ស្តារវិបត្តិកូវីដ! ហុងកុងនឹងទាក់ទាញភ្ញៀវទេសចរដោយការផ្តល់សំបុត្រយន្តហោះឥតគិតថ្លៃ
ហុងកុង ៖ ហុងកុងនឹងផ្តល់សំបុត្រយន្តហោះដោយឥតគិតថ្លៃចំនួន ៥០ម៉ឺនសំបុត្រ ដែលមានតម្លៃ
ហុងកុង ៖ ហុងកុងនឹងផ្តល់សំបុត្រយន្តហោះដោយឥតគិតថ្លៃចំនួន ៥០ម៉ឺនសំបុត្រ ដែលមានតម្លៃប្រមាណ ២ពាន់លានដុល្លារហុងកុង ស្មើនឹង ២៥៤.៨លានដុល្លារអាមេរិក ខណៈដែលតំបន់រដ្ឋបាលពិសេសមួយនេះ កំពុងព្យាយាមជំរុញឧស្សាហកម្មទេសចរណ៍ ដែលរងគ្រោះដោយសារវិបត្តិកូវីដ១៩។
ហុងកុង បានលុបចោលច្បាប់មួយចំនួនដើម្បីទប់ស្កាត់ការឆ្លងរីករាលដាលកូវីដ១៩ នៅប៉ុន្មានសប្តាហ៍ថ្មីៗនេះ។ ទោះជាយ៉ាងណាក៏ដោយ ក្រុមហ៊ុនអាកាសចរណ៍ធំៗ កំពុងតស៊ូដើម្បីទទួលបានកាលវិភាគហោះហើររបស់ពួកគេត្រឡប់មកវិញនៅក្នុងកម្រិតដើម មុនពេលផ្ទុះការឆ្លងរីករាលដាលជំងឺកូវីដ១៩។
លោក Dane Cheng នាយកប្រតិបត្តិក្រុមប្រឹក្សាទេសចរណ៍ហុងកុងបាននិយាយថា ហុងកុងនឹងចាប់ផ្តើមយុទ្ធនាការផ្សាយពាណិជ្ជកម្មសំបុត្រយន្តហោះឥតគិតថ្លៃ។ ដោយសំបុត្រឥតគិតថ្លៃដែលត្រូវបានទិញ ដើម្បីគាំទ្រក្រុមហ៊ុនអាកាសចរណ៍ហុងកុង អំឡុងពេលការរាតត្បាតជំងឺកូវីដ១៩ នឹងត្រូវចែកចាយនៅឆ្នាំក្រោយដល់អ្នកដំណើរទាំងក្នុង និងក្រៅស្រុកដោយអាជ្ញាធរអាកាសយានដ្ឋានជាតិ។
កាលពីថ្ងៃទី៥ ខែតុលា ក្រុមហ៊ុនអាកាសចរណ៍អង់គ្លេស Virgin Atlantic បានបញ្ជាក់ថា ខ្លួននឹងបិទការិយាល័យលែងដំណើរការតទៅទៀតនៅក្នុងទីក្រុងហុងកុង ពាក់ព័ន្ធនឹងសង្គ្រាមនៅអ៊ុយក្រែន ជុំវិញភាពស្មុគស្មាញនៃប្រតិបត្តិការសំខាន់ៗដោយសារតែការបិទដែនអាកាសរបស់រុស្ស៊ី។
ការឈ្លានពានរបស់រុស្ស៊ីលើអ៊ុយក្រែន បានបណ្តាលឱ្យក្រុមហ៊ុនអាកាសចរណ៍ជាច្រើនត្រូវផ្អាកជើងហោះហើររបស់ខ្លួន ឬប្រើផ្លូវវែងជាង ដើម្បីចៀសវាងការហោះហើរលើតំបន់រងផលប៉ះពាល់។
លោកស្រី Prudence Lai អ្នកវិភាគជាន់ខ្ពស់នៃក្រុមហ៊ុនស្រាវជ្រាវទីផ្សារ Euromonitor International គិតថា ការផ្តល់ជូនសំបុត្រយន្តហោះដោយឥតគិតថ្លៃ នឹងជួយពន្លឿនដំណើរការជួសជុលកេរ្តិ៍ឈ្មោះរបស់ហុងកុងជាគោលដៅទេសចរណ៍ដ៏ពេញនិយមមួយ។ ប៉ុន្តែទោះជាយ៉ាងណា នេះគឺត្រូវពឹងផ្អែកយ៉ាងខ្លាំងទៅលើពេលដែលអ្នកទេសចរចិនដីគោកនឹងត្រលប់មកវិញ ដោយសារតែប្រទេសចិនដីគោកបានរួមចំណែកដល់ការមកដល់ និងវិក័យប័ត្រធ្វើដំណើររបស់ហុងកុងច្រើនជាងពាក់កណ្តាលនៃចំនួនសរុប។
ទីក្រុងហុងកុងមានអ្នកទស្សនាប្រមាណ ១៨៤,០០០នាក់ក្នុងរយៈពេល៨ខែដំបូងនៃឆ្នាំនេះ។ តួលេខនេះ គឺជាការថយចុះគួរឱ្យកត់សម្គាល់នៃចំនួនភ្ញៀវទេសចរបើធៀបទៅនឹងមុនពេលមានជំងឺកូវីដ១៩ ខណៈដែលមនុស្សប្រមាណ ៥៦លាននាក់ បានមកលេងទីក្រុងនេះ កាលពីឆ្នាំ ២០១៩៕ (ដកស្រង់ចេញពី BBC)
ចែករំលែកព័តមាននេះ