រាជធានីភ្នំពេញ ៖ សមាជិកក្រុមចោរប្លន់ប្រដាប់អាវុធអាកា២នាក់ កាលពីថ្ងៃទី១០ និង១១ មីនា ២០១៧ ត្រូវបាននាយកដ្ឋាននគរបាលក្រួងមហាផ្ទៃ សហការជាមួយនគរបាលខេត្តព្រៃវែង បានធ្វើការស្រាវជ្រាវរហូតឃាត់ខ្លួនបាន បន្ទាប់ពីពួកគេបានរត់គេចខ្លួនអស់រយៈពេលជាង៧ឆ្នាំកន្លងមក ។
ជនសង្ស័យម្នាក់មានឈ្មោះខាំ ថុន អាយុ៥៦ឆ្នាំ មានស្រុកកំណើតនៅភូមិថ្នល់កែង ឃុំពានរោង ស្រុកស្វាយអន្ទរ ខេត្តព្រៃវែង និងម្នាក់ទៀតឈ្មោះស៊ុន វណ្ណា ហៅប៉ាអាភ័ស្ត អាយុ៥២ឆ្នាំ នៅភូមិព្រែកតាខាប ឃតុស ស្រុកត្រាំកក់ ខេត្តតាកែវ ។
ទាក់ទិននឹងការឃាត់ខ្លួនសមាជិកក្រុមចោរប្លន់ប្រដាប់អាវុធ២នាក់នេះ ត្រូវបានលោកឧត្តមសេនីយ៍ត្រី ប៊ន សំអាន អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ដែលចុះធ្វើកិច្ចការនេះឲ្យដឹងថា ក្នុងអំឡុងឆ្នាំ២០១០ ជនសង្ស័យមួយក្រុម បានធ្វើសកម្មភាពប្លន់ប្រដាប់អាវុធនៅរាជធានីភ្នំពេញ និងតាមបណ្តាខេត្តជាច្រើនករណី ក្រោយពីធ្វើសកម្មភាពប្លន់ហើយ ក្រុមនេះត្រូវបានសមត្តកិច្ចបង្ក្រាប និងចាប់ខ្លួនបក្សពួកមួយចំនួននាំទៅផ្តន្ទាទោសតាមផ្លូវច្បាប់ ។
ចំណែកជនសង្ស័យនៅសេសសល់បានរត់គេចខ្លួន ជាក់ស្តែងដូចចម្លើយសារភាពជនស្ស័យ២នាក់ខាងលើនេះថា ពួកគេបានរត់ទៅជ្រកកោណធ្វើការនៅប្រទេសថៃអស់រយៈពេលជាង៧ឆ្នាំ ហើយនឹកស្មានថាសមត្តកិច្ចភ្លេចខ្លួនក៏បានវិលមកស្រុកវិញ និងបានរស់នៅជួបជុំប្រពន្ធកូនច្រើនខែដែរ ទើបសមត្តកិច្ចចាប់ខ្លួននេះ ។
លោកឧត្តមសេនីយ៍ឯក សុខ ខេមរិន ប្រធាននាយកដ្ឋាននគរបាលព្រហ្មទណ្ឌ បានមានប្រសាសន៍ថា សមត្តកិច្ចព្រៀបដូច(ជង់ រង់ចាំកុក.កុកតែងតែភ្លេចជង់)ការចាប់ឃាត់ខ្លួនជនសង្ស័យទាំង២នាក់នេះ ដោយយោងតាមអនុសាសន៍សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក្រោមការអនុវត្តតាមបទបញ្ជាររបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងមានការចង្អុលបង្ហាញពីនាយឧត្តមសេនីយ៍ កង សាខន អគ្គស្នងការរង ទទួលការងារនគរបាលយុត្តិធម៍ ។
នាយកដ្ឋាននគរបាលព្រហ្មទណ្ឌ បាន និងមិននៅព្រងើយកន្តើយរាល់បទល្មើសព្រហ្មទណ្ឌ តែងតែប្រើប្រាស់កម្លាំងឲ្យចុះស្រាវជ្រាវ ស៊ើបអង្កេតជាប់ជាប្រចាំ ។ លោកប្រធាននាយកនគរបាលព្រហ្មទណ្ឌបន្តថា កន្លងមកសមត្តកិច្ចយើងបង្ក្រាប និងចាប់ខ្លួនជនសង្ស័យដែលប្រព្រឹត្តបទល្មើសព្រហ្មទណ្ឌធំៗបានជាច្រើនករណីរួចមកហើយ ជាក់ស្តែងដូចករណីនេះលោកបានចាត់តាំងលោកឧត្តមសេនីយ៍ត្រី ប៊ន សំអាត អនុប្រធាននាយកដ្ឋាន ឲ្យចុះទៅសហការជាមួយនគរបាលខេត្តព្រៃវែង ដែលកម្លាំងយើងស៊ើបអង្កេតដឹងថា មានជនសង្ស័យជាសមាជិកក្រុមចោរប្លន់អាកា២នាក់ បានវិលមកលាក់ខ្លួននៅស្រុកកំណើតវិញ ដែលសមត្តកិច្ចយើងមានដីកាបង្គាប់ឲ្យចាប់ខ្លួន របស់ចៅក្រមសាលាដំបូងរាជធានីភ្នំពេញស្រាប់ ។
តាមដីកាចាប់ខ្លួននោះចេញដោយលោកស្រី ចាំង ស៊ីណាត កាលលោកស្រីនៅជាចៅក្រមស៊ើបសួរសាលាដំបូងរាជធានីភ្នំពេញ បង្គាប់ឲ្យចាប់ខ្លួនឈ្មោះ ខាំ ថុន និងឈ្មោះ ស៊ុន វណ្ណា ពាក់ពន្ធពីបទ.ប្លន់ប្រដាប់អាវុធប្រព្រឹត្តនៅភូមិគោកខ្សាច់ សង្កាត់ភ្លើងឆេះរទេះ ខណ្ឌដង្កោ រាជធានីភ្នំពេញ កាលពីថ្ងៃទី៤ វិច្ឆិកា ឆ្នាំ២០១០ (ពោលគឺជាង៧ឆ្នាំមុន) ។
លោកឧត្តមសេនីយ៍ឯក សុខ ខេមរិន បន្តថា ជនសង្ស័យកំពុងត្រូវបានសមត្តកិច្ចកំពុងធ្វើការសាកសួរ ដើម្បីស្រាវជ្រាវរកបទល្មើសផ្សេងក្រៅពីដីកាចាប់ខ្លួននេះទៀត បន្ទាប់មកសមត្តកិច្ច និងកសាងសំណុំរឿងបញ្ជូនពួកគេទៅកាន់សាលាដំបូងរាជធានីភ្នំពេញ តាមនិតិវិធី ៕
ចែករំលែកព័តមាននេះ