មិនខ្លាចសំណាញ់ច្បាប់ហើយនិយាយឌឺទៀត«ខ្លាចអីយើងលេងលុយយើងតើ» (មានវីដេអូ)
ខេត្តបន្ទាយមានជ័យ ៖ ល្បែងជល់មាន់មួយកន្លែងកំពុងបើកលេងយ៉ាងគគ្រឹកគគ្រេងមានខ្មែរមានថៃ
ខេត្តបន្ទាយមានជ័យ ៖ ល្បែងបញ្ជល់មាន់មួយកន្លែងកំពុងបើកលេងយ៉ាងគគ្រឹកគគ្រេងមានខ្មែរមានថៃកណ្តាលភូមិថ្មី ឃុំម៉ាឡៃ ស្រុកម៉ាឡៃ ហើយប្រភពថា អ្នកញៀនមានទាំងសមត្ថកិច្ចហាក់មិនខ្វល់ពីគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាលឡើយ ។ នៅចំណុចខាងលើមានអ្នកលេងមានចាស់មានក្មេងចាក់ភ្នាល់ហ៊ោកញ្ច្រៀវនិយាយទាំងភាសារខ្មែរ និងភាសារថៃ ។ អ្នកញៀនល្បែងហាក់មិនខ្លាចកាណុងកាមេរ៉ារបស់អ្នកយកព័ត៌មាននោះទេ ខណៈឃើញផ្តិតយករូបភាពគេនាំគ្នាស្រែកឌឺដងថា «ខ្លាចអីយើងលេងលុយយើងតើ» ។ នៅក្នុងទីតាំងល្បែងនោះអ្នកចាក់ភ្នាល់ប្រាក់ប្រឹងតែពីហ៊ោ ឯមាន់ជាច្រើនគូរទៀតមានអ្នកឲ្យទឹកព្រងព្រៀត២ទៅ៣គូរបន្ថែមទៀត ។
ប្រភពពីកន្លែងកើតហេតុបានឲ្យដឹងថា ទីតាំងខាងលើលួចលេងយូរហើយ ដោយក្នុង១សប្តាហ៍បើកលេង២ថ្ងៃ គឺថ្ងៃចន្ទ និងថ្ងៃព្រហស្បតិ៍ ។ ម៉ូតូនិងយានយន្តត្រូវគេយកលាក់ទុកតាមព្រៃ ម៉ូតូខ្លះពាក់ស្លាកលេខខេមរៈភូមិន្ទ ឯរថយន្តខ្លះស្លាកលេខធម្មតា តែមានអាវ និងមួកជាប៉ូលិសនៅក្នុងរថយន្ត ។ យ៉ាងណាក៏ដោយជុំវិញករណីលួចបើកលេងល្បែងស៊ីសងខាងលើលោក មាស ថាន មេប៉ុស្តិ៍ស្តីទីនគរបាលរដ្ឋបាលឃុំម៉ាឡៃប្រាប់កោះសន្តិភាពថា លោកនឹងហៅម្ចាស់ទីតាំងមកធ្វើកិច្ចសន្យាបញ្ឈប់ការលួចបើកល្បែងស៊ីសងតទៅទៀត ។ លោកមេប៉ុស្តិ៍ស្តីទីបន្តថា បើសិនម្ចាស់ទីតាំងមិនបញ្ឈប់តាមកិច្ចសន្យាទេ លោកនឹងចាត់វិធានការតាមផ្លូវច្បាប់ គឺសុំគោលការណ៍ពីថ្នាក់ដឹកនាំចុះបង្ក្រាបតែម្តង ៕
ចែករំលែកព័តមាននេះ