រាជធានីភ្នំពេញ ៖ ស្ត្រីម្នាក់រួមនឹងបុរសម្នាក់ជាជនជាតិអូស្ត្រាលីកំពុងតែជិះម៉ូតូទៅសណ្ឋាគារណាហ្គាវើលត្រូវជនសង្ស័យ២នាក់ឆក់កាបូបស្ពាយបានសម្រេចហើយជិះរត់គេចខ្លួនបាត់ស្រមោល ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៩និង២០នាទីយប់ថ្ងៃទី១៣ មីនា តាមបណ្តោយផ្លូវ២៤០កែងផ្លូវ៥១ នៅចំណុចភូមិ៤ សង្កាត់ចតុមុខ ខណ្ឌដូនពេញ ។ ជនរងគ្រោះមានឈ្មោះ MAN DYKA ភេទស្រី អាយុ៣៥ឆ្នាំ ជាជនជាតិអូស្ត្រាលី មុខរបរធ្វើការនៅសណ្ឋាគារណាហ្គាវើល ស្នាក់នៅផ្ទះជួល ផ្លូវ១៩ សង្កាត់ចតុមុខ ខណ្ឌដូនពេញ ។
តាមប្រភពព័ត៌មានពីសមត្ថកិច្ចបានឱ្យដឹងថា មុនពេលកើតហេតុជនរងគ្រោះមានគ្នា២នាក់បានហៅម៉ូតូឌុបឱ្យឌុបទៅកន្លែងធ្វើនៅសណ្ឋាគារណាហ្គាវើល ខណៈពេលជិះម៉ូតូឌុបចេញពីផ្លូវ៦៣បត់ឡើងទៅផ្លូវ២៤០ មកដល់ចំណុចកើតហេតុផ្លូវ២៤០កែងផ្លូវ៥១ ក៏ស្រាប់តែលេចមុខជនសង្ស័យ២នាក់ជិះម៉ូតូធន់ធំម៉ាកXR ពណ៌ខ្មៅមិនចាំស្លាកលេខបានជិះមកជិតហើយធ្វើសកម្មភាពឆក់កាបូបស្ពាយរបស់ជនរងគ្រោះបានសម្រេចហើយជិះរត់គេចខ្លួនបាត់ស្រមោល នៅក្នុងកាបូបស្ពាយរបស់ជនរងគ្រោះបានបាត់លុយដុល្លារហុងកុងសរុបចំនួន៣.៨៧០ដុល្លារ ស្មើនិង៥៤០ដុល្លារ ទូរស័ព្ទដៃ២គ្រឿងម៉ាក IPhone 6រួមនិងឯកសារធ្វើការនៅណាហ្គាវើលមួយចំនួនទៀត ។ ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលចតុមុខដើម្បីឱ្យសមត្ថកិច្ចស្រាវជ្រាវតាមចាប់ជនសង្ស័យ ៕
ចែករំលែកព័តមាននេះ