កាមរីឆ្លាមមួយគ្រឿងបោះពួយបុកចូលផ្ទះប្រជាពលរដ្ឋ បាក់រាបដល់ដី
ខេត្តស្វាយរៀង ៖ មានករណីគ្រោះថ្នាក់ចរាចរណ៍ដ៏អាក្រក់មួយបង្កឡើងដោយបុរសម្នាក់ស្រវឹងស្រាធ្លាក់ភ្នែក បើករថយន្តកាមរីឆ្លាមលឿនដូចហោះ
ខេត្តស្វាយរៀង ៖ មានករណីគ្រោះថ្នាក់ចរាចរណ៍ដ៏អាក្រក់មួយបង្កឡើងដោយបុរសម្នាក់ស្រវឹងស្រាធ្លាក់ភ្នែក បើករថយន្តកាមរីឆ្លាមលឿនដូចហោះ លើផ្លូវជាតិលេខ១៣ ជ្រុលចង្កូតធ្លាក់ផ្លូវទៅបុកចូលក្នុងផ្ទះប្រជាពលរដ្ឋ ចំកណ្តាលផ្ទះបាក់រាបដល់ដី រួចមិនទាន់អស់ល្បឿនក៏ជ្រុលទៅបុកដើមប្រេងខ្យល់ធ្លាក់ចូលក្នុងប្រឡាយទៅមុខលែងរួច។ ពិតជាសំណាងល្អណាស់ ម្ចាស់ផ្ទះមិននៅក្នុងផ្ទះ កុំអីមិនដឹងជា វាសនាយ៉ាងណានោះទេ រីឯអ្នកបើកបររថយន្ត គ្មានរងរបួសទេ(ផ្ទុះពោងសុវត្ថិភាព)។
ករណីគ្រោះថ្នាក់ចរាចរណ៍នេះកើតឡើងកាលពីវេលាម៉ោង៤និង៣០នាទីល្ងាច ថ្ងៃទី១២ មីនា ២០១៧ នៅចំណុចភូមិព្រះទន្លេសង្កាត់សង្ឃ័រ ក្រុងស្វាយរៀង។ បើតាមមន្ត្រីនគរបាលប៉ុស្តិ៍រដ្ឋបាលសង្កាត់សង្ឃរ័ បានឲ្យដឹងថា ម្ចាស់ផ្ទះជនរងគ្រោះឈ្មោះ ហាស់ ហន ភេទប្រុស អាយុ៦៩ឆ្នាំ មានប្រពន្ធឈ្មោះ សំ ណុន អាយុ៥២ឆ្នាំ នៅភូមិកើតហេតុខាលើ។ រីឯជនបង្ក ឈ្មោះ សំ ម៉ៅ ភេទប្រុស អាយុ២៩ឆ្នាំ មានទីលំនៅភូមិបែកចាន ឃុំរមាំងថ្កោល ស្រុកស្វាយទាប។
ប្រភពដដែលបន្តទៀតថា មុនពេលកើតហេតុ គេឃើញបុរសឈ្មោះ សំ ម៉ៅ បើកបររថយន្តម៉ាកកាមរីឆ្លាម ពណ៌ទឹកមាស ពាក់ស្លាកលេខភ្នំពេញ 2S-8737 បើកបរពីទិសខាងត្បូងទៅជើងយ៉ាងលឿនដូចហោះលើផ្លូវជាតិលេខ១៣ ដែលកំពុងសាងសង់ចាក់ដីលាយថ្មអងដឺ។ លុះមកដល់ចំណុចកើតហេតុខាងលើ ស្រាប់តែរេចង្កូតធ្លាក់ពីលើថ្នល់ ហោះបុកចូលផ្ទះរបស់ប្រជាពលរដ្ឋចំកណ្តាលផ្ទះទំហំ៤ម៉ែត្រ គុណនឹង៦ម៉ែត្រប្រក់ស័ង្កសី បាក់រាបដល់ដី ហើយមិនទាន់អស់ល្បឿនក៏ជ្រុលទៅមុខធ្លាក់ប្រឡាយ ហោះទៅបុកដើមប្រេងខ្យល់ធ្លាក់ចូលប្រឡាយខ្ទាតចូលប្រឡាយទៅមុខលែងរួច។
រថយន្តខូចកាប៊ីនខាងមុខយ៉ាងដំណំ តែសំណាងល្អផ្ទុះពោងសុវត្ថិភាពមិនបណ្តាលឲ្យរងរបួសទេ និងមិនបុក បង្គោលភ្លើង បើបុកបង្គោលភ្លើងវិញមិនដឹងយ៉ាងណាទេ ហើយម្ចាស់ផ្ទះវិញ មិននៅផ្ទះទាំងប្តីប្រពន្ធគឺដោយផ្ទះចាស់ចង់ជួសជុលក៏នាំគ្នាទៅផ្សារកំពង់ចកដើម្បីទិញសម្ភារជួសជុល ក៏ត្រូវរថយន្តបុកបាក់រាបដល់ដីតែម្តង។
បន្ទាប់មកសមត្ថកិច្ចបានចាប់ឃាត់ខ្លួនអ្នកបើកបរយកទៅអធិការដ្ឋាននគបាលក្រុងស្វាយរៀងដើម្បីពិនិត្យជាតិអាល់កុល ដោយជនបង្កទើបតែចេញពីពិធីឡើងផ្ទះបងប្អូន មានជាតិស្រវឹងក្នុងខ្លួន។ ក្រោយពេលកើតហេតុរី រថយន្តត្រូវបានអ្នកស្រុកយកត្រាក់ទ័រមកអូសឡើង តែខកចិត្តដោយគ្មានអ្នកទទួលខុសត្រូវចេញសោហ៊ុយ ដោយម្ចាស់រថយន្តត្រូវសមត្ថកិច្ចចាប់ឃាត់ខ្លួនទៅអធិការដ្ឋាននគបាលក្រុស្វាយរៀងបាត់ទៅ៕
ចែករំលែកព័តមាននេះ