គ្រាន់តែជាន់ជើងសោះធ្វើឱ្យផ្អើលរត់ចែកជើងគ្នា
ខេត្តបន្ទាយមានជ័យ ៖ មានហេតុការណ៍ផ្អើលរត់ជាន់ជើងគ្នាបន្ទាប់ពីយុវជនម្នាក់ចូលរួមពិធីអាពាហ៍ពិពាហ៍ និងបានពិសារភោជនីយអាហារហើយបានផឹកស្រា
ខេត្តបន្ទាយមានជ័យ ៖ មានហេតុការណ៍ផ្អើលរត់ជាន់ជើងគ្នាបន្ទាប់ពីយុវជនម្នាក់ចូលរួមពិធីអាពាហ៍ពិពាហ៍ និងបានពិសារភោជនីយអាហារហើយបានផឹកស្រា និងគ្រាន់តែគេដើរជាន់ជើងក៏ទាញដបស្រាវាយក្បាលបណ្តាលផ្អើលភ្ញៀវរត់ចែកជើងគ្នា ។ ចំពោះម្ចាស់ការក៏បានប្តឹងសងថ្លៃខូចខាត៣.០០០ដុល្លារ តែដោយសារយុវជនរូបនោះមិនសងកម្លាំងកងរាជអាវុធហត្ថធ្វើការឃាត់ខ្លួនបញ្ជូនទៅកាន់សាលាដំបូងខេត្ត ។ ជនសង្ស័យមានឈ្មោះ សា អ៊ីមរ៉ន ភេទប្រុសអាយុ២០ឆ្នាំគ្មានមុខរបបច្បាស់លាស់រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី ជា ដា មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ក្រោយពេលទទួលពាក្យបណ្តឹងពីឈ្មោះ ជឿន សុនឿន ភេទប្រុស អាយុ១៧ឆ្នាំ និងឈ្មោះ ស៊ន ភា ភេទស្រី អាយុ៤៦ឆ្នាំ រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ដែលបានប្តឹងឈ្មោះ សា អ៊ីរ៉ន បានធ្វើសកម្មភាពប្រើហិង្សាទៅលើជនរងគ្រោះឈ្មោះ ជឿន សុនឿន បណ្តាលឱ្យរបួសបែកក្បាល និងបង្កភាពមិនប្រក្រតីនៅពេលដែលភ្ញៀវកំពុងតែពិសារភោជនីយអាហារបណ្តាលឱ្យភ្ញៀវរត់ចែកជើងគ្នាចេញពីរោងការមិនទាន់បានទទួលសំបុត្រចងដៃ ដែលមានដាក់តុចំនួន៥០តុ បណ្តាលឱ្យខាតបង់ជាង៣.០០០ដុល្លារ។
លោកវរសេនីយ៍ត្រីបានបញ្ជាក់ថា ដែលជនសង្ស័យបង្កហិង្សា និងអុកឡុករោងការបណ្តាលឱ្យខាតបង់នៅវេលាម៉ោង១០ថ្ងៃទី១០ មីនា ហើយក្រោយពេលបង្កភាពអុកឡុកកម្លាំងកងរាជអាវុធហត្ថក្រុងប៉ោយប៉ែតទទួលបណ្តឹងពីជនរងគ្រោះបានស្រាវជ្រាវឃាត់ខ្លួននៅវេលាម៉ោង១១ថ្ងៃទី១២ មីនា នៅភូមិសាមគ្គីមានជ័យសង្កាត់ប៉ោយប៉ែត ក្រុងប៉ោយប៉ែត ។ ក្រោយពេលឃាត់ជនសង្ស័យហើយនាំយកមកធ្វើការសាកសួរតាមចម្លើយបានសារភាពថា ខ្លួនពិតជាបានបង្ករបួសស្នាមទៅលើជនរងគ្រោះយកដបស្រាវាយទៅលើជនរងគ្រោះបណ្តាលឱ្យបែកក្បាល ព្រោះតែជនរងគ្រោះជាន់ជើងមិនសុំទោសទើបវាយបណ្តាលផ្អើលអស់អ្នកទៅហូមការទើបបណ្តាលសមត្តកិច្ចចាប់ខ្លួន ៕
ចែករំលែកព័តមាននេះ