ស្រាវជ្រាវបង្ក្រាបបានថ្នាំញៀនទ្រង់ទ្រាយធំមួយដែលដុះស្លែយូរហើយ
ខេត្ដបន្ទាយមានជ័យ ៖ ប្រតិបត្តិការបង្ក្រាបគ្រឿងញៀ.ន១ឈុត ត្រូវបានកម្លាំងនគរបាលនៃមន្ទីរប្រយុទ្ធប្រឆាំងគ្រឿងញៀ.ន សហការជាមួយកម្លាំងជំនាញ
ខេត្ដបន្ទាយមានជ័យ ៖ ប្រតិបត្តិការបង្ក្រាបគ្រឿងញៀន១ឈុត ត្រូវបានកម្លាំងនគរបាលនៃមន្ទីរប្រយុទ្ធប្រឆាំងគ្រឿងញៀន សហការជាមួយកម្លាំងជំនាញ និងកម្លាំងនគរបាលក្រុងប៉ោយប៉ែត នៅវេលាម៉ោង១២និង១៥នាទីថ្ងៃត្រង់ ថ្ងៃទី៩ មីនា បានចាប់ឈ្មួញជួញដូរគ្រឿងញៀនទ្រង់ទ្រាយធំមួយ នៅចំណុចផ្លូវលំ ក្រោយស្ថានីយប្រេងឥន្ធនៈតូតាល់ ស្ថិតក្នុងភូមិសូភី សង្កាត់កំពង់ស្វាយ ក្រុងសិរីសោភ័ណ ដោយចាប់ឃាត់ខ្លួនបានជនសង្ស័យ២នាក់ ដកហូតបានវត្ថុតាងគ្រឿងញៀនមួយចំនួនធំ សរុបទាំងគ្រឿងញៀនប្រភេទម៉ាទឹកកក និងថ្នាំញៀនយ៉ាម៉ា មានទម្ងន់រួមចំនួន១.៧៧៥,៣៣ក្រាម ។
លោកឧត្តមសេនីយ៍ត្រី ពៅ សំអេង នាយករងមន្ទីរប្រឆាំងគ្រឿងញៀន បានឲ្យដឹងថា ក្រោយពេលក្តាប់បានពីមុខសញ្ញាជួញដូរ និងប្រើប្រាស់គ្រឿងញៀន កម្លាំងនគរបាលបានអនុវត្តវិធីញុះញង់ និងឈានដល់ការចាប់ឃាត់ខ្លួនជនសង្ស័យចំនួន២នាក់ ។
ជនសង្ស័យទាំង២នាក់ ម្នាក់ឈ្មោះ យ៉ាន់ មាន ភេទប្រុស អាយុ៤២ឆ្នាំ នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ជាអ្នកលក់ដូរ និងម្នាក់ទៀតឈ្មោះ តេង ផូង ភេទប្រុស អាយុ៥២ឆ្នាំ ជាកសិករ នៅភូមិសូភី សង្កាត់កំពង់ស្វាយ ក្រុងសិរីសោភ័ណ ។ ជាមួយនឹងការបង្ក្រាបនេះ សមត្ថកិច្ចបានធ្វើការដកហូតបានវត្ថុតាង ដែលជនសង្ស័យបានលាក់ទុកក្នុងទូដែក ក្នុងនោះថ្នាំម្សៅក្រាមពណ៌សថ្លា មេតំហ្វេតាមីន (ម៉ាទឹកកក) សង្ស័យជាសារធាតុញៀនចំនួន៤ដុំ និងថ្នាំគ្រាប់សញ្ញាមានអក្សរ WY សង្ស័យជាសារធាតុញៀនចំនួន៤ដុំនិងកាំភ្លើងខ្លី១ដើមម៉ាកឡុក គ្រាប់ចំនួន៩៨គ្រាប់ ទូរស័ព្ទដៃ១គ្រឿង ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ មានប្រសាសន៍ថា នេះគឺជាការបង្ក្រាបករណីជួញដូរគ្រឿងញៀនដ៏ធំមួយក្នុងខេត្តបន្ទាយមានជ័យ ក្នុងឱកាសដែលកម្លាំងគ្រប់សមត្ថកិច្ចបើកយុទ្ធនាការក្នុងការប្រយុទ្ធប្រឆាំងគ្រឿងញៀន ។
លទ្ធផលនៅវេលាម៉ោង១២និង១៥នាទីថ្ងៃត្រង់ថ្ងៃទី៩ មីនា នេះ កម្លាំងនគរបាលនៃមន្ទីរប្រយុទ្ធប្រឆាំងគ្រឿងញៀន សហការជាមួយកម្លាំងជំនាញការិយាល័យប្រឆាំងគ្រឿងញៀននិងកម្លាំងនគរបាលក្រុងប៉ោយប៉ែត បានធ្វើការបង្ក្រាបករណីជួញដូរ និងចាប់ឃាត់ខ្លួនជនសង្ស័យបានចំនួន២នាក់ រួមទាំងដកហូតវត្ថុតាងថ្នាំញៀន ប្រភេទមេតំហ្វេតាមីនម្សៅពណ៌សថ្លាចំនួន៤ដុំ ទម្ងន់ស្មើ៩៨០,៤២ក្រាម ថ្នាំញៀនប្រភេទមេតំហ្វេតាមីនគ្រាប់មានអក្សរ WY ចំនួន៤ដុំ ស្មើ៤០ថង់ពណ៌ខៀវ រាប់ជាក់ស្តែង៨.០៨០គ្រាប់ ទម្ងន់៧៩៤,៩១ក្រាម និងដកហូតកាំភ្លើងខ្លីម៉ាកឡុក១ដើម បង់១គ្រាប់ ចំនួន៩៨គ្រាប់, ទូរស័ព្ទដៃ១គ្រឿង, ដាវសាម៉ូរ៉ៃចំនួន២ដើម និងជញ្ជីងសម្រាប់ថ្លឹងថ្នាំចំនួន១ រថយន្តចំនួន២គ្រឿង ។
នៅចំពោះមុខសមត្ថកិច្ច ជនសង្ស័យបានសារភាពថា ថ្នាំញៀនទាំងនេះ គឺគេបម្រុងនាំឆ្លងដែនទៅប្រទេសថៃ តែក៏ត្រូវបានសមត្ថកិច្ចនគរបាលចាប់ឃាត់ខ្លួនបាន ។ លោកឧត្តមសេនីយ៍ស្នងការបានបញ្ជាក់ថា ផ្អែកលើចម្លើយសារភាពរបស់ជនសង្ស័យ និងផ្អែកលើវត្ថុតាងជាក់ស្តែងដែលសមត្ថកិច្ចឆែកឆេររកឃើញ នេះជនកំពុងរៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ ចាត់ការតាមផ្លូវច្បាប់ ៕
ចែករំលែកព័តមាននេះ