អ្នកហួចហៅខ្យល់ លោក សម រង្ស៊ី ប្រើសារនយោបាយជំនួសពាក្យស្លោកបក្សសង្គ្រោះជាតិ
រាជធានីភ្នំពេញ ៖ អតីតប្រធានគណបក្សសង្គ្រោះជាតិ លោក សម រង្ស៊ី ដែលសម្តេចតេជោធ្លាប់ហៅបញ្ឆិតបញ្ឆៀងថា
រាជធានីភ្នំពេញ ៖ អតីតប្រធានគណបក្សសង្គ្រោះជាតិ លោក សម រង្ស៊ី ដែលសម្តេចតេជោធ្លាប់ហៅបញ្ឆិតបញ្ឆៀងថា អ្នកហួចហៅខ្យល់ ពេលនេះបានប្រើប្រាស់ពាក្យស្លោកជាសារនយោបាយថ្មីចំនួន២ ខុសពីសារនយោបាយរបស់ប្រធានគណបក្សសង្គ្រោះជាតិប្រើ ដើម្បីផ្សព្វផ្សាយដល់ម្ចាស់ឆ្នោត «ដូរមេឃុំបម្រើបក្ស ដាក់មេឃុំបម្រើរាស្ត្រ» ដែលកំពុងចម្រូងចម្រាស ។ការប្រើពាក្យស្លោកថ្មីរបស់លោក សម រង្ស៊ីនេះ ស្របពេលដែលប្រធានថ្មីគណបក្សសង្គ្រោះជាតិគឺ លោក កឹម សុខា បាននិងកំពុងចុះតាមមូលដ្ឋាន ផ្សព្វផ្សាយគោលនយោបាយថ្មីចំនួន៥ចំណុចក្នុងការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ ។
លោក សម រង្ស៊ី បានសរសេរលើបណ្តាញសង្គមថា «បើយើងប្រើពាក្យស្លោកណាមួយដូចខាងក្រោមនេះ តើគេនឹងរករឿងយើង និងប្តឹងយើងទៀតទេ ទី១«ដូរភាពខ្មៅងងឹតឧបទ្រព ដាក់ពន្លឺព្រះអាទិត្យ» ទី២«ដូរគ្រួសារនិយម បក្ខពួកនិយម និងពុករលួយនិយម ដាក់សមត្ថភាពនិយម» ទី៣«ដូរចោរាធិបតេយ្យ ដាក់ប្រជាធិបតេយ្យ» ។
ចំណែកលោក កឹម សុខា ក្នុងជំនួបនៅក្នុងវគ្គផ្សព្វផ្សាយផ្ទៃក្នុងនូវគោលនយោបាយអាទិភាពសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅខេត្តតាកែវ កាលពីពេលថ្មីៗនេះ ថ្លែងថា «ខ្ញុំយល់ឃើញថា ប្រជាពលរដ្ឋខ្មែរបច្ចុប្បន្ននេះ កំពុងតែរង់ចាំមើល គោលនយោបាយរបស់គណបក្សនានា ដើម្បីប្រកួតប្រជែងក្នុងការបោះឆ្នោតខាងមុខ ហើយពួកគាត់មិនចង់ឃើញអ្នកនយោបាយឈ្លោះគ្នាតទៅទៀតទេ។ ប្រជាពលរដ្ឋខ្មែរ ចង់ដឹងថា គណបក្សណាដោះស្រាយបញ្ហាពួកគាត់ តាមរបៀបណា នៅពេលដែលឈ្នះឆ្នោតទៅដឹកនាំឃុំ-សង្កាត់»។
សម្រាប់សារនយោបាយថ្មីដែលគណបក្សសង្គ្រោះជាតិបានដាក់ចេញនេះ ក៏មានការរិះគន់ពីគណបក្សកាន់អំណាចថា បានបង្កប់ដោយពាក្យញុះញង់ និងប្រមាថ ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា គោលនយោបាយអាទិភាព៥ចំណុច និងបានរំលេចនូវខ្លឹមសារចម្បងថា «ដូរមេឃុំបម្រើបក្ស ដាក់មេឃុំបម្រើរាស្ត្រ» មានចរិតញុះញុង់ បង្កហេតុ និងប្រមាថមើលងាយយ៉ាងធ្ងន់ធ្ងរដល់មន្ត្រីឃុំ-សង្កាត់ទូទាំងប្រទេសដែលបានខិតខំបម្រើប្រជាជនស្របតាមតួនាទីរបស់
