ឯកអគ្គរដ្ឋទូតកូរ៉េខាងជើងប្រចាំ អ.ស.ប កាលពីថ្ងៃទី១៣ មីនា បានបដិសេធថា បុរសត្រូវគេធ្វើឃាតនាពេលថ្មីៗនេះនៅម៉ាឡេស៊ីពុំមែនជាបងប្រុសម្តាយទីទៃរបស់មេដឹកនាំកូរ៉េខាងជើង លោកគីម ជុងអ៊ុនឡើយ រួចចោទប្រកាន់សហរដ្ឋអាមេរិក និងកូរ៉េខាងត្បូងថាជាអ្នកនៅពីក្រោយការធ្វើឃាតនេះ ។
ឯកអគ្គរដ្ឋទូតរូបនេះលោក KIM IL RYONG ថ្លែងទៅកាន់សារព័ត៌មានថា ការធ្វើឃាតនេះជាផ្លែផ្កានៃអំពើប្រកបដោយគ្រោះថ្នាក់របស់អាជ្ញាធរអាមេរិក និងកូរ៉េខាងត្បូងជាអំពើសំដៅបំផ្លាញមុខមាត់ថ្លៃថ្នូររបស់កូរ៉េខាងជើង ហើយធ្វើឱ្យរលាយប្រព័ន្ធសង្គមនិយម ។
លោក KIM IL RYONG ថ្លែងបែបនេះជាការឆ្លើយតបនឹងសំណួរមួយសួរពីការធ្វើឃាតនេះនាឱកាសនៃសន្និសីទសារព័ត៌មានមួយដែលលោករៀបចំធ្វើដើម្បីថ្កោលទោសសេចក្តីថ្លែងការណ៍នាពេលថ្មីៗនេះរបស់ក្រុមប្រឹក្សាសន្តិសុខ អ.ស.ប ដែលរិះគន់ការសាកល្បងមីស៊ីលបាលីស្ទិកចុងក្រោយរបស់ក្រុងព្យុងយ៉ាងថាជាការគំរាមកំហែងមួយចំពោះសន្តិភាព និងសន្តិសុខអន្តរជាតិ ។ លោកទទួលស្គាល់ថា ជនរងគ្រោះដោយការបំពុលកាលពីថ្ងៃទី១៣ កុម្ភៈ ដោយអ្នកវាយប្រហារ២នាក់នៅព្រលានយន្តហោះអន្តរជាតិក្រុងគូឡាឡាំពួរ ពិតជាជនជាតិកូរ៉េខាងជើងកាន់លិខិតឆ្លងដែនការទូត ។
ដោយចង់និយាយយោងដល់ប្រការដែលអាជ្ញាធរម៉ាឡេស៊ីកំណត់អត្តសញ្ញាណជនរងគ្រោះថាជាបងប្រុសលោកគីម ជុងអ៊ុន លោក KIM ថ្លែងថា អាជ្ញាធរអាមេរិក និងកូរ៉េខាងត្បូង ចោទប្រកាន់ដោយគ្មានមូលដ្ឋានលើកូរ៉េខាងជើង ដោយអះអាងថា ជនរងគ្រោះត្រូវបំពុលដោយសារធាតុបំពុលខ្ពស់ VX ។ លោកបន្តថា ក្រុងវ៉ាស៊ីនតោនធ្វើបែបនេះសំដៅដុតកំហឹងអន្តរជាតិចំពោះកូរ៉េខាងជើង ដើម្បីបង្កតាមគ្រប់មធ្យោបាយនូវសង្គ្រាមនុយក្លេអ៊ែរមួយជាមួយកូរ៉េខាងជើង ។ លោកសួរផងដែរថា តើពួកអ្នកវាយប្រហារបានសារធាតុគីមីហាមឃាត់ VX ពីណាមក? លោកថា អាមេរិកមានឃ្លាំងស្តុកធំនូវអាវុធខុសច្បាប់បែបនេះ ៕
ចែករំលែកព័តមាននេះ