រាជធានីភ្នំពេញ ៖ ម៉ូតូសេ១២៥ ចំនួន២គ្រឿង ខណៈដែលមានមួយគ្រឿងបើកបរវ៉ាជែងខ្វះការប្រុងប្រយ័ត្នលឿនជ្រុលទៅបុកម៉ូតូមួយគ្រឿងទៀត នៅបំណែកផ្លូវម្ខាងដែលបើកច្រាសទិសគ្នា បណ្តាលឲ្យ
រាជធានីភ្នំពេញ ៖ ម៉ូតូសេ១២៥ ចំនួន២គ្រឿង ខណៈដែលមានមួយគ្រឿងបើកបរវ៉ាជែងខ្វះការប្រុងប្រយ័ត្នលឿនជ្រុលទៅបុកម៉ូតូមួយគ្រឿងទៀត នៅបំណែកផ្លូវម្ខាងដែលបើកច្រាសទិសគ្នា បណ្តាលឲ្យមនុស្ស២នាក់ស្លាប់ភ្លាមៗនៅនឹងកន្លែង ចំណែកម្នាក់ទៀតរងរបួសធ្ងន់ធ្ងរ។ កាលពីវេលាម៉ោង១៨និង៤០នាទីយប់ ថ្ងៃទី១១ ខែមីនា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៤ ខាងលិចសាលាក្តីខ្មែរក្រហម ត្រង់ចំណុចភូមិត្រពាំងទួល សង្កាត់កំបូល ខណ្ឌពោធិ៍សេនជ័យ ។
ជនរងគ្រោះស្លាប់នៅកន្លែង ១-ឈ្មោះ ជួន ប៊ុនលីម ភេទប្រុស អាយុ៣៦ឆ្នាំ មុខរបរបុគ្គលិកក្រុមហ៊ុន កាំមីនថែល ផ្នែកអគ្គិសនី មានទីលំនៅភូមិស្រូល ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។ ជនរងគ្រោះជិះម៉ូតូមួយគ្រឿងម៉ាកហុងដា សេ១២៥ សេរី២០១៣ ពណ៌ខ្មៅ ពាក់ស្លាកលេខ ភ្នំពេញ 1BP-4765 ក្នុងទិសដៅពីកើតទៅលិច។ ២-ឈ្មោះ សន ជន ភេទប្រុស អាយុ២៣ឆ្នាំ មុខរបរកម្មករសំណង់ ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតភូមិប្រថ្ម ឃុំជ័យកំពក ស្រុកព្រះស្តេច ខេត្តព្រៃវែង បើកបរម៉ូតូមួយគ្រឿងម៉ាកហុងដា សេ១២៥ សេរី២០១១ ពណ៌ខ្មៅ ពាក់ស្លាកលេខ ភ្នំពេញ 1AY-3137 និងរួមដំណើរជាមួយបុរសម្នាក់ទៀត មិនត្រូវបានស្គាល់អត្តសញ្ញាណ ខណៈដែលរងរបួសធ្ងន់ធ្ងរត្រូវបានរថយន្តដឹកបញ្ជូនទៅសង្គ្រោះភ្លាមៗ ទាំង២នាក់ឌុបគ្នាក្នុងទិសដៅពីលិចទៅកើត។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុភាគីម៉ូតូ សេ១២៥ ស៊េរី២០១១ ជិះឌុបគ្នាពី២នាក់ បើកបោះពួយល្បឿនលឿន ពីលិចទៅកើតដល់ចំណុចខាងលើ ព្យាយាមបើកវ៉ាជែងរថយន្តកុងតឺន័រ បើកស្របទិស ហើយរេចង្កូតទៅបំណែកផ្លូវម្ខាង ជ្រុលទៅបុកម៉ូតូសេ១២៥ ស៊េរី២០១៣ ជិះម្នាក់ឯង បើកពីកើតទៅលិចច្រាសទិសគ្នា ចំពីមុខពេញទំហឹង បណ្តាលឲ្យដេកដួលទាំង២គ្រឿង បង្កឲ្យអ្នកបើកបរម៉ូតូសងខាងស្លាប់ភ្លាមៗនៅកន្លែង ចំណែកម្នាក់ទៀតរងរបួសធ្ងន់ ។
បើតាមសាច់ញាតិរបស់ជនរងគ្រោះឈ្មោះ ជួន ប៊ុនលីម បានឲ្យដឹងថា ជនរងគ្រោះក្រៅពីទំនេរការងារ ឆ្លៀតពេលថ្ងៃសៅរ៍ និងអាទិត្យ ទៅធ្វើការងារជាងភ្លើងកន្លែងផ្សេង ហើយមុនកើតហេតុ ខណៈដែលជនរងគ្រោះជិះម៉ូតូវិលត្រឡប់មកផ្ទះវិញ ក៏ជួបនូវឧប្បត្តិហេតុនេះតែម្តង ។
ក្រោយកើតហេតុ ក្រៅពីជនរងគ្រោះរបួសធ្ងន់ម្នាក់ ត្រូវបានរថយន្តគ្លីនិកឯកជនដឹកបញ្ជូនទៅគ្លីនិកបែកចាន រីឯសាកសពទាំង២នាក់ត្រូវបាននគរបាលទំនាក់ទំនងហៅក្រុមគ្រួសារមកទទួលដឹកយកទៅធ្វើបុណ្យតាមប្រពៃណី ។
ដោយឡែកម៉ូតូទាំង២គ្រឿងត្រូវបាននគរបាលវាស់វែងរួចយកទៅរក្សាទុកនៅការិយាល័យចរាចរណ៍ជើងគោកស្នងការរាជធានីភ្នំពេញ និងកសាងសំណុំរឿងចាត់ការទៅតាមនីតិវិធី ៕
ចែករំលែកព័តមាននេះ