ខេត្តកំពត ៖ ពលរដ្ឋនៅខេត្តកំពត ដែលមានរបរចិញ្ចឹមមាន់ជល់បានខឹងសម្បាយ៉ាងខ្លាំង ខណៈមន្ត្រីនគរបាលនៅតាមប៉ុស្តិ៍ កាលពីពេលថ្មីៗនេះ រួមជាមួយប្រជាការពារភូមិផង បានចុះតាមផ្ទះនៅក្នុងមូលដ្ឋានរបស់ខ្លួន និងឱ្យពលរដ្ឋណាដែលចូលចិត្តចិញ្ចឹមមាន់ជល់សម្រាប់លក់ ឬក៏យកទៅបញ្ជល់ក្នុងកាស៊ីណូ…
ខេត្តកំពត ៖ ពលរដ្ឋនៅខេត្តកំពត ដែលមានរបរចិញ្ចឹមមាន់ជល់បានខឹងសម្បាយ៉ាងខ្លាំង ខណៈមន្ត្រីនគរបាលនៅតាមប៉ុស្តិ៍ កាលពីពេលថ្មីៗនេះ រួមជាមួយប្រជាការពារភូមិផង បានចុះតាមផ្ទះនៅក្នុងមូលដ្ឋានរបស់ខ្លួន និងឱ្យពលរដ្ឋណាដែលចូលចិត្តចិញ្ចឹមមាន់ជល់សម្រាប់លក់ ឬក៏យកទៅបញ្ជល់ក្នុងកាស៊ីណូ ត្រូវធ្វើកិច្ចសន្យា ឈប់ឱ្យចិញ្ចឹមតទៅទៀត ។
ពលរដ្ឋម្នាក់ឈ្មោះ ម៉ៅ នឿន នៅភូមិរំពើន ឃុំស្ដេចគង់ខាងលិច ស្រុកបន្ទាយមាស ក៏ត្រូវនគរ បាលប៉ុស្តិ៍ស្ដេចគង់ខាងលិច ឱ្យធ្វើកិច្ចសន្យា ឈប់ចិញ្ចឹមមាន់ជល់ដែរ ។ អ្នកភូមិរូបនេះដែលជាអ្នកចិញ្ចឹមមាន់ជល់ជាលក្ខណៈគ្រួសារនិយាយថា គាត់មិនយល់ពីមូលហេតុដែលនគរបាលចុះមកធ្វើកំណត់ឱ្យគាត់ឈប់ចិញ្ចឹមមាន់ជល់នេះឡើយ ។
ពលរដ្ឋម្នាក់ទៀតនៅភូមិដើមពោធិ៍ ឃុំអង្គសុរភី ស្រុកកំពង់ត្រាច កាលពីព្រឹកថ្ងៃទី៦ ខែតុលា ឆ្នាំ២០២២ បាននិយាយប្រាប់អ្នកយកព័ត៌មានថា គាត់ចិញ្ចឹមមាន់ជល់ប្រហែល៣០ក្បាលដែរ តែគាត់ជាស្ត្រីមិនមែនចិញ្ចឹមទុកយកទៅបញ្ជល់ខ្លួនឯងទេ គឺចិញ្ចឹមសម្រាប់លក់ បើគេទិញហើយចង់គេយកទៅបញ្ជល់នៅកន្លែងណាគាត់មិនបានដឹងទេ ។
ការដែលសមត្ថកិច្ចហាមឃាត់មិនឱ្យពលរដ្ឋចិញ្ចឹមមាន់ជល់នេះ ក៏មានការលើកឡើងតាមបណ្តាញសង្គមយ៉ាងផុលផុសដែរ ដោយធ្វើការរិះគន់ចំពោះការហាមឃាត់នេះ ។ ប៉ុន្តែឯកឧត្តម ម៉ៅ ធនិន អភិបាលខេត្ត កាលពីព្រឹកថ្ងៃទី៤ ខែតុលា ឆ្នាំ២០២២កន្លងទៅ បានថ្លែងនៅក្នុងពិធីចែកអំណោយដល់ពលរដ្ឋរងគ្រោះដោយខ្យល់កន្ត្រាក់នៅឃុំត្រពាំងព្រីង ស្រុកទឹកឈូថា ប្រជាពលរដ្ឋអាចចិញ្ចឹមមាន់ជល់បាន តែឯកឧត្តមសំណូមពរដល់ពលរដ្ឋមិនឱ្យនាំគ្នាបញ្ជល់មាន់នៅក្នុងមូលដ្ឋានរបស់ខ្លួនឡើយ ។
ឯកឧត្តមអភិបាលខេត្ត បានសួរសំណួរទៅពលរដ្ឋថា បើអត់មានល្បែងស៊ីសងអុីចឹងតើសប្បាយ
ចិត្តឬទេ ? ទោះបីជាបែបណា ពលរដ្ឋជាទូទៅនៅក្នុងខេត្តកំពត បានសាទរប្រសាសន៍ឯកឧត្តម
អភិបាលខេត្ត ដែលឱ្យពលរដ្ឋចិញ្ចឹមមាន់ជល់បាន ។ មេធាវីមួយរូបបានបង្ហោះសារក្នុងហ្វេសប៊ុក
របស់លោក ទាក់ទិននឹងសំណួររបស់អ្នកចិញ្ចឹមមាន់ជល់ថា មានបងប្អូនខ្លះទូរស័ព្ទសួរខ្ញុំថា តើការហាមឃាត់ឬធ្វើកិច្ចសន្យាមិនឲ្យចិញ្ចឹមមាន់ឈ្មោលឬមាន់ជល់ ខុសច្បាប់ដែរឬទេ ? ជាចម្លើយបានប្រាប់ទៅវិញថា ពាក្យថាខុសច្បាប់ លុះត្រាណាតែមានច្បាប់ចែង ហើយយើងល្មើសនឹងច្បាប់ទើបហៅថាខុសច្បាប់ ។
បើអត់មានច្បាប់ចែង ខ្ញុំលើកទឹកចិត្តឲ្យកសិករយើងចិញ្ចឹមចុះ តែហាមបញ្ជល់ភ្នាល់ដាក់លុយ ។
សូមមន្ត្រីអនុវត្តច្បាប់ទាំងឡាយពិនិត្យឡើងវិញលើបញ្ហានេះ ព្រោះប្រជាកសិករយើងនៅក្រច្រើន
ណាស់ ៕
ចែករំលែកព័តមាននេះ