រាជធានីភ្នំពេញ ៖ ទើបតែមានព័ត៌មានថា ជោគជ័យក្នុងវិស័យសម្ដែងភាពយន្តរហូតដល់ភ្លេចការប្រកួតនៅលើសង្វៀនសោះ កីឡាការិនី សម ថារ័ត្ន ដែលល្បីខាងក្បាច់គុនល្បុក្កតោត្រូវគេឃើញបញ្ចេញរឿងថ្មីជាប្រភេទរឿងវាយតប់ជាបន្តបន្ទាប់មើលទៅរស់រវើកមិនចាញ់រឿង «Jailbreak ការពារឧក្រិដ្ឋជន» ដែលធ្វើឱ្យនាងល្បីឈ្មោះនោះទេ ។ នេះជាស្នាដៃមួយថ្មីដែលមានការប្រកាសថា នឹងចេញបង្អួតមហាជននៅដំណាច់ខែមីនានេះ ខណៈរឿងថ្មីៗក៏បានទទួលថតស្របគ្នា នឹងដំណឹងឡើងសង្វៀនប្រកួតហាក់ស្ងប់ស្ងាត់ដូចចោរលួចសេះនោះ ។
សម ថារ័ត្ន បានសារភាពថា ប្រមាណជា២ឆ្នាំចុងក្រោយនាងបានទទួលឱកាសសម្ដែងភាពយន្ត និងក្លាយជាតារាសម្ដែងច្រើនឡើង ដោយសារតែនាងអាចសន្ទនាភាសាអង់គ្លេសបានល្អ និងចេះក្បាច់គុនវាយតប់បានរស់រវើក ។
នាងថា ឱ្យតែក្រុមផលិតករមានគំនិតផលិតរឿងបែបវាយតប់ ឬរឿងហក់លោត គឺនឹកដល់ឈ្មោះរបស់នាងភ្លាម ទើបនាងចេះតែមានការងារមិនសូវលស់ពេលដែលជួយឱ្យអាជីពសម្ដែងភាពយន្តរបស់នាងមិនសូវទំនេរ ។
នៅថ្ងៃទី៣០ មីនា ខាងមុខនេះ គេនឹងឃើញរូបនាងសម្ដែងក្នុងខ្សែភាពយន្តរឿង«លត់ដែកថែប»ដោយនាងត្រូវដើរតួជានារីវាយតប់ក្បាច់គុនល្បុក្កតោជាមួយអ្នកជំនាញក្បាច់គុនបុរាណខ្មែរ ដែលតំណាងដោយតួសម្ដែងមួយចំនួន និងអ្នកជំនាញក្បាច់គុនការ៉ាតេដូ ដែលតំណាងដោយលោក សុវណ្ណ គីរី ។ នាងថា នៅក្នុងរឿងនេះ នាងសម្ដែងអស់ពីសមត្ថភាពមិនខុសគ្នានឹងរឿង«Jailbreak ការពារឧក្រិដ្ឋជន»នោះទេ ទើបនាងរំពឹងថា នឹងកន្ត្រាក់ការចាប់អារម្មណ៍បានខ្ពស់នៅថ្ងៃដាក់បញ្ចាំង ។ នៅក្នុងរឿងនេះ ប្រជុំដោយអ្នកលេងក្បាច់គុន៣ប្រភេទច្រើននាក់ចម្រុះគ្នា ដើម្បីប្រៀបធៀបពីក្បាច់គុនបរទេស និងក្បាច់គុនល្បុក្កតោរបស់ខ្មែរនៅពេលប៉ះគ្នា។ នេះជារឿងធំថ្មីមួយដែលនាងសម្ងំថតច្រើនខែ ហើយដោយរំពឹងខ្ពស់ពីទំហំជោគជ័យ ។
សម ថារ័ត្ន បានអះអាងថា ខ្សែរឿងធំៗដែលនាងបានថតសុទ្ធតែមានការទទួលស្គាល់ទាំងអស់ ជាពិសេសរឿង«Jailbreak ការពារឧក្រិដ្ឋជន» និងរឿងរបស់អ្នកនាងអែនជេលីណា ជោលី ។ នាងក៏ត្រៀមខ្លួនបង្ហាញស្នាដៃក្នុងរឿងធំមួយទៀតគឺរឿង «ឃុនហ្លួងព្រះស្ដេចកន» ដែលត្រៀមដាក់បញ្ចាំងឆាប់ៗខាងមុខនេះ។ នាងថា ខ្សែរឿងទាំង៣សុទ្ធតែរឿងដែលជួយឱ្យនាងល្បីឈ្មោះក្នុងពិភពសម្ដែង ហើយក៏ចាត់ទុកថានាងបានក្លាយជានារីម្នាក់ដែលស្រឡាញ់ ងប់ងុលនឹងការសម្ដែងផងដែរទើបនាងទទួលសម្ដែងជាហូរហែដោយគ្មានធុញទ្រាន់បែបនេះ ។
