រថយន្តបឺសមួយគ្រឿងកាលពីថ្ងៃទី១២ មីនា បានបុករះដោយចៃដន្យលើក្រុមតន្ត្រីករពេលប្រគំតន្ត្រីតាមដងវិថីមួយនៃទីក្រុង GONAIVES របស់ហៃទី បណ្តាលឱ្យមនុស្សស្លាប់សរុប៣៤នាក់ ហើយមនុស្ស១៧នាក់ទៀតរងរបួស ។
លោកស្រី MARIE ALTA JEAN BAPTISTE នាយិកាផ្នែកការពារស៊ីវិលហៃទីអះអាងប្រាប់ AFP ថា រថយន្តបឺសនេះដំបូងបានបុកអ្នកដើរ២នាក់ បណ្តាលឱ្យស្លាប់ម្នាក់ និងរបួសម្នាក់ ។ បន្ទាប់មកវាបានរេទៅបុករះពួកតន្ត្រីករពនេរចរ៣ក្រុម បណ្តាលឱ្យស្លាប់៣៣នាក់ ។ លើកគ្នាយ៉ាងឆាប់មកដល់កន្លែងកើតហេតុ បណ្តាភ្នាក់ងារសង្គ្រោះបានបញ្ជូនបណ្តាអ្នករបួសទៅកាន់មន្ទីរពេទ្យក្រុង GONAIVES ស្ថិតនៅចម្ងាយប្រមាណជា១៥០គីឡូម៉ែត្រភាគពាយ័ព្យរដ្ឋធានីព័រអូប្រាំង ហើយប៉ូលិសខិតខំទប់ចលនាជ្រួលជ្រើមទាំងខឹងសម្បារបស់ប្រជាជន ។ បណ្តាអ្នកដែលពុំរងគ្រោះដោយគ្រោះថ្នាក់នេះប៉ុនប៉ងដុតរថយន្តបឺសនេះចោលទាំងអ្នកដំណើរជិះខាងក្នុង ។
ប្រធានាធិបតីហៃទី លោក JOVENEL MOISE អះអាងថា លោកមានការក្តុកក្តួលចំពោះគ្រោះថ្នាក់នេះ ហើយសម្តែងក្នុងនាមរដ្ឋាភិបាលនូវការចូលរួមរំលែកទុក្ខជាមួយគ្រួសារជនរងគ្រោះ ។ លោកស្នើឱ្យបើកការស៊ើបអង្កេតមួយឱ្យបានឆាប់ ដើម្បីបំភ្លឺលើសោកនាដកម្មនេះ ៕
ចែករំលែកព័តមាននេះ