ឃាត់ខ្លួនជនជាតិអង់គ្លេសម្នាក់ ស្នាក់នៅខុសច្បាប់ និងពាក់ព័ន្ធឃាតក.ម្ម
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញលោក រស់ ពិសិដ្ឋ នាព្រឹកថ្ងៃទី១៤ ខែមីនា ឆ្នាំ២០១៧ បានបញ្ជាឲ្យអនុរក្សពន្ធនាគារព្រៃស
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញលោក រស់ ពិសិដ្ឋ នាព្រឹកថ្ងៃទី១៤ ខែមីនា ឆ្នាំ២០១៧ បានបញ្ជាឲ្យអនុរក្សពន្ធនាគារព្រៃស ម១ បញ្ជូនបុរសជនជាតិអង់គ្លេសម្នាក់មកសាកសួរបន្ថែមជុំវិញការចូលមកស្នាក់នៅក្នុងប្រទេសកម្ពុជាដោយខុសច្បាប់។ ជនជាប់ចោទ TOBY JAMIE NELHAMS ភេទប្រុស អាយុ៤៤ឆ្នាំ ជនជាតិអង់គ្លេស មុខរបរជាប្រធានក្រុមហ៊ុន Springtide International Co.មានអាសយដ្ឋាននៅក្រុងព្រះសីហនុ រាជធានីភ្នំពេញ និងខេត្តសៀមរាប ត្រូវបានលោក សៀង សុខ ព្រះរាជអាជ្ញាររង នៃអយ្យការអមសាលាដំបូងរាជធានីភ្នំពេញ ចោទប្រកាន់ពីបទ លួចចូលមកស្នាក់នៅប្រទេសកម្ពុជា និងធ្វើការងារដោយខុសច្បាប់ដោយគ្មានសៀវភៅការងារ ប្រើប្រាស់ឯកសារដែលមានឈ្មោះផ្សេងពីឈ្មោះរបស់ខ្លួន និងឆបោក។
ជនជាប់ចោទរូបនេះត្រូវបានចៅក្រមស៊ើបសួរសម្រេចឃុំខ្លួនកាលពីថ្ងៃទី១៧ ខែកុម្ភៈ ឆ្នាំ២០១៧។ សូមជម្រាបថា កម្លាំងសមត្ថកិច្ចនាយកដ្ឋានគរបាលស៊ើបអង្កេត និងអនុវត្តនីតិវិធី នៃអគ្គនាយដ្ឋានអន្តោប្រវេសន៍ក្រសួងមហាផ្ទៃ កាលពីព្រឹកថ្ងៃទី១៥ កុម្ភៈ ២០១៧ បានបញ្ជូនបុរសជនជាតិអង់គ្លេសម្នាក់ ទៅកាន់សាលាដំបូងរាជធានីភ្នំពេញ ពាក់ព័ន្ធថា លួចចូលមកស្នាក់នៅកម្ពុជាខុសច្បាប់ គ្មានលិខិតឆ្លងដែន គ្មានសៀវភៅការងារ និងសង្ស័យជាប់ជាមេគំនិតនៅពីក្រោយឃាតកម្ម សម្លាប់ជនជាតិអៀកឡង់ម្នាក់នៅប្រទេសថៃ។ ជនសង្ស័យ រូបនោះឈ្មោះ TOBY JAMIE NELHAMS ភេទប្រុស អាយុ៤៤ឆ្នាំ ជនជាតិអង់គ្លេស មុខរបរជាប្រធានក្រុមហ៊ុន Springtide International Co.មានអាសយដ្ឋាននៅក្រុងព្រះសីហនុ រាជធានីភ្នំពេញ និងខេត្តសៀមរាប។
ប្រភពព័ត៌មានត្រូវបានគេបង្ហើបឲ្យដឹងថា ជនសង្ស័យត្រូវបានសមត្ថកិច្ចនគរបាលនាយកដ្ឋានស៊ើបអង្កេត និងអនុវត្តនីតិវិធី ក្រសួងមហាផ្ទៃឃាត់ខ្លួននៅមុខហាងកាហ្វេមួយក្នុងព្រលានយន្តហោះអន្តរជាតិភ្នំពេញ កាលពីថ្ងៃទី០៥ កុម្ភៈ ២០១៧ ដើម្បីនាំទៅសាកសួរពាក់ព័ន្ធចូលមកស្នាក់នៅកម្ពុជាខុសច្បាប់។ បន្ទាប់ពីសាកសួរដំណើររឿងចូលមកស្នាក់ប្រទេសកម្ពុជាគ្មានច្បាប់ទម្លាប់នោះ សមត្ថកិច្ចនគរបាលនាយដ្ឋានស៊ើបអង្កេត និងអនុវត្តនីតិវិធី បានដីកាឲ្យស្វែងរកចាប់ខ្លួនឈ្មោះ TOBY JAMIE NELHAMS នេះពាក់ព័ន្ធករណីឃាតកម្មទៅលើជនជាតិអៀកឡង់ម្នាក់ឈ្មោះ TONY KENWAY ភេទប្រុស អាយុ៣៩ឆ្នាំ ប្រព្រឹត្តកាលពីថ្ងៃទី២៤ មករា ២០១៧ នៅទីក្រុងប៉ាតាយ៉ា ប្រទេសថៃ។
ប្រភពព័ត៌មានបន្តថា ជនសង្ស័យជនជាតិអង់គ្លេសថាបានជាប់សង្ស័យជាមេគំនិត សម្លាប់ជនជាតិអៀកឡង់ មូលហេតុខឹងជនជាតិអៀកឡង់ជំពាក់ប្រាក់ចំនួន៨លាន៥សែនបាត ក្នុងមុខជំនួញរកស៊ីដាក់ហ៊ុនជាមួយគ្នានៅប្រទេសថៃនោះ ។ ក្រោយពេលសម្លាប់ជនជាតិអៀកឡង់រួចហើយ ជនជាតិអង់គ្លេសរូបនេះបានរត់គេចខ្លួនលួចចូលមកស្នាក់នៅប្រទេសកម្ពុជា និងបានប្រកបមុខរបររកស៊ីបើកធ្វើក្រុមហ៊ុនដូចរៀបរាប់ខាងលើ ដោយបានពឹងពាក់មន្ត្រីយោធាម្នាក់នៅក្រុងព្រះសីហនុ ឲ្យជួយរត់ការរួមទាំងអាជ្ញាប័ណ្ណបើកធ្វើក្រុមហ៊ុនទៅក្រសួងពាណិជ្ជកម្មផង។
នៅពេលសមត្ថកិច្ចទទួលបានដីកាឲ្យចាប់ខ្លួនរបស់តុលាការប្រទេសថៃនោះ ទើបបានសមត្ថកិច្ចនគរបាលនាយកដ្ឋានស៊ើបអង្កេត និងអនុវត្តនីតិវិធី ក្រសួងមហាផ្ទៃ សុំការសម្រេចឃាត់ខ្លួនជនសង្ស័យបណ្តោះអាសន្នពីសំណាក់លោក សៀង សុខ ព្រះរាជអាជ្ញាររង នៃអយ្យការអមសាលាដំបូងរាជធានីភ្នំពេញ ដើម្បីបើកការអង្កេតបឋមសម្រាប់កសាងសំណុំរឿងបញ្ជូនទៅតុលការ ៕
ចែករំលែកព័តមាននេះ