សហរដ្ឋអាមេរិក ៖ ក្រសួងការងាររបស់សហរដ្ឋអាមេរិកបាននិយាយកាលពីថ្ងៃសុក្រថា សេដ្ឋកិច្ចអាមេរិកបានបន្ថែមការងារប្រមាណ២សែន៣ម៉ឺន៥ពាន់ក្នុងខែកុម្ភៈ ។
អត្រាគ្មានការងារធ្វើបានធ្លាក់ចុះពី៤,៨% ទៅ៤,៧% កាលពីខែមុន ។ វាជាការប្រសើរឡើងយ៉ាងខ្លាំងបើធៀបនឹងឆ្នាំ២០០៩ ដែលអត្រាគ្មានការងារបានកើនដល់១០% បន្ទាប់ពីវិបត្តិហិរញ្ញវត្ថុ ។
លោក Jeremy Cook ប្រធានសេដ្ឋវិទូក្នុង World First និយាយថា ៖ « សេដ្ឋកិច្ចអាមេរិកកំពុងតែដំណើរការយ៉ាងល្អក្នុងពេលនេះ » ។
ប៉ុន្តែសេដ្ឋវិទូនិយាយថា វាគឺជាបញ្ហាមួយសម្រាប់លោក Trump ដើម្បីធ្វើតាមការសន្យាថា នឹងបង្កើតការងារឲ្យបាន២៥លានក្នុងរយៈពេល១០ឆ្នាំខាងមុខ ។
កាលពីឆ្នាំមុន អត្រាការងារត្រូវបានបង្កើតថ្មីក្នុងមួយខែ គឺស្មើនឹង១៩ម៉ឺន ។ សេដ្ឋកិច្ចកំពុងតែបង្ហាញសញ្ញារឹងមាំផងដែរ ។ អត្រាកំណើននៃប្រាក់បៀវត្សបានកើនឡើង២,៨%កាលពីខែកុម្ភៈ បើធៀបនឹងមួយឆ្នាំមុន ។
ផ្នែកផលិតកម្មបានបន្ថែមការងារ២ម៉ឺន៨ពាន់ក្នុងខែកុម្ភៈ ។ លោក Trump សន្យាថា នឹងបង្កើនការងារក្នុងផ្នែកផលិតកម្ម តាមរយៈការសម្រេចកិច្ចព្រមព្រៀងល្អជាងមុនសម្រាប់សហរដ្ឋអាមេរិក ។ ក្រុមហ៊ុនសាងសង់បានទទួលបុគ្គលិកបន្ថែមប្រមាណ៥ម៉ឺន៨ពាន់នាក់កាលពីខែមុន ។
ប៉ុន្តែវិស័យផ្សេងទៀតមិនបានដំណើរការប្រសើរដូចផ្នែកសាងសង់ទេ ។ វិស័យលក់រាយបានបាត់បង់ការងារចំនួន២ម៉ឺន៦ពាន់ក្នុងខែកុម្ភៈ ខណៈក្រុមហ៊ុនធំៗដូចជា JCPenney ប្រកាសថា នឹងបិទហាងរបស់ខ្លួន ។ ចំណែកការងាររដ្ឋ និងដឹកជញ្ជូនបានកើនឡើងតិចតួចប៉ុណ្ណោះ ៕
ចែករំលែកព័តមាននេះ