បុរសម្នាក់ជាកម្មករបូមខ្សាច់ ស្រវឹងស្រាបានលង់ទឹកស្លា.ប់
ខេត្តកណ្ដាល ៖ សាកសពយុវជនម្នាក់ជាកម្មករបូមខ្សាច់ ត្រូវបានគេប្រទះឃើញអណ្ដែតទឹកទន្លេមេគង្គ ក្នុងសភាពហើមស្អុយ កាលពីរសៀលថ្ងៃទី១៣ មីនា
ខេត្តកណ្ដាល ៖ សាកសពយុវជនម្នាក់ជាកម្មករបូមខ្សាច់ ត្រូវបានគេប្រទះឃើញអណ្ដែតទឹកទន្លេមេគង្គ ក្នុងសភាពហើមស្អុយ កាលពីរសៀលថ្ងៃទី១៣ មីនា ស្ថិតនៅភូមិពាម ឃុំរកាកោងទី១ ស្រុកមុខកំពូល ខេត្តកណ្តាល។ ការប្រទះឃើញសាកសពនេះ បន្ទាប់ពីជនរងគ្រោះបានបាត់ខ្លួនពីរថ្ងៃ បន្ទាប់ពីផឹកស្រាស្រវឹង បើកកាណូតទៅទិញស្រាថែមទៀតក៏បាត់រហូតមក។ មន្ត្រីនគរបាលស្រុក មុខកំពូល បានឱ្យដឹងថា ជនរងគ្រោះ ត្រូវបានគេស្គាល់ឈ្មោះ ភី សុផាត ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករបូមខ្សាច់ មានទីលំនៅភូមិសន្លុង ឃុំព្រៃឃ្នេស ស្រុកមេសាង ខេត្តព្រៃវែង។
សាក្សីបំភ្លឺបានប្រាប់នគរបាលថា នៅយប់ថ្ងៃទី១១ មីនា ជនរងគ្រោះ បានផឹកស្រាបៀរ នៅលើសាឡង់បូមខ្សាច់ ជាមួយកម្មករបូមខ្សាច់ដូចគ្នា៤នាក់ទៀត។ ពេលផឹកអស់ស្រានៅម៉ោងប្រហែល១០យប់ ជនរងគ្រោះបានបើកកាណូតតែម្នាក់ឯងថាទៅទិញស្រាបៀរថែមទៀត។ ពេលក្រោយមកទៀតគេមិនឃើញ ជនរងគ្រោះបើកកាណូត ត្រលប់ទៅវិញទេ ក៏មិនមានការចាប់អារម្មណ៍អីដែរ។ លុះពេលព្រឹកឡើង ទើបគេឃើញកាណូត ដែលជនរងគ្រោះ បើកនោះ អណ្ដែតទឹកទន្លេ និងមិនឃើញជនរងគ្រោះ ក៏មានការសង្ស័យថាជនរងគ្រោះ អាចស្រវឹងស្រាធ្លាក់ពីលើកាណូត ចូលក្នុងទឹកបាត់។
លុះនៅរសៀលថ្ងៃទី១៣ មីនា ឈ្មោះ ប៉ាក់ ចាន់ថន មេការបូមខ្សាច់បានចេញធ្វើការបូមខ្សាច់ក្នុងទន្លេកន្លែងកើតហេតុស្រាប់តែឃើញសាកសពអណ្ដែតទឹក ពីលើមកក្រោម ចម្ងាយពីច្រាំងប្រហែល៣០ម៉ែត្រ។ ភ្លាមនោះឈ្មោះ ប៉ាក ចាន់ថន បានទូរស័ព្ទទៅប្រាប់ឈ្មោះ ហិន ចន្ថា ដែលកំពង់ដើររកជនរងគ្រោះឲ្យមកមើល និងស្រង់យកសពដែលអណ្តែតទឹកមកដាក់នៅក្នុងវត្តរកាកោង។ នៅថ្ងៃដដែលផ្នែកជំនាញស្រុក បានចុះសហការជាមួយនគរបាលប៉ុស្តិ៍ និងអាជ្ញាធរមូលដ្ឋានធ្វើការពិនិត្យសាកសព ជនរងគ្រោះគឺពិតជាឈ្មោះ ភី សុផាត ដែលបានជិះកាណូតហើយបាត់ខ្លួនកាលពីយប់ ថ្ងៃទី១១ មីនា ប្រាកដមែន។
នៅលើខ្លួនសាកសពពិនិត្យឃើញមានសភាពហើមធុំក្លិន និងមានស្នាមរបកស្បែកលើដងខ្លួន និងលើមុខ របកដោយសារកំដៅថ្ងៃ មានឈាមហូរចេញតាមមាត់ និងច្រមុះ។ ភ្នែកទាំងពីរលាន អណ្ដាតខាំជាប់ដោយធ្មេញ នៅគូថមានចេញលាមក។ ការសន្និដ្ឋាន ផ្នែកជំនាញ និងគ្រូពេទ្យឃើញថា ជនរងគ្រោះស្លាប់ដោយសារលង់ទឹក។ សពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