ចេញពីខួបកំណើតកូនមិត្តភក្តិ ក៏បើករថយន្តបុករះពេញផ្លូវ
រាជធានីភ្នំពេញ ៖ បុរសម្នាក់បើករថយន្តលឿនដូចហោះចេញពីកម្មវិធីខួបកំណើតកូនមិត្តភក្តិស្រវឹងធ្លាក់ភ្នែកបុករះដើមក្ងោក និងម៉ូតូ១គ្រឿង បណ្តាលឱ្យ
រាជធានីភ្នំពេញ ៖ បុរសម្នាក់បើករថយន្តលឿនដូចហោះចេញពីកម្មវិធីខួបកំណើតកូនមិត្តភក្តិស្រវឹងធ្លាក់ភ្នែកបុករះដើមក្ងោក និងម៉ូតូ១គ្រឿងរងរបួសធ្ងន់ធ្ងរ ហើយបណ្តាលឱ្យស្លាប់ខណៈពេលបញ្ជូនដល់មន្ទីរពេទ្យ។ ហេតុការណ៍គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង១១និង២០នាទីយប់ ថ្ងៃទី១១ ខែមីនា ឆ្នាំ២០១៧ ស្ថិតតាមបណ្តោយផ្លូវសហព័ន្ធរុស្ស៊ី ត្រង់ចំណុចមុខរថយន្តប្រើថាមពលព្រះអាទិត្យ ភូមិបុរីកម្មករ សង្កាត់ទឹកថ្លា ខណ្ឌសែនសុខ ។
ចំណែកឯជនរងគ្រោះដែលស្លាប់នៅកន្លែងកើតហេតុមានឈ្មោះ ព្រហ្ម ដាវិន ភេទប្រុស អាយុ៣១ឆ្នាំ មានទីលំនៅផ្ទះលេខ៣១៤ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ជិះម៉ូតូ១គ្រឿងម៉ាកស៊ុយស៊ូគីឡែត ពណ៌ស ពាក់ស្លាកលេខ ភ្នំពេញ1FB-1587 ។ រថយន្តបង្កម៉ាកតូយ៉ូតាព្រូស ពណ៌ស ពាក់ស្លាកលេខ ភ្នំពេញ 2AG-1439 ម្ចាស់រថយន្តមានឈ្មោះ ចេង គង់សង្វា ភេទប្រុស អាយុ២៣ឆ្នាំ មុខរបរនៅផ្ទះ មានទីលំនៅផ្ទះលេខ១៣ ផ្លូវ២៦៥ សង្កាត់ទឹកល្អក់ទី៣ ខណ្ឌទួលគោក ។
សមត្ថកិច្ចបានឱ្យដឹងថា នៅមុនកើតហេតុអ្នកបើកបររថយន្តបង្កបានបើកបរតាមបណ្តោយផ្លូវសហព័ន្ធរុស្ស៊ី ត្រឡប់មកពីកម្មវិធីខួបកំណើតកូនមិត្តភក្តិនៅផ្សារស៊ិនជូរី សង្កាត់កាកាប ខណ្ឌពោធិ៍សែនជ័យ ដោយបើកបររថយន្តក្នុងស្ថានភាពស្រវឹងធ្លាក់ភ្នែកក្នុងល្បឿនលឿនរេពេញផ្លូវ ។ លុះមកដល់ចំណុចកើតហេតុខាងលើផ្លូវមានសភាពកោងបានរេចង្កូតទៅបុកម៉ូតូរងគ្រោះ ខណៈពេលកំពុងជិះម្នាក់ឯងស្របទិសដៅគ្នា អូសគូទរថយន្តទៅបោកទៅគល់ក្ងោក រួចហើយរថយន្តនៅមានល្បឿនក៏បុកអូសម៉ូតូជាប់ទាំងមនុស្សគៀបពីមុខរថយន្តជ្រុលចង្កូតទៅមុខជាង៣០ម៉ែត្រ ហើយរុញម៉ូតូផ្អឹបផ្ទុបទៅនឹងជញ្ជាំងទីតាំងខាងលើ បណ្តាលឱ្យអ្នកបើកបរម៉ូតូរងរបួសធ្ងន់ធ្ងរ ភ្លាមៗនោះត្រូវបានប្រជាពលរដ្ឋហៅរថយន្តសាម៉ុយមកដឹកជនរងគ្រោះយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ តែអកុសលដោយសារតែជនរងគ្រោះរងរបួសធ្ងន់ធ្ងរពេកបានដាច់ខ្យល់ស្លាប់ ខណៈពេលបញ្ជូនដល់មន្ទីរពេទ្យ។
សមត្ថកិច្ចបានបន្តទៀតថា បន្ទាប់មកសមត្ថកិច្ចជំនាញបានចុះមកកន្លែងកើតហេតុធ្វើការវាស់វែង និងចាប់អ្នកបើកបើករ ព្រមទាំងរថយន្ត និងម៉ូតូរងគ្រោះទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំការដោះស្រាយគ្នាទៅតាមផ្លូវច្បាប់ ។ រីឯសពត្រូវបានប្រគល់ឱ្យទៅក្រុមគ្រួសារដឹកយកទៅគេហដ្ឋានដើម្បីធ្វើបុណ្យតាមប្រពៃណី៕
ចែករំលែកព័តមាននេះ