យ៉ាងណាមិញ នាងក៏រំពឹងថា ខ្សែរឿង«លត់ដែកថែប»ដែលនឹងចាក់បញ្ចាំងក្នុងពេលដ៏ខ្លីនេះនឹងទទួលបានការគាំទ្រខ្លាំងមិនខានដោយសាររឿងនេះនាងបានបញ្ចេញក្បាច់គុនអស់ពីសមត្ថភាព។ នាងសារភាពថា ការសម្ដែងមិនមែនជាក្ដីស្រមៃរបស់ខ្លួននោះទេ ប៉ុន្តែដោយសារតែឱកាសហុចឱ្យ ហើយចំណូលដែលទទួលបានពីការសម្ដែងក៏ល្អជាងឡើងសង្វៀនប្រកួត ទើបនាងចាប់ផ្ដើមរយាលឆ្ងាយពីការហ្វឹកហាត់ ហើយទទួលយកការសម្ដែងច្រើនជាង ។ នាងមានគម្រោងទទួលថតកុនក្នុងពេលបន្តបន្ទាប់ ប៉ុន្តែសម្រាប់គម្រោងឡើងប្រកួត គឺមិនទាន់មានទេ ដោយសារសហព័ន្ធល្បុក្កតោ មិនមានការប្រកួតណាមួយ និងដោយសារតែគូប្រកួតក្នុងស្រុកមិនមាននោះផង ទើបការប្រឹងប្រែងហ្វឹកហាត់ដើម្បីឡើងរេញហាក់មិនសូវផ្ដល់ឱកាសឱ្យនាង ។ សម ថារ័ត្ន បន្តថា ស្ទើរជារៀងរាល់ថ្ងៃនាងរវល់នឹងរឿងថតកុនច្រើនជាងខ្វាយខ្វល់នឹងត្រៀមប្រកួត ។
នេះមិនមែនមានន័យថា នាងត្រូវបោះបង់ការប្រកួតហើយទទួលការសម្ដែងនោះទេ បើមានការប្រកួតធំៗនាងនឹងនៅតែទទួល ។ នាងថា ខ្លួនចង់ប្រកួតកីឡាប្រដាល់ដាក់ទ្រុង តែគណៈកម្មការរៀបចំមិនមានគូប្រកួតសម្រាប់នាង និងមិនមានការផ្គូផ្គងឱ្យនាងឡើងរេញទាល់តែសោះ ទើបនាងសម្រេចចិត្តឈោងចាប់អាជីពថតកុនធ្វើឆ្នាំងបាយជាជំនួស ។
ក្នុងចំណោមកីឡាករ-កីឡាការិនីល្បីឈ្មោះ សម ថារ័ត្ន បានក្លាយជាតារាសិល្បៈតែម្នាក់ ដែលមានឱកាសបានសម្ដែងក្នុងរឿងខ្នាតធំរបស់ផលិតករបរទេស ។ ក្រៅពីមានភាពរស់រវើកដោយសារតែមានជំនាញវាយតប់ស្រាប់ កីឡាការិនីម្នាក់នោះក៏ចេះសម្ដែងទឹកមុខបានល្អ ធ្វើឱ្យម្នាក់ៗកោតសរសើរពីសមត្ថភាពសម្ដែងផងដែរ ទើបផលិតករធំៗចាប់អារម្មណ៍ទាក់ទងឱ្យនាងសម្ដែងមិនសូវខាន ។ នាងអះអាងថា ការសម្ដែងក្នុងរឿងកន្លងមក មិនមែនដោយសារតែខ្សែទុយោ ឬចេះក្បាច់គុននោះទេ ប៉ុន្តែកត្តាសំខាន់ គឺនាងក៏ចេះសម្ដែងទឹកមុខតាមការតម្រូវរបស់ផលិតករដែលចង់បាន ។ ក្នុងនោះក៏មានការថែទាំរូបរាងមិនឱ្យបែកសាច់ និងមិនកែកុនមុខមាត់ធ្វើឱ្យខុសទម្រង់ដើម ក៏ជាការចង់បានរបស់ផលិតករផងដែរ ជាពិសេសផលិតករហូលីវូដ និងផលិតករបរទេសដែលត្រូវការតួសម្ដែងជាមុខបែបខ្មែរដូចជារូបនាង ៕
ចែករំលែកព័តមាននេះ