ខ្លួន ដោយមិនមានការរើសអើងនិន្នាការនយោបាយសោះឡើយ ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាល បានសរសេរលើបណ្តាញសង្គមហ្វេសប៊ុក កាលពីថ្ងៃទី៩ខែមីនា អំពាវនាវថា «សូមបងប្អូនមេត្តាជួយប្រើឃ្លាខាងក្រោមក្នុងបណ្តាញសង្គមឲ្យបានច្រើន ១-កុំយកមេឃុំប្រូ ដូរមេឃុំទេវតា។ ២-មេឃុំប្រូពូកែសន្យា មេឃុំទេវតាពូកែធ្វើការ» ។
ពាក្យស្លោក CNRP បង្កភាពចម្រូងចម្រាសកាន់តែស្រួចស្រាល់គណៈកម្មាធិការជាតិរៀបចំការបោះឆ្នោត(គ.ជ.ប) បានអះអាងថា រហូតមកដល់ពេលនេះ មិនទាន់មានចំណាត់ការលើពាក្យស្លោករបស់គណបក្សសង្គ្រោះជាតិ«ដូរមេឃុំបម្រើបក្ស ដាក់មេឃុំបម្រើរាស្ត្រ» ដែលនាំឲ្យមានភាពចម្រូងចម្រាសនោះទេ ។
ការអះអាងនេះ គឺបន្ទាប់ពីលោក អេង ឆៃអ៊ាង អនុប្រធានគណបក្សសង្គ្រោះជាតិ ថ្លែងថា មានតែ គ.ជ.ប ទេ ដែលមានសមត្ថកិច្ចចំពោះពាក្យស្លោកនេះ ។ ទោះបីជាបែបណាលោកអភិបាលរាជធានីភ្នំពេញ ប៉ា សុជាតិវង្ស នៅថ្ងៃទី១០ ខែមីនា បានព្រមានថា នឹងប្តឹងគណបក្សសង្គ្រោះជាតិជុំវិញការបន្តប្រើពាក្យស្លោករបស់ខ្លួននេះ ។
ថ្លែងក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធ និងអ្នកសារព័ត៌មាននាព្រឹកថ្ងៃទី១០ ខែមីនា នៅទីស្តីការ គ.ជ.ប លោក មាន សទិ សមាជិក គ.ជ.ប បានឱ្យដឹង ចំពោះពាក្យស្លោករបស់គណបក្សសង្គ្រោះជាតិដែលគណបក្សប្រជាជនកម្ពុជាស្នើឱ្យប្តូរនោះ គ.ជ.ប មិនទាន់ចាត់ការនៅឡើយទេ ។ ការដែលមិនទាន់មានចំណាត់ការនេះ ដោយសារតែមិនទាន់ដល់ថ្ងៃឃោសនាបោះឆ្នោត ។ ផ្ទុយទៅវិញ ប្រសិនបើមានបណ្តឹងពីគណបក្សនយោបាយនោះ គ.ជ.ប នឹងពិនិត្យសំណុំរឿង ។
ការលើកឡើងរបស់សមាជិក គ.ជ.ប នេះគឺបន្ទាប់ពីគណបក្សសង្គ្រោះជាតិ បានកំណត់យកពាក្យស្លោកថា «ដូរមេឃុំបម្រើបក្ស ដាក់មេឃុំបម្រើរាស្ត្រ» សម្រាប់ការផ្សព្វផ្សាយនៅមុនពេលបោះឆ្នោតក្នុងពេលខាងមុខនេះ ។
បន្ទាប់ពីអនុប្រធានគណបក្សសង្គ្រោះជាតិ លោក អេង ឆៃអ៊ាង បានលើកឡើងថា មានតែ គ.ជ.ប ទេដែលអាចស្នើសុំឲ្យគណបក្សសង្គ្រោះជាតិផ្លាស់ប្តូរពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ត្រ»នោះ កាលពីថ្មីៗកន្លងមកនេះ លោក មាន សទិ បានគូសបញ្ជាក់ថា «ពេលនេះវាមិនមែនជាដំណាក់កាលដែលគ.ជ.ប.ត្រូវយកមកដោះស្រាយនោះទេ ។ គ.ជ.ប ដោះស្រាយនៅពេលឃោសនាបោះឆ្នោត គឺរយៈពេល១៤ថ្ងៃ ដែល គ.ជ.ប អនុញ្ញាតឲ្យឃោសនា ។
