ទីក្រុងប៉េកាំង ៖ កាលពីថ្ងៃឡើងកាន់តំណែងដំបូងរបស់ប្រធានាធិបតីអាមេរិក លោក Donald Trump មានប្រសាសន៍ថា ៖ « ពួកយើងនឹងធ្វើតាមវិធានការដ៏សាមញ្ញពីរ គឺទិញផលិតផលអាមេរិក និងជួលបុគ្គលិកអាមេរិក» ។
លោកបានស្តីបន្ទោសក្រុមហ៊ុនផលិត មិនថាក្នុងស្រុក និងបរទេស ដែលប្រើប្រាស់ពលករប្រទេសដទៃដើម្បីផលិតផលិតផលសម្រាប់អតិថិជនអាមេរិក ប៉ុន្តែផលិតផលដែលមានយីហោរបស់កូនស្រីលោក នៅតែបន្តហូរចូលមកកាន់អាមេរិក ។
ផលិតផលទាំងនោះត្រូវបានផលិតក្នុងប្រទេសចិន ដោយក្រុមហ៊ុនអាមេរិកចំនួនបីបានអនុញ្ញាតឲ្យមានការផលិតសម្រាប់យីហោរបស់អ្នកនាង Ivanka Trump ដូចជា G-III, Mondani Handbags និង Marc Fisher Footwear ។
អាជីវកម្មរបស់កូនស្រីប្រធានាធិបតីម្នាក់នេះ បានជួបនឹងបញ្ហាយ៉ាងធំបន្ទាប់ពីផ្សារទំនើបធំៗក្នុងសហរដ្ឋអាមេរិកគឺ Nordstrom ប្រកាសកាលពីថ្ងៃសុក្រថា នឹងបញ្ឈប់ការលក់ផលិតផលរបស់អ្នកនាង ព្រោះតែការលក់មានភាពអន់ថយ ។
ក្នុងអំឡុងពេលធ្វើយុទ្ធនាការបោះឆ្នោត លោក Trump បានការពារក្នុងការប្រើប្រាស់ឈ្មោះលោកសម្រាប់ការផលិតផលិតផលនៅចិន ដូចជា ស្បែកជើង ក្រវាត់ក និងរ៉ូបស្ត្រីថា ជាអាជីវកម្មវ័យឆ្លាត ។
ក្នុងពេលតែមួយនេះដែរ លោកបានចោទប្រកាន់ប្រទេសចិនថា លួចការងារជនជាតិអាមេរិក តាមរយៈការធ្វើពាណិជ្ជកម្មមិនយុត្តិធម៌ និងទម្លាក់តម្លៃប្រាក់ ដោយរិះគន់យ៉ាងខ្លាំងដល់ក្រុមហ៊ុនអាមេរិកដូចជា Ford និង Nabisco ព្រោះតែផ្លាស់រោងចក្រទៅកាន់ប្រទេសដទៃ ។
យ៉ាងណាក្តី លោកប្រធានាធិបតីដូចជាស្ងាត់ស្ងៀមចំពោះផលិតផលរបស់កូនស្រីលោកដែលមានដាក់លក់ក្នុងផ្សារនៅអាមេរិកដូចជា Macy’s, Lord & Taylor និង TJ Maxx ។
លោកបែរជារិះគន់ Nordstrom កាលពីខែមុនទៅវិញ បន្ទាប់ពីពួកគេប្រកាសថា នឹងបញ្ឈប់ការលក់ផលិតផលយីហោរបស់កូនស្រីលោក ។
កាលពីខែមុន អ្នកនាង Ivanka បានចូលរួមក្នុងកិច្ចប្រជុំនៅ White House ជាមួយឪពុករបស់ខ្លួន ដើម្បីពិភាក្សាពីគោលនយោបាយនាំយកការងារមកកាន់អាមេរិកវិញ ។
បន្ទាប់ពីកិច្ចប្រជុំនោះ អ្នកនាំពាក្យម្នាក់របស់យីហោអ្នកនាង Ivanka Trump ប្រាប់ថា ក្រុមហ៊ុនពួកគេចែករំលែកគំនិតនាំយកការងារផ្នែកផលិតមកកាន់សហរដ្ឋអាមេរិក ហើយពួកគេចង់ចូលរួមពិភាក្សា ។
ពីរថ្ងៃបន្ទាប់ពីនោះ មានអាវស្ត្រីយីហោ Ivanka Trump ប្រមាណ៥ពាន់ត្រូវបាននាំចូលមកកាន់ Newark នៅ New Jersey ។
លើសពីនេះ យោងតាមសារព័ត៌មានក្នុងប្រទេសចិនឲ្យដឹងថា យ៉ាងតិចណាស់ ក៏មានរោងចក្រមួយនៅចិនភាគខាងត្បូងបានទទួលការកុម្មង់ស្បែកជើងប្រមាណ១ម៉ឺនគូសម្រាប់រដូវកាលខាងមុខផងដែរ ៕
ចែករំលែកព័តមាននេះ