៅភូមិរុនតាឯក នាថ្ងៃទី១ ខែតុលា សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា ចង់ឱ្យមានទឹកក្នុងបារាយណ៍ខាងកើត ដែលអាចស្ដុកទឹក បាន៣០លានម៉ែត្រគីប ហើយថា ទោះបីមិនបានទាំងអស់ ក៏បានពាក់កណ្ដាលផងដែរ៕
ចែករំលែកព័តមាននេះ