ទីក្រុងបាងកក ៖ ការនាំចេញសាច់បក្សីរបស់ប្រទេសថៃ ប្រហែលជាបន្តកើនឡើងក្នុងឆ្នាំនេះ ខណៈប្រទេសជាច្រើនបានទប់ស្កាត់ការនាំចូលសាច់បក្សីពីសហរដ្ឋអាមេរិក ដែលកំពុងជួបប្រទះការរាតត្បាតនៃជំងឺផ្តាសាយបក្សី ។
លោក Prasit Chalongchaichan អគ្គនាយករងរបស់ Charoen Pokphand Foods Plc (CPF) ថ្លែងថា ការទិញសាច់បក្សីដោយជនជាតិបរទេសបានកើនឡើងជាបន្តបន្ទាប់សម្រាប់ក្រុមហ៊ុនរបស់លោក បន្ទាប់ពីជំងឺផ្តាសាយបក្សីត្រូវបានរាយការណ៍ថា រាតត្បាតក្នុងប្រទេសជាច្រើន រួមទាំងសហរដ្ឋអាមេរិកជាអ្នកនាំចេញសាច់បក្សីធំជាងគេលេខ២ លើពិភពលោក ។
កាលពីថ្ងៃចន្ទ ប្រទេសកូរ៉េបានទប់ស្កាត់ការនាំចូលសាច់ និងពងបក្សីពីសហរដ្ឋអាមេរិកបន្ទាប់ពីមានការបញ្ជាក់ថា មេរោគ H7 ត្រូវប្រទះឃើញក្នុងកសិដ្ឋានចិញ្ចឹមមាន់នៅរដ្ឋ Tennessee សហរដ្ឋអាមេរិក កាលពីថ្ងៃអាទិត្យមុន។ ចំណែកប្រទេសជប៉ុន តៃវ៉ាន់ និងហុងកុង ក៏ត្រូវបានគិតថា នឹងធ្វើតាមដែរ ។
លោក Prasit បន្តថា សំខាន់ជាងនេះទៀត កូរ៉េខាងត្បូងក៏កំពុងតែជួបប្រទះបញ្ហាជំងឺផ្តាសាយបក្សីដែរ ដែលបើកផ្លូវដល់ការនាំចេញសាច់បក្សីពីប្រទេសថៃកាន់តែធំឡើង។
គួរបញ្ជាក់ថា ប្រទេសកូរ៉េខាងត្បូងត្រូវបានរាយការណ៍ថា បានសម្លាប់បក្សីចំនួន៥ម៉ឺនក្បាលនៅតាមកសិដ្ឋាន ដោយសារមានមេរោគកាលពីថ្ងៃពុធ ចំនួនពីរករណី ។
លោកបន្តថា ៖ « ការនាំចេញសាច់បក្សីរបស់ប្រទេសថៃគឺល្អណាស់ ខណៈការិយាល័យអភិវឌ្ឍន៍បសុសត្វបានពង្រឹងការត្រួតពិនិត្យលើរាល់ដំណើរការផលិតកម្មសាច់បក្សី ដើម្បីធានាពីសុវត្ថិភាពនៃការនាំចេញនេះ » ។
CPF គិតថា ការនាំចេញនៃផលិតផលសាច់មាន់ទាំងឆ្អិនស្រាប់ និងក្លាសេទៅកាន់កូរ៉េខាងត្បូង នឹងកើនពី៣ពាន់តោនក្នុងឆ្នាំ២០១៦ មកជាង១ម៉ឺនតោនក្នុងឆ្នាំនេះ ។
កាលពីឆ្នាំមុន CPF បាននាំចេញសាច់បក្សីសរុបចំនួន១៣ម៉ឺនតោន ភាគច្រើនទៅកាន់អាស៊ីនិងអឺរ៉ុប ដោយព្យាករថា នឹងកើនឡើងពី១៥%ទៅ២០%ក្នុងឆ្នាំ២០១៧ ។
ក្នុងឆ្នាំនេះដែរ ក្រុមហ៊ុនខាងលើព្យាករថា ការនាំចេញសាច់បក្សីសរុបនឹងកើនដល់៧៨ម៉ឺនតោន ក្នុងតម្លៃសរុបដល់១១០ប៊ីលានបាត ។
CPF ព្យាករថា ប្រាក់ចំណូលរបស់ពួកគេនឹងកើន១០%ក្នុងឆ្នាំនេះ ពីចំនួន៤៦០ប៊ីលានបាតក្នុងឆ្នាំ២០១៦ ៕
ចែករំលែកព័តមាននេះ