ខេត្តកណ្ដាល ៖ កម្លាំងសមត្ថិច្ចចម្រុះ បានបើកប្រតិបត្តិការចុះឆែកឆេរទីតាំងស្តុកឈើ៤កន្លែងជាបន្តបន្ទាប់គ្នា ធ្វើឡើងកាលពីថ្ងៃទី១២ និង១៣ មីនា ស្ថិតនៅភូមិចំការចិន និងភូមិត្រពាំងត្នោត ក្នុងឃុំម្កាក់ ស្រុកអង្គស្នួល ខេត្តកណ្ដាល ដោយរកឃើញឈើជាច្រើនម៉ែត្រគូប ព្រមទាំងឃាត់ខ្លួនម្ចាស់ទីតាំងម្នាក់ នាំទៅកាន់អធិការដ្ឋានស្រុក ដើម្បីសាកសួរ ។
ការឃាត់ខ្លួននេះ ក្រោយពីរកឃើញថា ម្ចាស់ទីតាំងនេះមានច្បាប់អនុញ្ញាតអាជីវកម្មដែរ ប៉ុន្តែហួសសុពលភាពជាង១ឆ្នាំទៅហើយ មិនព្រមធ្វើបន្ត និងបានលួចនាំចូលឈើដោយខុសច្បាប់ថែមទៀត។
គួរបញ្ជាក់ថា ប្រតិបត្តិការនេះធ្វើឡើងជាប់គ្នា២ថ្ងៃ ដោយនៅថ្ងៃទី១២ មីនា កម្លាំងចុះទៅបង្ក្រាប២ទីតាំង រកឃើញនិងរឹបអូសឈើដុំចំនួន១០០ដុំ ឈើសន្លឹកចំនួនជាង៥០០សន្លឹក ព្រមទាំងម៉ាស៊ីនអារឈើមួយចំនួន ។ ទីតាំងទី១-ស្ថិតនៅក្នុងភូមិចំការចិន ឃុំម្កាក់ មានឈើធ្នង់ប្រភេទឈើដុំចំនួន៩៦ដុំ និងឈើសន្លឹកចំនួន៨៥សន្លឹក។ ទីតាំងទី២-ស្ថិតក្នុងភូមិត្រពាំងត្នោត ឃុំម្កាក់រកឃើញឈើបេង(ប្រណីត)៤កំណាត់ ឈើធ្នង់១២ដុំ និង៤១២សន្លឹក ដែលទាំងពីរនោះមានម្ចាស់តែមួយ និងត្រូវគេស្គាល់ឈ្មោះផុន
សុជាតិ អាយុ៣៣ឆ្នាំ មុខរបរបើកសិប្បកម្មកែច្នៃឈើខ្នាតតូច មានទីលំនៅក្នុង ភូមិចុងបឹង ឃំុម្កាក់ ស្រុកអង្គស្នួល ហើយក៏ត្រូវបានកម្លាំង ធ្វើការឃាត់ខ្លួននាំទៅសាកសួរនិងកសាង សំណុំរឿង។
ប្រភពដដែលបន្តថា ទីតាំងកែច្នៃឈើខុសច្បាប់នេះ បានដំណើរការយូរមកហើយ ដោយបាននាំឈើចូលពេលយប់ៗ និងយកឈើលាក់នៅក្នុងទឹក និងក្នុងព្រៃ ជាច្រើនកន្លែងដើម្បីគេចពីភ្នែកមហាជននិងភ្នែកសមត្ថកិច្ច ហើយម្ចាស់ទីតាំងបានកែច្នៃឈើទាំងនោះទៅជាតុ ទូ និងគ្រែលក់ ហើយពេលថ្មីៗនេះ ត្រូវបានប្រជាពលរដ្ឋលួចរាយការណ៍ប្រាប់ទើបកម្លាំងបានដឹង និងបានសហការណ៏គ្នាចុះធ្វើការបង្ក្រាបតែម្ដង ។
ចំពោះទីតាំងកែច្នៃឈើ ក្រៅពី៤កន្លែងដែលកម្លាំងសមត្ថកិច្ចចុះបង្ក្រាប គឺនៅមានច្រើនកន្លែងទៀត នៅក្នុងភូមិចុងបឹង ឃុំម្កាក់ ស្រុកអង្គស្នួល ដែលមានទីតាំងជាប់គ្នាជាមួយភូមិចំការចិន និងភូមិត្រពាំងត្នោតនេះ ហើយគេសង្ស័យថា គ្មានច្បាប់នោះឡើយ។
ចែករំលែកព័តមាននេះ