គណបក្សនយោបាយដែលយកពាក្យស្លោកនោះទៅឃោសនា បើមានបណ្តឹង គ.ជ.ប នឹងពិនិត្យថាតើពាក្យស្លោកនោះត្រឹមត្រូវតាមការកំណត់ក្នុងច្បាប់ ឬខុសមាត្រានៃច្បាប់ ។
អ៊ីចឹង ពេលនេះ គ.ជ.ប គ្រាន់តែបានទទួលព័ត៌មានហើយក៏ពិចារណា និងគិតថានឹងដោះស្រាយយ៉ាងណានៅពេលដល់យុទ្ធនាការឃោសនា ដូច្នេះពេលនេះយើងមិនទាន់គិតគូរទេ» ។
ជាមួយគ្នានេះ តំណាងគណបក្សសង្គ្រោះជាតិ លោកស្រី ម៉េង សុធារី បានលើកសំណួរទៅកាន់សមាជិក គ.ជ.ប ថា បើសិនគណបក្សនយោបាយមួយត្រូវបានគេប្តឹងរំលាយគណបក្សនោះ តើ គ.ជ.ប គិតយ៉ាងណាដែរ ក្នុងនាមអ្នករៀបចំការបោះឆ្នោតត្រឹមត្រូវនិងយុត្តិធម៌?
ត្រង់ចំណុចនោះសមាជិក គ.ជ.ប លោកមាន សទិ បានឆ្លើយថា «គ.ជ.ប នឹងដោះស្រាយតាមច្បាប់បោះឆ្នោត ។ បើចូលតាមមាត្រាណា យើងនឹងដាក់ទោសតាមមាត្រាហ្នឹង ។ ដូច្នេះ ខាងគណបក្សសុទ្ធតែចេះនីតិវិធីច្បាស់ ហើយក៏ចេះច្បាប់ច្បាស់ អុីចឹងបើចូលមាត្រាណា គ.ជ.ប កាត់តាមមាត្រា សូមជម្រាបតែប៉ុណ្ណឹង» ។
ជាកត់សម្គាល់ ក្រោយពីគណបក្សសង្គ្រោះជាតិប្រកាសដាក់ពាក្យស្លោក«ដូរមេឃុំបម្រើ បក្សដាក់មេឃុំបម្រើរាស្ត្រ»មក នៅតាមបណ្តាញសង្គមហ្វេសប៊ុក មានការរិះគន់យ៉ាងខ្លាំងពីក្រុមមន្ត្រីគណបក្សកាន់អំណាច ក្នុងនោះក៏មានយុវជនដែរ ។ សម្រាប់ករណីនេះ អ្នកដែល ដែលមាននិន្នាការទៅរកគណបក្សកាន់អំណាចក៏បានលើកយកពាក្យស្លោកតបតនឹងគណបក្សប្រឆាំងដែរ ។
បើតាមបណ្តាញសង្គមមួយចំនួនបានបង្ហាញថា ពាក្យស្លោកគោលនយោបាយក្រៅផ្លូវការរបស់គណបក្សប្រជាជនកម្ពុជាចំនួន២ «មេឃុំប្រូពូកែសន្យា មេឃុំទេវតាពូកែធ្វើការ» ក៏មានពាក្យស្លោកមួយទៀត ដែលកំពុងចាប់អារម្មណ៍នោះគឺ «កុំយកមេឃុំប្រូ ដូរមេឃុំទេវតា» ។
ចំណែកអ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា បានឲ្យដឹងថាប្រសិនបើ គ.ជ.ប មិនមានសមត្ថកិច្ចសម្រាប់ការដោះស្រាយបញ្ហាលើពាក្យស្លោកទេ មានតែក្រសួងមហាផ្ទៃប៉ុណ្ណោះដែលមានសមត្ថកិច្ច ព្រោះថាក្រសួងមហាផ្ទៃ ជាអ្នកទទួលស្គាល់គណបក្សនយោបាយទាំងអស់ ៕
ចែករំលែកព័តមាននេះ